Esira
4 Apa da yi zuvhire nonkore dovantu womorudi rwaJuda noru rwaMbenyameni asi vantu ava va ka tengura kounkwate kuna kutungurura ntembeli zaJehova Karunga goVaisraeli, 2 tava zi usimbu kwaSerubabeli nokomasimbi gomomazimo. Tava ka tanta asi: “Ninkeni tu mu vatere kutunga ntembeli, yeeyi nose kukarera* Karunga gweni ntani ose kwa mu zambera nonzambo kutunda momazuva gaEsara-hadoni hompa gwaAsiliya, ogu ga tu reta oku.” 3 Nye Serubabeli naJesuwa ntani nomasimbi gamwe gomomazimo goVaisraeli, tava va tantere asi: “One kapi va mu pulisira kutunga ntembeli zaKarunga gwetu. Nyose ngatu tungira Jehova Karunga goVaisraeli ntembeli ngwendi moomu ga tu pangera Koresi hompa gwaPeresiya.”
4 Makura vantu womosirongo tava twikire kudompesa nokutjilisa vantu womorudi rwaJuda yipo va hageke kutunga. 5 Awo kwa futire vapangeli womosirongo va hagekese po sirugana soVajuda sokutunga ntembeli. Awo kwa yi rugene posiruwo esi ga pangerere Koresi hompa gwaPeresiya dogoro posiruwo esi ga ya pangerere Daliusi hompa gwaPeresiya. 6 Apa ga tamekere kupangera Ahasurusi, awo kwa tjenge mbilive va rundire vantu womositata saJerusarema nava womoyitata yapeke yomoJuda. 7 Posiruwo saAretaserekesesi hompa gwaPeresiya, Bisaramu naMiteredate naTabeli ntani novakwawo vamwe kwa tjangerere hompa Aretaserekesesi mbilive. Awo kwa zi torokere moRuarameya pokuruganesa nondanda doRuarameya.*
8 * Mupangeli Rehumu nahamutjanga Simusayi kwa tjangerere hompa Aretaserekesesi mbilive va rundire vantu womoJerusarema. 9 (Azo kwa tundilire komupangeli Rehumu nahamutjanga Simusayi ntani novakwawo vamwe, kovapanguli novapangeli vamwe novahamutjanga novantu womoEreki, Vababironi novantu womoSusa ndi Vaeramu, 10 novantu vamwe ava ga twere hompa gononkondo Asenapara kounkwate nokuvaninka va tunge moyitata yomoSamaliya ntani novantu vamwe ava va tungire mesinya mwina lyomukuro.*) 11 Ezi kuna kara mbilive ezi va mu tuminine:
“Kwahompa Aretaserekesesi. Mbilive ezi kuna kutunda kovakareli woge ava va tunga mesinya omu lyomukuro. 12 Tuna hara kudivisa hompa asi Vajuda ava va tunda koge va wize koJerusarema, va ya sika moJerusarema. Awo kuna kutungurura sitata esi, ano vantu womositata esi varwanesi ntani vadona. Awo ntaantani va mane kudika makuma nokuwapukurura matateko gaso. 13 Tuna hara kudivisa hompa asi nsene nava mana kutungurura sitata esi nomakuma gaso, awo kapi ngava futa mutero ndi nkenye eyi nga va pura hompa, ano eyi ngayi ninkisa hompa a zumbanese emona lyomononzugopungwiro dendi. 14 Mokumona asi hompa yige a tu futu* ntani kapi tuna hara kumona yininke yoyidona yi horokere hompa, yipo nye, ose kuna kukutumina mbilive ezi tu ku divise, 15 yipo va konakone buke zehistoli omu va tjanga mauzera gokuhamena onyokokuru. Ove no gwana mobuke ozo asi vantu womositata esi vadona ntani kwa rwanesa vahompa novantu ava va tunga monomukunda. Amo kwa kara mo vantu ava ava rwanesa epangero kutunda kwanare. Eyi yiyo va si zonagwilira po sitata esi. 16 Ose tuna hara kudivisa hompa asi nsene nava mana kutungurura sitata esi nomakuma gaso, ove kapi ngo vhura kupangera vantu ava va tunga mesinya mwina lyomukuro.”
17 Hompa kwa tumine mbilive komupangeli Rehumu nahamutjanga Simusayi ntani novakwawo vamwe ava va tungire moSamaliya novantu ava va tungire mesinya mwina lyomukuro. Ano mombilive ozo, age kwa tente asi:
“Morokeni! 18 Mbilive ezi mwa tumina nge, vana zi resere nge nawa.* 19 Ame kwa pangera vakareli vange va rugane ekonakono ntani awo kwa gwana asi kutunda kwanare, vantu womositata esi kwa rwanesa vapangeli. 20 MoJerusarema kwa kere mo vahompa wononkondo ava ngava pangere vantu ava va tungire mesinya mwina lyomukuro ntani ngava va ninki va fute mutero noyininke yimwe eyi nga va pura hompa. 21 Yipo nye, tantereni vagara owo va hageke sirugana sawo, yipo sitata oso va dire kusitungurura dogoro ngani gave mpangera. 22 Ruganeni usimbu yininke eyi nina kumutantera, yipo yininke yoyidona yi dire kuhorokera hompa.”
23 Konyima zapa va reserere Rehumu nahamutjanga Simusayi novakwawo vamwe mbilive zokutunda kwahompa Aretaserekesesi, tava zi usimbu koJerusarema koVajuda nokuvaninka va hageke kutunga. 24 Sirugana sokutunga nzugo zaKarunga ezi za kere moJerusarema kwa si hagekesere po. Yirugana kwa hege dogoro momvhura zauvali zepangero lyaDaliusi hompa gwaPeresiya.