Mbilive zokuhova zaJohanesa
4 Vakwetu wokuhara, walye omu pura nkenye erongo* eli ali moneka ngwendi kuna kutunda kwaKarunga, nye hoveni kulikonakona, yipo mu dive nsene asi alyo kuna kutunda kwaKarunga, yeeyi mouzuni kwa kara mo vaporofete wovanzi woyimpempa.
2 Ngesi yimo nomu dimburura erongo lyokutunda kwaKarunga: Nkenye erongo eli ali tanta asi Jesus Kristusa kwa wizire pevhu ngomuntu, alyo kwa tunda kwaKarunga. 3 Nye nkenye erongo eli ali dili kutanta yininke oyo kuhamena Jesus, kapi lya tunda kwaKarunga. Erongo olyo kutunda konkore zaKristusa ogu mwa zuvha asi nga wiza, nayene nare ga wiza.
4 Vana vange wokuhara, one kwa hamena kwaKarunga ntani one kwa funda po vaporofete woyimpempa, morwa ogu ga hamena kweni ga pitakana Muzonaguli ogu ga hamena kouzuni. 5 Vaporofete ava woyimpempa kwa hamena kouzuni, yiyo ava uyungire yininke ya hamena kouzuni, eyi yiyo uzuni au va purakenene. 6 Ose kwa hamena kwaKarunga, nkenye ogu a ya diva Karunga kutupurakena, ogu ga dira kuhamena kwaKarunga, kapi atu purakene. Monkedi zangesi yimo atu dimburura erongo lyousili neli lyoyimpempa.
7 Vakwetu wokuhara, tu twikireni kulihara-hara, morwa eharo kwa tunda kwaKarunga ntani nkenye ogu ga hara mukwawo, munwaKarunga ntani ga diva Karunga. 8 Nye ogu ga dira kuhara mukwawo, kapi ga diva Karunga morwa Karunga yige eharo. 9 Karunga kwa tu likida asi ga tu hara apa ga tumine Munendi gelike a huru mouzuni, yipo ngatu ka gwane eparu kupitira mwendi. 10 Karunga kapi ga yi ruganene eyi morwa twa mu hara, nye morwa age ga tu hara, yiyo ga tumine Munendi a ya kare nzambo zokugusa po nonzo detu.
11 Vakwetu wokuhara, nsene asi yimo ga tu hara Karunga ngesi, nose twa hepa kulihara-hara. 12 Kwato ogu ga mona Karunga, nsene tu twikira kulihara-hara, Karunga nga twikira kukara nose, ntani ose ngatu likida nawa-nawa eharo lyendi. 13 Mokumona asi age kwa tu pa mpepo zendi, eyi kulikida asi ose kwa hamena kwendi, ano nage kwa hamena kwetu. 14 Ntani hena, ose twa mu mona ntani kuna kuyigavera umbangi asi Guhya kwa tuma Munendi, yipo a ya zowore uzuni. 15 Nkenye ogu ga pura asi Jesus MunwaKarunga, Karunga kuhamena kwendi ntani nage kuhamena kwaKarunga. 16 Ose twa yi diva asi Karunga kwa tu hara ntani twa yi pura.
Karunga yige eharo, ano ogu a likida nkenye apa eharo kuhama kwaKarunga ntani Karunga nage kuhama kwendi. 17 Monkedi zangesi, ose kulikida nawa-nawa eharo, yipo ngatu dire kukara nowoma mezuva lyompanguro, morwa ose kuna kuparuka mouzuni ngwendi moomu ga parukire mo age.* 18 Ava va kara neharo lyousili kapi va kara nowoma, eharo lyousili kutjida mo woma, morwa woma kutukondera mononkedi dokulisiga-siga, yipo nye ogu ga kara nowoma kapi ga kara neharo lyousili. 19 Ose kulikida eharo, morwa Karunga yige ga hova kutulikida eharo.
20 Nsene muntu a tanta asi “ga hara Karunga,” nye age ga nyenga mukwawo, age kuna kulikumbagera. Yeeyi ogu ga dira kuhara mukwawo ogu a mono, omu na vhura kuhara Karunga ogu ga dira kumona ngapi? 21 Ntani age kwa tu pangera asi ogu ga hara Karunga, ga hepa kuhara hena mukwawo.