Esira

5 Ano muporofete Hagayi naSakaliya mutekurwaIdo, tava uyungisa Vajuda ava va kere moJerusarema nomoyitata yapeke yomoJuda, medina lyaKarunga goVaisraeli ogu ga va pitisilire. 2 Makura Serubabeli munaSeyalitiyeli ntani naJesuwa munaJehosadaka, tava tameke kutungurura nzugo zaKarunga, ezi za kere moJerusarema. Ano vaporofete vaKarunga kwa kere kumwe nawo ntani kwa va kwatesere ko. 3 Posiruwo oso, Tatenayi nguuru gomukunda gemesinya mwina lyomukuro* ntani naSetare-bosenayi novakwawo, tava wiza kwawo. Tava va pura asi: “Yilye ga mu pangera mu dike nzugo ezi ntani mu ture ko edi nonkambo?” 4 Tava va tantere hena asi: “Tu peni madina govantu ava vana kulihameka metungo eli.” 5 Nye Karunga kwa kere kumwe nomasimbi goVajuda ntani awo kapi va va hagekesere kudika. Tatenayi novakwawo kwa tumine mbilive kwaDaliusi ntani kwa ndindilire va va tantere mombilive eyi nava rugana.

6 Ezi kuna kara mbilive ga tumine Tatenayi nguuru gomomukunda gemesinya mwina lyomukuro ntani naSetare-bosenayi novakwawo ava va kere vapangeli momukunda gemesinya mwina lyomukuro. Awo kwa zi tumine kwahompa Daliusi 7 va mu tantere eyi yina kuhoroka, ano eyi yiyo va tjenge:

“Kwahompa Daliusi:

“Mbili zi kare nove! 8 Tuna hara kudivisa hompa asi ose kwa zire momukunda gorudi rwaJuda konzugo zaKarunga gomunene, yiyo twa ka zi gwana kuna kuzidika nomamanya gomanene ntani makuma kuna kugadika kumwe noyitji. Vantu kuna kurugana unene ntani sirugana kuna kuza komeho, morwa vantu vana litura mo unene. 9 Yiyo twa pulire masimbi gawo asi yilye ga va pangera va dike nzugo ozo ntani va ture ko nonkambo? 10 Ose kwa pulire hena madina govagara ava vana kupitisira sirugana sawo, yipo tu ga tjange tu ga ku tumine.

11 “Awo kwa tu limbwilire asi awo kukarera Karunga ogu a pangere meguru nepevhu ntani awo kuna kutungurura nzugo ezi ga dikire hompa gomunene goVaisraeli nomvhura dononzi dina ka pita. 12 Azo kwa zi zonagwire po Nebukadenesara hompa gwaBabironi goMukalidi, morwa ozinyakurwawo kwa handukisire Karunga ogu a pangere meguru, yiyo ga va geve momawoko gaNebukadenesara a va tware kounkwate koBabironi. 13 Nye momvhura zokuhova zepangero lyaKoresi hompa gwaBabironi, hompa Koresi kwa geve mpangera va tungurure nzugo ozo zaKarunga. 14 Hompa Koresi kwa gusire hena montembeli zomoBabironi yipako yongorodo neyi yosiliveli yomonzugo zaKarunga eyi ga gusire Nebukadenesara montembeli zomoJerusarema, a ka yi ture montembeli zomoBabironi, makura ta yi pe Sesibasara* ogu Koresi ga tulire a kare nguuru. 15 Koresi kwa tanterere Sesibasara a guse yipako oyo a yi tware montembeli ezi za kara moJerusarema ntani a ka tantere vantu va tungurure nzugo zaKarunga pevango eli za kere nare. 16 Makura Sesibasara yiyo ga wizire, ta ya tungu etateko lyonzugo zaKarunga moJerusarema ntani azo kwa twikira kuzidika kutunda opo dogoro ngesi, nye simpe kapi va mana kuzidika.

17 “Yipo nye hompa, nsene asi no yi kwatesa ko, ninka va papare monzugopungwiro zahompa zomoBabironi, yipo va tare nsene asi hompa Koresi kwa geve mpangera va tungurure nzugo zaKarunga moJerusarema, ano konyima o tu tumine eyi ono tokora ove hompa.”