Josuwa

10 Adoni-sedeki hompa gwaJerusarema kwa zuvhire asi Josuwa ana homokere sitata saAi ntani ana si zonagura po nokudipaga hompa gwaAi ngwendi moomu ga zonagwire po sitata saJeliko nokudipaga hompa gwaso. Age kwa zuvhire hena asi vantu womoNgibiyoni vana tulisa po mbili noVaisraeli ntani va va pulisira va tunge mokatji kawo. 2 Age kwa tukukire morwa Ngibiyoni kwa kere sitata sosinene ngwendi simwe soyitata eyi a pangere hompa. Aso kwa kere sosinene kupitakana sitata saAi ntani vagara vamo navenye kwa kere vakwayita. 3 Makura Adoni-sedeki hompa gwaJerusarema ta tumu mbudi kwaHohamu hompa gwaHeburoni, Piramu hompa gwaJarumuti, Jafiya hompa gwaRakisi ntani Debire hompa gwaEgironi. Age kwa va tanterere asi: 4 “Wizeni mu ya vatere nge tu ya rwise sitata saNgibiyoni morwa vantu vamo kwa tulisa po mbili naJosuwa ntani noVaisraeli.” 5 Makura hompa gwaJerusarema, gwaHeburoni, gwaJarumuti, gwaRakisi ntani gwaEgironi, tava pongo kumwe novakwayita vawo. Vahompa ava vatano woVaamoli kwa zire, tava ka kundurukida sitata saNgibiyoni yipo va si rwise.

6 Makura vagara womoNgibiyoni tava tumu mbudi kwaJosuwa ogu ga kere mokamba moGiligali asi: “Wa ha sigilira vapika woge. Wiza usimbu o ya tu vatere nokutupopera. Vahompa navenye woVaamoli ava va tunga momukunda gonondundu, vana wiza va ya tu rwise.” 7 Makura Josuwa ta tundu moGiligali kumwe novakwayita navenye wononkondo.

8 Jehova makura ta tantere Josuwa asi: “Wa ha va tjira, yeeyi ame nina va gava momawoko goge. Awo kapi ngava vhura kukurwisa.” 9 Josuwa ta gendi masiku mudima a tunde koGiligali, makura tava homokere awo va hana kuyindindira. 10 Jehova makura ta piyaganeke Vaamoli komeho zoVaisraeli, makura tava va dipagere moNgibiyoni, tava va tjida dogoro koBete-horoni. Awo hena kwa twikilire kuvadipaga dogoro koAseka naMakeda. 11 Apa va tjwayukire va duke Vaisraeli ntani apa va gurumukire poBete-horoni, Jehova ta ninki mvhura zakamanya zi va rokere dogoro koAseka, makura tava fu. Vantu ava va fire komvhura zakamanya vanzi kupitakana ava va dipagere Vaisraeli.

12 Mezuva eli ga vaterere Jehova Vaisraeli va funde Vaamoli, Josuwa kwa tanterere Jehova komeho zoVaisraeli asi:

13 Makura ezuva tali sikama ndjikiti ntani kwedi kapi kwa gendere dogoro Vaisraeli tava fundu nonkore dawo. Nani eyi kapi va yi tjanga mobuke zaJasara? Ezuva kwa sikeme pokatji ntani alyo kapi lya tokere. 14 Jehova kapi ga purakena rumwe kekanderero lyangoso, ano ezuva olyo kapi lya kara ko rumwe ntani kapi lya horoka hena, yeeyi Jehova kwa rwililire po Vaisraeli.

15 Kutunda opo, Josuwa ta tengura kumwe novakwayita navenye kokamba moGiligali.

16 Ano vahompa vatano tava duka va ka vande mekombombo moMakeda. 17 Makura Josuwa tava mu tantere asi: “Vahompa vatano tuna va gwana vana vanda mekombombo moMakeda.” 18 Makura Josuwa ta tanta asi: “Sindumwineni ko mamanya gomanene kekombombo ntani tureni ko vagara va va nomene. 19 Nye one wokuhupa ko, twikireni kutjida nonkore deni mu va dipage. Mwa ha va tarerera va ka hwilire moyitata yawo, yeeyi Karunga gweni Jehova ana va gava momawoko geni.”

20 Josuwa novakwayita kwa dipagere vantu wovanzi, kugusa ko vamwe ava va dukilire moyitata eyi va kundurukida makuma. 21 Ano konyima, vakwayita navenye tava ka tengura kwaJosuwa ogu ga kere mokamba moMakeda. Kwato nampili muntu gumwe ogu ga vhulire kuuyungira Vaisraeli yininke yoyidona. 22 Makura Josuwa ta tanta asi: “Guseni ko mamanya kekombombo mu retere nge vahompa owo vatano.” 23 Awo tava mu retere vahompa ava vatano: hompa gwaJerusarema, gwaHeburoni, gwaJarumuti, gwaRakisi ntani gwaEgironi. 24 Apa va retere vahompa owo kwaJosuwa, age ta zigida vagara navenye woVaisraeli, ta tantere vapitisili wovakwayita ava va zire kumwe nage asi: “Wizeni komeho. Lyateni pononsingo dovahompa ava.” Makura awo tava wiza komeho, tava lyata pononsingo dovahompa owo. 25 Makura Josuwa ta va tantere asi: “Mwa ha tukuka ndi mu tjire yuma. Kareni nouradi ntani koreni, morwa eyi yiyo nga rugana Jehova kononkore deni nadinye edi ngadi mu rwisa.”

26 Makura Josuwa ta va dipaga, ta va zenzeresa koyitji yitano, awo kwa kere kooko dogoro kongurova. 27 Apa lya tokere ezuva, Josuwa ta va tantere va va guse ko koyitji va va zugumine mekombombo eli va vende. Makura tava sindumwine ko mamanya gomanene, ano mamanya ogo pogeli nanaina eli.

28 Josuwa kwa fundire sitata saMakeda ezuva olyo ntani kwa si zonagwire po. Age kwa dipagere hompa gwaso novantu navenye ava va tunga mo. Age kwa dipagere hompa gwaMakeda ngwendi moomu ga dipagere hompa gwaJeliko.

29 Makura Josuwa novagara navenye woVaisraeli tava tundu moMakeda va ze koLibuna va ka rwise vantu vamo. 30 Jehova kwa geve sitata oso nahompa gwaso momawoko goVaisraeli ntani awo kwa si zonagwire po nokudipaga vantu vamo navenye. Awo kwa dipagere hompa gwawo ngwendi moomu va dipagere hompa gwaJeliko.

31 Kutunda opo, Josuwa novagara woVaisraeli navenye tava tundu moLibuna va ze koRakisi. Awo kwa dikire kamba zawo moomo, makura tava homokere sitata oso. 32 Jehova kwa geve sitata saRakisi momawoko goVaisraeli, makura tava si homokere mezuva lyauvali. Awo kwa si zonagwire po ntani kwa dipagere vantu vamo norufuro ngwendi moomu va rugene sitata saLibuna.

33 Makura Horamu hompa gwaGesere ta zi a ka vatere vantu womositata saRakisi, nye Josuwa ta mu dipaga kumwe novantu vendi navenye.

34 Makura Josuwa novagara navenye woVaisraeli tava tundu moRakisi va ze koEgironi. Awo kwa dikire kamba zawo moomo, makura tava homokere sitata oso. 35 Awo kwa homokerere sitata oso, tava si zonagura po mezuva lyoolyo. Awo kwa dipagere vantu navenye womositata oso ngwendi moomu va dipagere vantu womoRakisi.

36 Makura Josuwa kumwe novagara woVaisraeli tava tundu moEgironi va ze koHeburoni, makura tava ka homokera sitata saHeburoni. 37 Awo kwa homokerere sitata saHeburoni, tava si zonagura po kumwe nonodoropa edi da si kundurukidire ntani awo kwa dipagere hompa gwawo novantu navenye ava va tunga mo. Age kwa zonagwire po sitata oso ntani age kwa dipagere vantu ava va tunga mo ngwendi moomu ga rugene Egironi.

38 Konyima, Josuwa novagara woVaisraeli navenye tava vyuka kositata saDebire, makura tava ka si homokera. 39 Age kwa homokerere sitata saDebire nonodoropa nadinye edi da si kundurukida nokudipaga hompa gwawo novantu navenye ava va tunga mo. Age kwa zonagwire po sitata saDebire nokudipaga hompa gwawo ngwendi moomu ga zonagwire po sitata saHeburoni nesi saLibuna nokudipaga hompa gwawo.

40 Josuwa kwa fundire nomukunda nadinye donondundu, Negebu, Sefera nonomukunda omu mwa kara nondundugona. Age kwa dipagere vahompa vawo navenye ntani novantu navenye ngwendi moomu ga mu pangerere Jehova Karunga goVaisraeli. 41 Josuwa kwa va fundire kutundilira koKadesi-baraneya dogoro koGasa ntani momukunda nagunye gwaGoseni dogoro koNgibiyoni. 42 Josuwa kwa fundire vahompa navenye ava noyirongo yawo posikando simwe tupu, morwa Jehova Karunga goVaisraeli kwa va rwililire po. 43 Makura Josuwa ta tengura kumwe novagara woVaisraeli navenye kokamba zawo moGiligali.