Ehistoli lyokuhova
29 Makura hompa Ndafita ta tantere mbunga nazinye asi: “Munange Saromo ogu ga horowora Karunga, munona simpe ntani kapi ga kara noudivi, ano sirugana esi sinene, yeeyi age nga dika ntembeli zaJehova Karunga nye kapisi zovantu. 2 Ame kwa rugana unene ni pongaike yininke eyi ngava ruganesa konzugo zaKarunga gwange; ngorodo, siliveli, ngoporo, yivera, yitji, mamanya goonikisi nomamanya gokulikarera aga ngava tura nomunoko nomamanya gomanunu gokufuwisa nomamanya gondiro gokulisiga-siga ntani nomamanya gapeke* gomanzi. 3 Kugusa ko yininke nayinye eyi na pongaikira nzugo zokupongoka, ame tani gusa ngorodo nosisiliveli zange, ni zi gave konzugo zaKarunga gwange, morwa ame na hara nzugo zaKarunga gwange, 4 kukwatera mo ngorodo zonokilograma 102 600* ntani nosiliveli zonokilograma 239 400* zokukwita komakuma gononzugo, 5 nongorodo nosiliveli eyi ngava ruganesa varugani. Yilye ogu ana hara kugava uhwi kwaJehova naina?”
6 Makura masimbi gomomazimo nomasimbi gomomarudi goVaisraeli novagara ava ngava pitisire vantu mayovi nava ngava pitisire vantu mafere ntani nomasimbi aga ngaga ruganene hompa tava lizambere. 7 Awo kwa geve yininke eyi yipo ngava tungise ko nzugo zaKarunga gousili: ngorodo zonokilograma 171 000* noyimaliwa* 10 000 noyisiliveli yonokilograma 342 000* nongoporo zonokilograma 615 600* ntani noyivera yonokilograma 3 420 000.* 8 Nkenye ogu ga kere nomamanya gondiro kwa ga geve, va ga pungure monzugo omu ngava pungwire yininke yaJehova yomulyo. Ano Jehiyeli gomoruvharo rwaGeresoni yige nga zi pakere mbili. 9 Vantu kwa hefe apa va geve nonzambo demeharo lyavene, yeeyi awo kwa di geve kwaJehova nomutjima nagunye, ano hompa Ndafita nage kwa hefe unene.
10 Makura Ndafita ta hamberere Jehova komeho zovantu navenye. Age kwa tente asi: “Jehova Karunga gozinyakurwetu Israeli, ngano va kuhamberere dogoro narunye. 11 Efumano, nonkondo, uwa nouyerere yoge Jehova, yeeyi yininke nayinye yemeguru neyi yepevhu yoge. Uhompa woge Jehova ntani nyove mupangeli gwanayinye. 12 Emona nefumano koge a yi tundu ntani ove kupangera nayinye. Ove kwa kara nononkondo dononene ntani ove kuvhura kuzerura muntu nokugava nonkondo kovantu navenye. 13 Karunga gwetu, tatu ku pandura ntani tatu hamberere edina lyoge lyewa.
14 “Nye name novantu vange kwato mulyo ntani kapi tatu vhuru kugava nonzambo ngwendi dedi, yeeyi yininke nayinye kwa tunda koge ntani ose kuna ku pe yininke eyi twa gwana koge. 15 Ose vatjwayuki ntani vanayirongo tuna sikama komeho zoge ngwendi ozinyakurwetu. Eparu lyetu kwa fana ngwendi mundunduma ntani kwato ehuguvaro. 16 Karunga gwetu Jehova, emona nalinye eli tuna pongaike eli ngava tungisa nzugo ezi ngava fumadekera edina lyoge, koge lya tunda ntani nayinye kwa hamena koge. 17 Karunga gwange, ame nayi diva asi ove kukonakona mutjima gomuntu ntani kuhafera ulimburukwi wendi. Ame kwa gava yininke nayinye eyi nomutjima nagunye ntani nina hafa pokumona vantu woge kuna kugava nonzambo demeharo lyavene koge. 18 Jehova Karunga gozinyakurwetu Abirahamu naIsaka ntani naIsraeli, vatera vantu ava va twikire kukara nonkareso ezi ntani va kukarere nomutjima nagunye. 19 Ntani vatera munange Saromo a limburukwe nompangera doge nomavyukiso goge nonoveta doge nomutjima gwendi nagunye ntani a rugane yininke nayinye eyi, a tunge ntembeli* pokuruganesa yininke eyi na wapaika.”
20 Makura Ndafita ta tantere mbunga zovantu asi: “Hamberereni Karunga gweni Jehova.” Ano mbunga nazinye ta zi hamberere Jehova Karunga gozinyakurwawo ntani tava nyongamene Jehova nahompa. 21 Awo kwa twikilire kugava nonzambo kwaJehova ntani kwa geve nonzambo edi deswakerero kwaJehova dogoro ezuva lyokukwama ko: nontwedugona 1 000, nonzwi donongara 1 000 nononzwigona donongara 1 000, kumwe nononzambo dayo doyikunwa. Awo kwa gaverere po Vaisraeli navenye nonzambo dononzi. 22 Mezuva olyo, awo kwa hefe unene ntani kwa lire nokunwa komeho zaJehova. Awo kwa tulire hena Saromo munaNdafita a kare hompa sikando sauvali ntani kwa mu gwavekere komeho zaJehova yipo a kare mupitisili ntani naSadoko yipo a kare mupristeli. 23 Ano Saromo kwa hingilire posipundi saJehova souhompa a pinganene po oguhwe Ndafita. Age kwa mu tompokere, ano Vaisraeli navenye kwa mu limburukwire. 24 Masimbi nagenye novakwayita wononkondo ntani novana wovagara vahompa Ndafita kwa limburukwire hompa Saromo. 25 Ano Jehova kwa ninkire Vaisraeli va fumadeke unene Saromo ntani kwa mu zerwire unene kupitakana vahompa navenye womoIsraeli ava ngava pangere nare.
26 Ngesi yimo Ndafita munalsayi ga pangerere Vaisraeli navenye. 27 Age kwa pangerere moIsraeli nomvhura 40. Age kwa pangerere moHeburoni nomvhura ntambali, ano moJerusarema nomvhura 33. 28 Ndafita ta dogoroka konyima zokuparuka nawa siruwo sosire. Age kwa kere noyininke yoyinzi ntani vantu kwa mu fumadekere. Ano munendi Saromo ta mu kwama mouhompa. 29 Ano yininke eyi ga rugene hompa Ndafita kutunda ketamekero dogoro kehagero, kuyigwana moyininke eyi ga tjenge Samwere ogu nga pumbu, muporofete Natana ntani naGada ogu nga mono mamoneko, 30 kukwatera mo omu nga pangere, nonkondo edi ga kere nado neyi ya horokere posiruwo sendi ntani moIsraeli novahompa ava ngava pangere moyirongo yapeke.