Mbilive zauvali kwaTimoteusa
4 Tani kuganesa kosipara saKarunga naJesus Kristusa ogu nga pangura vanamwenyo novafe apa nga moneka a pangere ngaHompa goUhompa asi: 2 O zuvhise nonkango daKarunga noupampi poyiruwo yoyiwa neyi yoyidona. Va vyukisa, va tugumukira, va rondora nelididimiko ntani va ronga nawa. 3 Yeeyi ngasi wiza siruwo apa ngava dira kupurakena kerongo lyousili, nye ngava kwama madowo gavene, ngava lipongaikira varongi wokuvatantera tupu eyi vana hara kuzuvha.* 4 Awo ngava hageka kupurakena kousili makura ngava purakene komasanseko goyimpempa. 5 Nye ove ko, kara nonondunge mwanayinye, lididimikira maudigu ntani twikira kuzuvhisa mbudi zongwa* ntani sikisa mo nawa sirugana soge kwaKarunga.
6 Yeeyi ame kuna fana ngwendi nzambo zoyikunwa ezi vana kutjira posizambero ntani siruwo sokumangurura nge pepi sina kara. 7 Ame kwa rwa yita yoyiwa, ame kwa duka melirombero dogoro kouhura ntani kwa kwaterera kepuro. 8 Hompa ogu a pangura pauhunga kwa pungwira nge nkata. Nkata ezi, zovahungami. Age nga zi pa nge ngomfeto mezuva olyo. Kapisi nyamelike nga zi pa, nye hena nanavenye ava va ndindira siruwo esi nga moneka.
9 Wiza usimbu kwange. 10 Yeeyi Demasa ga siga nge morwa ana hara unene uzuni* ou makura yiyo ga za koTesaronika, Keresikesi koGarata, ano Titusa koDalimatiya. 11 Rukasa gelike nina kara nage. Ngo ka piture Marukusa yeeyi age nga ya vatera nge unene mosirugana sange. 12 Tikikusi na mu tuma koEfeso. 13 Apa ngo wiza, ngo pitwire nge erwakani lyange eli na siga moTorowasa membo lyaKarupusi ntani nomagango, unene po goyipapa.
14 Arekisandeli muhambuli gongoporo kwa rugana nge yoyidona unene. Jehova nga mu tengeka kuliza noyirugana yendi. 15 Nove wa hepa kutakamesa yeeyi age kurwanesa unene mbudi zetu.
16 Apa na lipoperere sikando sokuhova komeho zovapangeli, kwato ogu ga hamene kwange, navenye kwa sigire nge. Karunga ngano ga ha yi va pangwira. 17 Nye Hompa kwa kere name, age kwa pere nge nonkondo yipo sirugana sokuzuvhisa si sike mo kupitira mwange ntani yipo nomuhoko nadinye di zuvhe nayinye eyi adi tanta nonkango daKarunga. Age kwa parura nge mokana kanyime. 18 Hompa nga popera nge koyirugana nayinye yoyidona ntani nga parwira nge Uhompa wendi wemeguru. Va mu yererepeke narunye nanarunye. Amen.
19 Kundisira po Pilisikira naAkura ntani nava vemembo lyaOnesiforusi.
20 Erasitusa mweli moKolinte, ano Torofimusi na mu siga moMiretusi morwa ta vere. 21 Genderera kuwiza komeho kutameke kufu.
Euburusi naPudenesi naLinusi naKeraudiya ntani novapuli vakwetu navenye vana mu kundisire po.
22 Hompa ngano a tungike nkareso zoge zongwa. Nkenda zendi zonene zi kare none.