Ehistoli lyauvali
7 Apa ga mene kukanderera Saromo, mundiro tagu tundu meguru tagu hwike nzambo zeswakerero nononzambo dapeke, makura uyerere waJehova tau zwida nzugo. 2 Vapristeli kapi va vhulire kuhwilira monzugo zaJehova, morwa uyerere waJehova kwa zwidire nzugo zaJehova. 3 Vaisraeli navenye va mwene mundiro apa gwa tundire meguru, ano uyerere waJehova kwa kere peguru lyonzugo, makura awo tava tu nongoro, tava linyongamene ntani tava pandura Jehova “yeeyi age muwa; eharo lyendi lyanarunye.”
4 Makura hompa novantu navenye tava gava nonzambo komeho zaJehova. 5 Hompa Saromo kwa geve nongombe 22 000 ntani nonzwi 120 000 ngononzambo. Ngesi yimo hompa Saromo novantu navenye va tungikire nzugo zaKarunga gousili. 6 Vapristeli kwa sikeme apa ngava ruganene, ano Varevhi kwa kere noyisikiso eyi ngava ruganesa mokudimbira Jehova. (Hompa Ndafita kwa rugene yisikiso oyo yipo a yi ruganese mokupandura nokuhamberera Jehova* “yeeyi eharo lyendi lyanarunye.”) Vapristeli makura tava fuda nombendo komeho zoVarevhi, awo Vaisraeli kuna sikama.
7 Makura Saromo ta pongora evango lyopokatji lyemeharango eli lya kere komeho zonzugo zaJehova, morwa pevango olyo yipo ga gaverere nonzambo deswakerero ntani magadi gononzambo dombili, yeeyi sizambero songoporo esi ga rugene Saromo sinunu sa kere ntani kapi pwa gwanekere nonzambo deswakerero, nonzambo dombuto ntani nomagadi. 8 Posiruwo oso, Saromo kwa rugene sipito kumwe noVaisraeli mazuva ntambali. Vantu wovanzi kwa tundire koRebo-hamati* dogoro koMuramba gwaEgipite. 9 Nye mezuva lyauntantatu,* awo kwa pongere kumwe va karere Karunga, yeeyi awo kwa tungikire sizambero mazuva ntambali ntani kwa dene sipito mazuva ntambali. 10 Makura mezuva 23 lyokwedi kwauntambali, Saromo ta rekere vantu awo vana hafa unene, morwa yininke yoyiwa eyi Jehova ga ruganenene Ndafita naSaromo ntani novantu vendi Vaisraeli.
11 Yipo nye, Saromo kwa mene kutunga nzugo zaJehova ntani mbara* zahompa. Age kwa sikisire mo nayinye eyi ga here kurugana konzugo zaJehova nombara zendi. 12 Jehova makura ta monekere Saromo masiku, ta mu tantere asi: “Ame na zuvha ekanderero lyoge ntani ame na horowora evango eli yipo ngava gavere mo nonzambo. 13 Apa ngani dira kurokesa mvhura ntani apa ngani ninka nompasimpasi di zonagure yimeno yomosirongo ntani apa ngani tumina vantu vange ehamba, 14 nsene vantu vange ava ava zigidisa kedina lyange ngava linunupika nokukanderera ntani va papare nge nokuhageka kurugana yininke yoyidona, ame ngani zuvha makanderero gawo nokuvagusira po ntani ngani ninka sirongo sawo si kare ngwendi moomu sa kere nare. 15 Ame ngani va tara eho ntani ngani zuvha makanderero aga ngava kanderera kevango eli. 16 Ame kwa horowora nokupongora nzugo ezi, yipo ngava fumadekere mo edina lyange dogoro narunye ntani ame ngani zi tarera ntani ngani zi popera siruwo nasinye.
17 “Ano nsene o limburukwa nge ngwendi moomu ngava limburukwa nge oguho Ndafita pokusikisa mo noveta nonompangera dange, 18 ame ngani ninka uhompa woge u karerere ngwendi moomu na tulire po egwanekero noguho Ndafita pokutanta asi: ‘Moruvharo roge ngamu tunda nkenye apa gumwe ogu nga pangera moIsraeli.’ 19 Nye nsene ngo siga nge ntani o dire kukwama noveta nonompangera dange edi na kutantera, o ze o ka karere yikarunga yapeke ntani o ka yi nyongamene, 20 ame ngani gusa Vaisraeli mosirongo esi nava pa, ano nzugo ezi na pongwera edina lyange ngani zi gusa ko komeho zange. Ano vantu ngava zi zora ntani kapi ngava zi fumadeka. 21 Nzugo ezi ngazi kara ndambo zomamanya. Nkenye ogu nga pita po nga tetuka ntani nga tanta asi: ‘Morwasinke Jehova ga ruganena yininke eyi mosirongo esi ntani nonzugo ezi?’ 22 Makura vantu ngava tanta asi: ‘Yeeyi awo kwa siga Jehova Karunga gozinyakurwawo ogu ga va gusire moEgipite, va ka karere yikarunga yapeke nokuyinyongamena. Eyi yiyo ga va retera udigu wangesi.’”