Buke zaRukasa

10 Kutunda opo, Hompa ta horowora hena 70 tava tumu va ze vavali-vavali mwankenye sitata ntani evango oku ga here kuza. 2 Makura age ta va tantere asi: “Muzangu munzi, nye varugani vasesu. Yipo nye, hundireni Mwenyamuzangu a tume ko varugani komuzangu gwendi. 3 Tareni, ame kuna kumutuma ngwendi nonzwi mokatji komambungu. 4 Mwa ha lisimbira ndjato zoyimaliwa ndi yicamakaku, ntani mwa ha ka morora nkenye ogu* nomu ka gwana monzira. 5 Nkenye membo nomu ka hwilira, tanko ka mororeni asi: ‘Mbili zi kare none.’ 6 Nsene muntu gemembo olyo kapi ga hara mbili, mbili zeni tazi mu tengwire. Nye nsene asi age muntu gombili, mbili zeni tazi kara nage. 7 Ka kareni moomo membo, mu ka lye nokunwa eyi nava ka mu pa, yeeyi murugani ga fira mfeto zoyirugana yendi. Mwa ha ka tunda mo omo membo mu ka ze membo lyapeke.

8 “Ntani hena, mwankenye sitata esi ngomu ka za, nsene vana mu tambura, ka lyeni eyi nava ka mu pa 9 nokukaverura vaveli mositata oso ntani ka va tantereni asi: ‘Uhompa waKarunga pepi none una kara.’ 10 Mwankenye sitata esi nomu ka hwilira nye va dire kukamutambura, ka zeni mononzira daso nokutanta asi: 11 ‘Tatu likukumuna nombundu zeezi zomositata seni ezi zina kakatere konompadi detu. Nye nampili ngoso, diveni asi Uhompa waKarunga pepi una kara.’ 12 Tani mu tantere asi yomoSodoma ngayi kara hansa kupitakana yositata oso.

13 “Ee udigu musi ngau kugwana ove Korasini nove Betesaida! Yeeyi ngano asi yitetu eyi kwa horokerere moTirusi nomoSidoni, ngano va litezurura nare va dware yikoverero yononsako nokulikwita enoto. 14 Yosili nina kumutantera asi mezuva lyompanguro, sitata saTirusi naSidoni ngayi kara hansa kupitakana one. 15 Ano ove Kaperenaumu, nye ngava ku zerure tupu dogoro keguru ndi? Ndangove, moMayendo* ngava ku zugumina!

16 “Nkenye ogu a mu purakene, nyame a purakene. Ano ogu a dili kumupurakena, nyame a dili kupurakena. Ntani hena, nkenye ogu a dili kupurakena nge, kapi hena a purakene ogu ga tuma nge.”

17 Makura owo 70 tava ka tengura noruhafo, tava ya mu tantere asi: “Hompa, nampili nompepo donondona deedi kuna kara mepangero lyetu medina lyoge.” 18 Age ta va limburura asi: “Ame kuna kuyimona nare asi Satana kuna kugwa ngwendi ruvadi runa kutunda meguru. 19 Tareni, ame tani mu pe nonkondo dokulyata pomazoka nopononge nononkondo dokupitakana nonkore deni, ntani kwato eyi ngayi mu remeka. 20 Nye mwa ha hafa kweyi nompepo donondona dina kara mepangero lyeni nye hafeni asi madina geni vana ga tjanga meguru.” 21 Posiruwo sooso, ta hafa unene mompepo zokupongoka, ta uyunga asi: “Nyove nina kupanda, Tate, Hompa geguru nevhu, yeeyi wa horekera yininke eyi vakonentu novanandunge, yiyo wa yi horwera ava va linunupika ngwendi vanona. Nhi, Tate, ngesi yimo wa yi harera. 22 Nayinye kwa yi pa nge Otate, nye nagumwe si ga diva Muna ntudi Guhya, ntani nagumwe si ga diva Guhya ntudi Muna ntani googu tupu ga hara kuyihorwera Muna.”

23 Makura ta pirukire kovarongwa vendi noku va tantera awo velike asi: “Meho aga gana kumona eyi muna kumona ga ragopa. 24 Tani mu tantere asi vaporofete novahompa wovanzi kwa here kumona eyi muna kumona, nye kapi va yi mwene, awo kwa here kuzuvha eyi muna kuzuvha, nye kapi va yi zuvhire.”

25 Mulirongi gumwe gomatjangwa ta katuka a mu heteke pokumupura asi: “Murongi, yisinke nani rugana yipo ngani ka gwane mwenyo gwanarunye?” 26 Age ta mu limburura asi: “Yisinke za tanta Veta? Ngapi o zi kwata egano?” 27 Ta mu limburura asi: “Hara Jehova Karunga goge nomutjima goge nagunye nomwenyo* goge nagunye nononkondo doge nadinye nonondunge doge nadinye ntani hara mukweni moomu wa lihara nyamoge.” 28 Age makura ta mu tantere asi: “Ono hungike, twikira kuyirugana eyi makura ngo gwane mwenyo gwanarunye.”

29 Nye morwa age kwa here kulikida asi muhungami, ta pura Jesus asi: “Yilye mukwetu?” 30 Jesus ta mu limburura asi: “Mugara gumwe kwa tundire koJerusarema a ze koJeliko, vawidi tava mu gwana, tava mu hutura, tava mu toona, makura tava mu sigi age ta hara kufa. 31 Mupristeli gumwe kwa gendere nzira zoozo, nye apa ga mu mwene, ta mu kunduruka ta ka za. 32 Murevhi nage ta ya piti poopo, nye apa ga mu mwene, nage ta mu kunduruka ta ka za. 33 Nye Musamaliya gumwe ogu ga gendere nzira ozo, apa ga mu mwene, ta mu fire nkenda. 34 Ta mu hedere nokudinga yironda yendi, ta kwita po magadi nokutjira po vhinyu. Makura ta mu rondeke posindongi sendi, a mu tware kohotera va ka mu pakere mbili. 35 Ezuva lyokukwama ko, ta gusa madenali gavali, ta ga gava kwa mwenyahotera nokutanta asi: ‘Mu pakera mbili, nsene naku hupa yimwe, ngani ya yi futa apa ngani ka tengura.’ 36 Yilye pokatji kava vatatu ono kugazara ga yi likidire asi age mukwawo zogu va toonene vawidi?” 37 Age ta mu limburura asi: “Googu ga mu fililire nkenda.” Jesus ta mu tantere asi: “Zende nove o ka rugane yokulifana.”

38 Ngomu va gendere, age ta ka hwilira momukunda gumwe. Mukadi gumwe gedina Malita ta mu tambura ngomugenda membo lyendi. 39 Age kwa kere namumbyendi gomukadi gedina Mariya, ogu ga hingilire konompadi daHompa a purakene eyi ana kuuyunga.* 40 Ano Malita age kwa hokwere kuwapaika yininke yoyinzi. Age ta mu wizire nokumutantera asi: “Hompa, ove kwato sinka kweyi ana sigi nge mumbyange ni rugane nyamelike? Mu tantera a ya vatere nge.” 41 Hompa makura ta mu limburura asi: “Malita, Malita, ove kuna kulipakera sinka yininke yoyinzi. 42 Kapi tuna hepa yininke yoyinzi nye nampili sininke simwe tupu sina gwanene. Mariya kuna horowora yoyiwa po,* eyi ngava dira kumugusa.”