Ehistoli lyokuhova
28 Makura Ndafita ta ninki masimbi gomoIsraeli aga gana kukwama ko ga ponge moJerusarema: masimbi gomomarudi, vapitisili wonombunga edi ngadi ruganene hompa, vagara ava ngava pitisire vantu mayovi nava ngava pitisire vantu mafere, masimbi aga ngaga pakere mbili yininke yahompa noyimuna yendi ntani novana vendi, kukwatera mo marenga novagara wononkondo ava va divire kurugana sirugana sawo. 2 Makura Ndafita ta katuka, ta tanta asi:
“One vakwetu, purakeneni. Ame kwa here kudika nzugo omu ngasi kara sikesa saJehova segwanekero ntani ezi ngazi kara ngwendi ulyatero waKarunga gwetu ntani ame kwa pongaikire yininke ni zi tunge. 3 Nye Karunga gousili kwa tanterere nge asi: ‘Ove kapi ngo tungira nge nzugo ezi ngava fumadekera edina lyange, yeeyi ove kwa rwa yita yoyinzi ntani kwa dipaga vantu wovanzi.’ 4 Nampili ngoso, Jehova Karunga goVaisraeli kwa horowora nge mepata lyotate, yipo ni kare hompa goVaisraeli dogoro narunye, yeeyi age kwa horowora rudi rwaJuda ru pitisire. Ano morudi rwaJuda kwa horowora mo epata lyotate ntani povana wotate wovagara nyame ga horowora ni pangere Vaisraeli. 5 Nampili ngomu Jehova ga pa nge vana wovanzi wovagara, age kwa horowora munange Saromo a hingire posipundi saJehova souhompa, yipo a pangere Vaisraeli.
6 “Age kwa tanterere nge asi: ‘Munoge Saromo yige nga tungira nge nzugo nomaharango gange, yeeyi ame kwa mu horowora a kare munange ntani ame ngani kara oguhwe. 7 Ame ngani ninka uhompa wendi u karerere dogoro narunye nsene nga limburukwa nompangera nonoveta dange ngwendi moomu ana kuyirugana.’ 8 Yipo nye, ame tani mu tantere komeho zoVaisraeli ndi vantu vaJehova ntani komeho zaKarunga gwetu asi: Kondjeni mu kwate egano ntani mu limburukwe nompangera daKarunga gweni Jehova, yipo ngomu twikire kutunga mosirongo esi sosiwa ntani ngava si pinge vana veni, ngava tunge mo dogoro narunye.
9 “Ano ove munange Saromo, wa hepa kudiva Karunga ogu ani karere ame oguho nokumukarera nomutjima goge nagunye ntani nomwenyo* goge nagunye, yeeyi Jehova kukonakona nomutjima dovantu ntani ga diva nkenye eyi ava gazara. Nsene o mu papara, ove ngomu gwana, nye nsene o mu siga, nage nga kusiga dogoro narunye. 10 Yeeyi Jehova kwa kuhorowora o mu tungire nzugo, yipo ngazi kare evango lyendi lyokupongoka. Kara nouradi ntani tameka kurugana.”
11 Makura Ndafita ta pe munendi Saromo efano lyonzugo zokuhwililira nononzugo dokulisiga-siga, kukwatera mo nonzugopungwiro nononzugo dekeguru nononzugo domonda ntani efano lyonzugo omu sa kere sikudumikiso.* 12 Age kwa mu pere hena mafano goyininke nayinye eyi ga mu likidire Karunga kupitira mompepo zendi, ngwendi mafano gomaharango gokonzugo zaJehova nononzugo nadinye dokulira nononzugo omu ngava pungwire yininke yomulyo yaKarunga gousili ntani nononzugo omu ngava pungwira yininke eyi va pongora;* 13 Age kwa mu tanterere hena omu va gaununa vapristeli noVarevhi noyirugana eyi ngava rugana konzugo zaJehova ntani noyiruganeso nayinye eyi ngava ruganesa konzugo zaJehova; 14 Age kwa mu tanterere mukumo gongorodo ezi ngava ruganesa yiruganeso yoyirugana yokulisiga-siga ntani mukumo gosisiliveli esi ngava ruganesa yiruganeso yoyirugana yokulisiga-siga; 15 Age kwa mu tanterere hena mukumo gomauzweko gonoramba gongorodo dokulisiga-siga ntani mukumo gomauzweko gonoramba dosisiliveli dokulisiga-siga nonoramba dako. Nkenye uzweko woramba nonoramba dako kwa kere nomukumo gokuliza nomu ngava u ruganesa; 16 Age hena kwa mu tanterere mukumo gongorodo goyitafura apa ngava tura nomboroto delikido ntani kwa mu tanterere hena mukumo gosisiliveli goyitafura yosiliveli, 17 mukumo gonoforoko dongorodo, marupasa gongorodo ntani nonkinda dononene dongorodo nomukumo gomarupasa nagenye gomanunu gongorodo ntani nomukumo gomarupasa nagenye gomanunu gosisiliveli. 18 Age hena kwa mu tanterere mukumo gongorodo zene-zene zosizambero soyitutumikidiso yedumba lyewa ntani zetemba, kutanta asi vakerubi wongorodo ava va zerwire mavava gawo, va kudumike sikesa saJehova segwanekero. 19 Ndafita kwa tente asi: “Jehova kwa vatera nge ntani kwa pa nge nondunge ni kwate egano mafaneko nagenye ntani ni ga tjange.”
20 Makura Ndafita ta tantere munendi Saromo asi: “Kara nouradi o kore ntani tameka kurugana. Wa ha tukuka ndi o tjire yuma, yeeyi Karunga gwange Jehova kumwe nove ana kara. Age kapi nga kuzumba ndi a kusigilire, nye age nga kara kumwe nove dogoro ngo mane yirugana nayinye yokonzugo zaJehova. 21 Nombunga dovapristeli noVarevhi dina liwapaikire kurugana konzugo zaKarunga gousili, kukwatera mo vagara ava va kara noudivi wokurugana nkenye sirugana nomasimbi ntani novantu navenye ava ngava kwama mavyukiso goge nagenye.”