Vakolinte vauvali
11 Nina hara mu lididimikire nge nampili ngomu ani moneka ngwendi egova. Nayene one kuna kulididimikira nge. 2 Yeeyi ame kumuzuvhira esupa morwa ame kwa mu tumbwidira mononkwara komugara, Kristusa, nina hara kumugava kwendi ngomukadona gokukuhuka. 3 Nina kara nowoma asi nampo moomu ezoka lya pukisire Eva moukotoki walyo, none nampo kuvhura yi mu horokere. Nondunge deni nampo kuvhura di zonauke mu dire kukuhuka nokuhara nawa-nawa Kristusa. 4 Ame kuna kuyiuyungira eyi morwa nsene pa wiza gumwe a ya zuvhise Jesus gwapeke, ga hana asi googu atu zuvhisa, ndi asi mu gwane mpepo zapeke za hana asi zeezi mwa gwana, ndi nsene gumwe a ya mu zuvhisira mbudi zongwa za hana asi zeezi mwa tambura, one kumulididimikira noureru. 5 Yeeyi ame na yi diva asi ava omu tumbura asi vapositoli kapi va pita nge mwankenye eyi. 6 Nampili ngano yi kare asi kapi na diva kuuyunga nawa, ame na kara nediwo, ose twa yi mu horwera mononkedi nadinye nomoyininke nayinye.
7 Ndi na zona kulinunupika yipo va mu fumadekere po morwa na mu zuvhisira mbudi zongwa kuhamena Karunga na hana kumufutisa? 8 Nombungakriste dapeke kwa vaterere nge ano eyi kwa kere ngwendi kuna kuvavaka yipo ni mu vatere. 9 Apa na kere none, ame kwa hepere yuma nye kwato ogu na hundilire, yeeyi vapuli vakwetu ava va tundire koMakedoniya kwa pere nge nayinye eyi na hepere. Ame kwa nyokerere po kukara mudigo kweni mwankenye eyi ntani ngani twikira kuyirugana. 10 Siruwo esi nina kara murongwa gwaKristusa, kwato eyi ngayi kondera nge kulikangangera yininke eyi moAkaya nazinye. 11 Morwasinke? Morwa kapi na mu hara ndi? Karunga ga yi diva asi na mu hara.
12 Koveli ava ava likanganga nokutanta asi nawo vapositoli ngwendi nyose. Ame ngani twikira kurugana eyi ani rugana yipo ngani va ninkise va dire kulikanganga. 13 Yeeyi vantu vangoso, vapositoli woyimpempa ntani vakumbageli, awo kulininkisa asi vapositoli vaKristusa. 14 Eyi yiyo ayi dilire kutetukisa nge morwa naSatana nage kulininkisa a kare ngwendi muengeli gomuwa.* 15 Eyi yiyo ayi dilire kututetukisa kweyi ava lininkisa vakareli vendi asi awo kurugana youhunga. Nye uhura wawo ngau liza noyirugana yawo.
16 Tani tanta hena asi: Pwa ha kara ogu ana kugazara asi ame egova. Nye nampili mu gazarere nge ngoso, tambureni nge tupu ngomuntu gegova yipo name ni likangange. 17 Ame kapi nina kuuyunga hena pokukwama sihonena saHompa, nye ngwendi muntu gomugova ogu ga lihuguvara mwene. 18 Mokumona asi wovanzi kuna kulikangangera yosintu, name tani likanganga. 19 One kulimona asi muvanandunge, ngapi nye omu omu lididimikilire magova nehafo? 20 Nayene one kulididimikira ava ava mu tura moupika nava ava mu manene yininke yeni nava ava mu hokona eyi mwa kara nayo nava ava linenepeke noku mu sensa ntani nava ava mu kapura koyipara.
21 Ose kulizuvha nomuga pokuuyunga eyi, nye ame kuna kuyiuyungira morwa ose kumoneka kweni ngwendi kwato nonkondo.
Nye nsene gumwe a likida uradi, name kuvhura ni likide uradi. 22 Awo Vahebeli ndi? Name si. Awo Vaisraeli ndi? Name si. Awo vemezimo* lyaAbirahamu ndi? Name si. 23 Awo vakareli vaKristusa ndi? Ame tani limburura ngwendi muntu gokuzaruka asi ame nyame na va pita. Ame kwa rugana yoyinzi, kwa tura nge modorongo yikando yoyinzi, kwa toona nge yikando yoyinzi ntani kwa ligwanekera noyimpagwa yoyinzi yokutwaredesa konomfa. 24 Yikando yitano va sopora nge Vajuda nongora 39, 25 yikando yitatu kwa toonene nge noyiuro, ano sikando simwe kwa toonene nge nomamanya, yikepa kwa tekera nge yikando yitatu, masiku nomutenya kwa pupagerere pokatji kefuta; 26 momarugendo gange gomanzi ngani ligwanekere noyimpagwa yomomukuro neyi yokovakorotji neyi yokovantu womomuhoko gwange neyi yokonomuhoko dapeke neyi yomoyitata neyi yomomburundu neyi yemefuta neyi yokovapuli vakwetu woyimpempa, 27 kwa rugana unene, rorunzi kapi ngani rara, ngani fu nzara nenota, rorunzi kapi ngani kara nonondya, ngani fu komufu ntani kwato yikoverero.*
28 Kapisi yooyo yelike tupu nye nkenye ezuva ngani kara nosinka kuhamena nombungakriste nadinye. 29 Ayo kuguvisa nge nsene gumwe ana dili nonkondo ntani ayo kuhandukisa nge nsene gumwe ana pundukisa mukwawo.
30 Nsene ni likanganga, ame kulikangangera eyi ayi horora upirankondo wange. 31 Karunga, Guhya Hompa Jesus ogu va fira kuhamberera narunye, ga yi diva asi ame kapi nina kutanta yimpempa. 32 MoDamasikusi, mugendesi ogu ga kara konhi zepangero lyahompa Aretasi, kwa tulire vanomeni pomavero gositata yipo va kwate nge, 33 nye vapuli vakwetu kwa pitisilire nge pekende lyekekuma lyositata mosimbamba makura tani henduka.