Josuwa
7 Nye Vaisraeli kapi va zonagwire po yininke eyi ga va tanterere Karunga. Akana munaKarumi mutekurwaSabudi gomoruvharo rwaZera gomorudi rwaJuda, kwa veke yininke eyi va va tanterere va yi zonagure, makura Jehova ta handukire unene Vaisraeli.
2 Josuwa kwa tumine vagara va tunde moJeliko va ze koAi, sitata esi sa karera pepi naBete-aveni koUpumezuva waBeteli. Age kwa va tanterere asi: “Zendeni mu ka tare sitata.” Makura vagara owo tava zi, tava ka tara sitata saAi. 3 Apa va ka tengwire kwaJosuwa, awo kwa mu tanterere asi: “Kapisi hepero va ze ko vakwayita navenye, kuvhura va ze ko vakwayita 2 000 ndi 3 000 va ka kwate sitata saAi. Wa ha rorora vakwayita pokuvaninka navenye va ze ko, yeeyi amo kwa tunga mo vantu wovasesu tupu.”
4 Makura vakwayita wokusika koyiha 3 000 tava zi koAi. Nye awo kwa dukire apa vagara womoAi va wizire va ya va gwane. 5 Vagara womoAi kwa dipagere vakwayita 36; awo kwa va tjidire kutundilira perungavero lyositata dogoro koSebalimu.* Awo kwa va dipagere ngomu va gurumukire pondundu, ano eyi kwa ninkisire vantu va kankame ntani va zumbanese uradi wawo.
6 Makura Josuwa ta taura yikoverero yendi, ta linyongamene komeho zosikesa saJehova dogoro kongurova. Masimbi goVaisraeli nago kwa rugene yokulifana ntani awo kwa twikilire kulitura enoto ponomutwe. 7 Josuwa ta tanta asi: “Nane woo! Jehova Hompa Mupangeli gwanayinye, ove kwa ninka vantu navenye ava va rute mukuro gwaJorodana o ya tu gave koVaamoli yipo va ya tu dipage ndi? Hansa ngano kwa tokwere kutunga mesinya mwina* lyomukuro gwaJorodana! 8 Jehova, yisinke nani uyunga mokumona asi Vaisraeli vana duka nonkore dawo? 9 Apa ngava yi zuvha Vakanani novantu navenye ava va tunga mosirongo, awo ngava tu homokera va tu dipage ntani vantu ngava divara edina lyetu, ano edina lyoge ngali swauka.”
10 Makura Jehova ta limburura Josuwa asi: “Katuka! Morwasinke ono linyongamenene? 11 Vaisraeli va zona. Awo kapi va sikisa mo egwanekero* eli nava tanterere va sikise mo. Awo kwa veke yininke eyi na va tanterere va zonagure, tava yi horeke mokatji koyiweka yawo. 12 Yipo nye, Vaisraeli kapi ngava vhura kufunda nonkore dawo, awo ngava duka nonkore dawo ntani awo ngava va zonagura po. Ame kapi ngani kara none dogoro ngomu dipage muntu ogu na mu tantera mu dipage. 13 Zende o ka tantere vantu va liwapaikire. Ka va tantere asi: ‘Liwapaikireni* ezuva lyomungura, yeeyi Jehova Karunga goVaisraeli kuna tanta asi: “One Vaisraeli, mokatji keni muna kara mugara ogu mwa hepa kudipaga. Nsene mu dira kuyirugana, one kapi ngomu vhura kufunda nonkore deni. 14 Ngurangura, nkenye rudi ngaru ze komeho zaJehova kuliza nomapata gawo. Ano rudi oru nga horowora Jehova ngaru ze komeho kuliza nomapata gamo, ano epata eli nga horowora Jehova ngali ze komeho kuliza novantu ava va kara mo. 15 Ano muntu ogu ngava gwanena yininke eyi na mu tantera mu zonagure, va hepa kumuhwika kumwe nepata lyendi ntani noyiweka yendi nayinye, morwa age kapi ga sikisa mo egwanekero lyaJehova ntani age kwa rugana sininke sokuswaukisa moIsraeli.”’”
16 Makura ezuva eli lya kweme ko, Josuwa ta pinduka ngurangura zonene, ta tantere Vaisraeli va wize komeho kuliza nomarudi gawo, ano rudi rwaJuda yiro va horowere. 17 Age kwa ninkire mapata gomorudi rwaJuda ga wize komeho, ano epata lyaZera yilyo va horowere. Tava va ninki va ze komeho kuliza novantu ava va kara mepata olyo, makura Sabudi tava mu horowora. 18 Konyima, ta ninki vemembo lyaSabudi va ze komeho, makura Akana munaKarumi mutekurwaSebudi gomoruvharo rwaZera gomorudi rwaJuda tava mu horowora. 19 Makura Josuwa ta tantere Akana asi: “Na kanderere munange, fumadeka Jehova Karunga goVaisraeli pokutongonona eyi wa rugana. Na kanderere tantera nge eyi wa rugana, wa ha yi horekera nge.”
20 Akana ta tantere Josuwa asi: “Nyame na zona kwaJehova Karunga goVaisraeli, ano eyi yiyo na rugana: 21 Apa na mwene sikoverero sosiwa esi va ka kwete koSina noyisiliveli yonokilograma mbali,* nongorodo zonograma 500,* yipo na yi dowokerere makura tani yi gusa. Ame na yi vhumbika motende zange kumwe noyimaliwa.”
22 Makura Josuwa ta tumu vagara, awo tava duka va ze motende. Awo kwa ka gwene sikoverero esi va horeka kumwe noyimaliwa. 23 Awo tava gusa yininke oyo motende, tava yi twara kwaJosuwa ntani koVaisraeli navenye, makura tava yi tura komeho zaJehova. 24 Makura Josuwa noVaisraeli navenye tava gusa Akana munaZera noyisiliveli nosikoverero sosiwa nongorodo novana vendi wovagara nava wovakadi nonongombe dendi noyindongi yendi nononzwi dendi noyikombo yendi notende zendi ntani noyininke yendi nayinye, makura tava yi twara moMuramba gwaAkoro. 25 Josuwa ta tanta asi: “Morwasinke ono tu reterere udigu ou? Jehova ta ku retere udigu naina.” Makura Vaisraeli tava mu toona nomamanya kumwe nepata lyendi, ano konyima, tava va hwike. 26 Tava mu rundike mamanya, ano mamanya ogo simpe pogeli dogoro naina. Makura ehandu lyaJehova tali litura, eyi yiyo ava tumbwire evango olyo asi Muramba gwaAkoro* dogoro naina.