Vahompa vauvali
21 Manase kwa kere nonomvhura 12 apa ga kere hompa ntani age kwa pangerere moJerusarema nomvhura 55. Edina lyozina kwa kere Hefusiba. 2 Age kwa rugene yininke yoyidona kosipara saJehova pokuhonena eyi ngadi rugana nomuhoko edi ga tjidire Jehova komeho zoVaisraeli. 3 Age kwa wapukwilire mavango aga ngava karere yikarunga yoyimpempa gokonondundu, aga va zonagwire po oguhwe Hisikiya ntani kwa dikilire Bara yizambero nongundi zokupongoka* ngwendi moomu ga yi rugene Ahaba hompa gwaIsraeli. Manase nga nyongamene nombungururu ntani nga di karere. 4 Age kwa dikire hena yizambero monzugo zaJehova, ezi ga tente Jehova asi: “MoJerusarema yimo ngava fumadekera edina lyange.” 5 Age kwa dikilire nombungururu yizambero momaharango gavali gokonzugo zaJehova. 6 Age kwa zembe munendi momundiro, nga ruganesa umpure, nga papara yidiviso ntani kwa horowere vantu va uyunge novafe nokupumba. Age kwa rugene yininke yoyidona unene kosipara saJehova a mu handukise.
7 Age kwa tulire monzugo efano lyongundi zokupongoka* eli ga rugene. Ano Jehova kwa tanterere Ndafita namunendi Saromo kuhamena nzugo ozo asi: “Monzugo ezi ntani mositata saJerusarema, esi na horowora mokatji komarudi goVaisraeli yimo ngava fumadekera edina lyange. 8 Nsene Vaisraeli ngava limburukwa nayinye eyi nava tantera, kukwatera mo Veta ezi ga va tanterere mukareli gwange Mosesa va limburukwe, ame kapi ngani va ninka hena va tunde mo mosirongo esi na pa ozinyakurwawo.” 9 Nye awo kapi va limburukwire ntani Manase kwa twikilire kuvapukisa pokuvaninkisa va rugane yininke yoyidona unene kupitakana eyi ngadi rugana nomuhoko edi ga zonagwire Jehova komeho zoVaisraeli.
10 Jehova kwa uyungire kupitira movaporofete vendi asi: 11 “Manase hompa gorudi rwaJuda kwa rugana yininke nayinye eyi yoyidona. Age kwa rugana yininke yoyidona kupitakana eyi ngava rugana Vaamoli ava va kere ko ntani kwa ninkisa vantu womorudi rwaJuda va zone pokukarera yikarunga yendi yokunyata. 12 Yipo nye, Jehova Karunga goVaisraeli kuna kutanta asi: ‘Ame kuna kuretera udigu sitata saJerusarema noyitata yapeke yomoJuda. Ano ayo ngayi tukukisa nkenye ogu nga yi zuvha. 13 Ame ngani tengeka sitata saJerusarema ngwendi moomu na tengekere sitata saSamaliya nepata lyaAhaba* ntani ame ngani zeresa sitata saJerusarema ngwendi moomu muntu a zeresa rupasa nokuruswika. 14 Ame ngani sigilira vantu vange ava va hupa po ntani ngani va gava momawoko gononkore dawo. Ano nonkore dawo ngadi va twara kounkwate ntani ngadi va hakana yininke yawo, 15 yeeyi awo kwa rugana yininke yoyidona kosipara sange ntani kwa handukisa nge kutunda apa ozinyakurwawo va tundire moEgipite dogoro naina.’”
16 Kugusa ko nzo ezi ga ninkisire vantu womorudi rwaJuda va zone pokurugana yininke yoyidona kosipara saJehova, Manase kwa dipagere hena vantu wovanzi wokudira nonzo mositata nasinye saJerusarema. 17 Ano yininke yimwe eyi ga rugene Manase noyininke nayinye yoyidona eyi ga rugene, kwa yi tjanga mobuke zehistoli lyovahompa worudi rwaJuda. 18 Konyima, Manase ta fu ngwendi ozinakuru makura tava mu horeke mosikunino saUsa, esi sa kara membo lyendi. Ano munendi Amoni ta mu kwama mouhompa.
19 Amoni kwa kere nonomvhura 22 apa ga kere hompa ntani age kwa pangerere moJerusarema nomvhura mbali. Edina lyozina kwa kere Mesuremeti munaHarusi gomoJotiba. 20 Age kwa twikilire kurugana yininke yoyidona kosipara saJehova ngwendi moomu ngava yi rugana oguhwe Manase. 21 Age kwa rugene nayinye eyi ngava rugana oguhwe ntani kwa twikilire kukarera nokunyongamena yikarunga yokunyata eyi ngava karere oguhwe. 22 Yipo nye, age kwa sigire Jehova Karunga gozinakuru ntani kapi ga limburukwire Jehova. 23 Konyima, vakareli vendi tava mu gendi konhi makura tava mu dipagere membo lyendi. 24 Nye vantu womosirongo tava dipaga navenye ava va gendere hompa Amoni konhi, makura tava ninki munendi Josiya a mu kwame mouhompa. 25 Ano yininke yimwe eyi ga rugene Amoni, kwa yi tjanga mobuke zehistoli lyovahompa worudi rwaJuda. 26 Makura tava mu horeke mosikunino saUsa, ano munendi Josiya ta mu kwama mouhompa.