Vahompa vauvali
19 Apa ga yi zuvhire eyi hompa Hisikiya, ta taura yikoverero yendi ntani ta dwara nsako, makura ta zi konzugo zaJehova. 2 Konyima ta tumu Eliyakimu ogu nga gendesa mbara, hamutjanga Sebuna ntani novapristeli wovakurona va ze komuporofete Jesaya munaAmosi awo vana dwara nonsako. 3 Awo kwa ka mu tanterere asi: “Hisikiya kuna kutanta asi: ‘Eli kuna kara ezuva lyoudigu lyokutuswaukisa nokutufisa nomuga. Yeeyi siruwo sokuhampuruka vanona sina siki mo, nye kwato nonkondo dokuvahampuruka. 4 Nampo Karunga goge Jehova na rugana ko yuma kweyi ana uyunga Rabusake, ogu hompa gwaAsiliya ga tuma yipo a ya swaure Karunga goMunamwenyo ntani nga mu futise Karunga goge Jehova morwa eyi ana tanta. Yipo nye, kandererera po vantu ava va hupa mo mosirongo esi.’”
5 Konyima zapa vakareli vahompa Hisikiya va tanterere Jesaya mbudi ezi vava tumine, 6 Jesaya ta va tantere asi: “Ka tantereni hompa gweni asi: ‘Jehova kuna kutanta asi: “Wa ha tukuka, morwa nonkango edi ono zuvhu edi vana uyunga vakareli vahompa gwaAsiliya ava vana swaura nge. 7 Ame ngani tjindja magazaro gendi yipo asi apa nga zuvha mbudi, nga tengure kosirongo sendi ntani ame ngani mu ninka va mu dipage norufuro mosirongo sendi.”’”
8 Konyima zapa Rabusake ga zuvhire asi hompa gwaAsiliya ana tundu koRakisi, Rabusake ta tengura kwendi ta ka mu gwana kuna kurwisa sitata saLibuna. 9 Hompa gwaAsiliya ta zuvhu asi Tirehaka hompa gwaEtiyopiya ana wiza a ya mu rwise, makura ta tumu hena vantu kwaHisikiya, ta va tantere asi: 10 “Ka tantereni Hisikiya hompa gorudi rwaJuda asi: ‘Wa ha pulisira Karunga goge ogu wa huguvara a ku kumbagere pokutanta asi: “Sitata saJerusarema kapi ngava si gava momawoko gahompa gwaAsiliya.” 11 Ove wa zuvha omu va zonagura po yirongo vahompa vaAsiliya. Ove nyove nye ngava dira kuvhura kuzonagura po ndi? 12 Yikarunga yonomuhoko eyi va zonagwire po omama, ya va poperere ndi? Kupi vana kara vantu womoGosani naHarani naResefu noVaedeni ava va tungire moTera-sara? 13 Kupi ana kara hompa gwaHamati nahompa gwaArupadi ntani nahompa goyitata yaSefaravayimu naHena ntani Ivha?’”
14 Hisikiya makura ta gusa nombilive kovantu ava ga tumine hompa, ta di resa. Konyima, ta zi konzugo zaJehova ta ka di tura komeho zaJehova. 15 Makura Hisikiya ta kanderere kwaJehova asi: “Jehova Karunga goVaisraeli, ove ogu wa hingira posipundi souhompa keguru* lyoVakerubi. Ove nyovelike Karunga gousili gonomuhoko nadinye* depevhu. Ove nyove wa sita eguru nevhu. 16 Jehova purakena o zuvhe ntani Jehova pahuka o mone. Purakena nonkango edi ana uyunga Senakelibu a swaure Karunga goMunamwenyo. 17 Jehova nove wa yi diva asi vahompa vaAsiliya kwa zonagura nomuhoko kumwe noyirongo yawo. 18 Ntani awo kwa hwika yikarunga yawo morwa ayo kapisi yikarunga yousili, nye yikarunga eyi va rugana nomawoko, eyi va honga ntani yomamanya. Eyi yiyo va yi zonagwilire po. 19 Yipo nye, Karunga gwetu Jehova, tuna kanderere tu popera mokuwoko kwendi, yipo nomuhoko nadinye* depevhu nga di yi dive asi ove nyovelike Karunga Jehova.”
20 Jesaya munaAmosi makura ta tumu mbudi kwaHisikiya asi: “Jehova Karunga goVaisraeli kuna kutanta asi: ‘Ame nina zuvhu eyi ono kanderere kuhamena Senakelibu hompa gwaAsiliya. 21 Jehova kuna kuuyunga kuhamena hompa gwaAsiliya asi:
“Mukadona gomoSiyoni ana kunyenge ntani kuna kukuzora.
Mukadona gomoJerusarema kuna kulipuka komutwe morwa nyove.
22 Yilye ogu ono sindagura ntani ono swaura?
Yilye ogu ono handukire
ntani ono linenepekere?
Karunga gokupongoka gwaIsraeli yige ono yi rugana eyi!
23 Kupitira movakareli woge, ove kwa swaura Jehova asi:
‘Ame ngani ronda nomatemba gange gomanzi goyita
keguru lyonondundu
dokoure domoLibanoni.
Ngani teta yitji yako yoyiwa yosedeli noyitji yako yapeke* yoyiwa.
Ngani za monomusitu dako dokoure, monomusitu dokupata.
24 Ame ngani sima matope nokunwa mema gomoyirongo yapeke;
ngani pwilika marunone* gomoEgipite nonompadi dange.’
25 Nani kapi wa yi zuvha? Ayo nare ya pwa kutokora.*
Ame nare na yi wapaika,
ano ngesi tani yi ninki yi horoke.
Ove ngo zonagura yitata eyi va kundurukida nomakuma, noku yi ninka yi kare nondambo domamanya.
26 Vantu vamo kwato ogu ngava vatera;
awo ngava kankama ntani ngava va swaukisa.
Awo kapi ngava kara nononkondo ngwendi yimeno ntani ngwendi wayi wosinamahako,
ngwendi wayi ou au mene peguru lyonzugo, ou azi kukutike mpepo zokoUpumezuva.
27 Ame na diva nayinye eyi o rugana, apa o hingire, apa o zi, apa o ka tengura
ntani napa o handukire nge,
28 yeeyi ame na mona ehandu lyoge nokuzuvha omu o zogerere.
Yipo nye, ame tani kutura erowo momazuru goge ntani sitoma mokana koge,
yipo ni kutengwide oku wa tunda.”
29 “‘Ano ngesi yimo ngo yi diva* asi eyi nina uyunga usili: Mvhura ezi, ove ngo lya eyi ya mena pwayene;* momvhura zauvali ove ngo lya mbuto ezi nga zi mena pwazene; nye momvhura zautatu; ove ngo kuna mbuto ntani ngo zangura. Ove hena ngo tapeka yitji yomandjembere nokulya enyango lyako. 30 Vantu womorudi rwaJuda ava ngava hupa po, ngava fana ngwendi sitji sonondandani donongwa esi asi yimi enyango lyenzi. 31 Yeeyi moJerusarema, nga mu tunda vantu ava ngava paruka ntani koNdundu zaSiyoni nga kutunda vantu ava ngava paruka. Jehova Mupitisili govakwayita vemeguru yige nga yi rugana eyi morwa upampi wendi.
32 “‘Yipo nye, eyi yiyo ana tanta Jehova kuhamena hompa gwaAsiliya:
“Age kapi nga hwilira mositata esi
ndi a ponye mo sikutji
ndi a si homokere nosilikandwiso
ndi a si kundurukide nonondambo devhu yipo a si homokere.
33 Age nga tengura monzira ezi nga wiza;
kapi nga hwilira mositata esi,” yimo ana kutanta Jehova.
34 “Ame ngani popera sitata esi nokusizowora morwa edina lyange
ntani morwa eyi na tumbwidira mukareli gwange Ndafita.”’”
35 Masiku ogo muengeli gwaJehova ta wiza, ta dipaga vakwayita 185 000 mokamba zoVaasiliya. Apa va pindukire vantu ngurangura zonene, tava ya gwana tupu yimpu. 36 Makura Senakelibu, hompa gwaAsiliya ta katuka a tengure koNinivhe ntani ta ka kara kooko. 37 Ezuva limwe apa ga zire a ka linyongamene montembeli zakarunga gwendi Nisiroko, vana vendi oAdaramereki naSaresere tava mu dipaga norufuro. Makura tava tjwayukire kosirongo saArarati. Ano munendi Asara-hadoni ta mu kwama mouhompa.