Ehistoli lyauvali
24 Jehoyasi kwa kere nonomvhura ntambali apa ga kere hompa ntani age kwa pangerere moJerusarema nomvhura 40. Edina lyozina kwa kere Sibiya gomoBere-seba. 2 Jehoyasi kwa twikilire kurugana yininke youhunga kosipara saJehova siruwo nasinye esi ga parukire mupristeli Jehoyada. 3 Jehoyada kwa pere Jehoyasi vakadi vavali a kware ntani age kwa ya kere novana wovagara nava wovakadi.
4 Konyima zosiruwo, Jehoyasi kwa here kuwapukurura nzugo zaJehova. 5 Makura ta zigida vapristeli noVarevhi va ponge, ta va tantere asi: “Zendeni koVaisraeli navenye moyitata yorudi rwaJuda mu ka pongaike yimaliwa, yipo ngava wapekese ko nzugo zaKarunga gweni nkenye mvhura ntani mwa hepa kuyirugana pangenderera.” Nye Varevhi kapi va rugene usimbu eyi ga va tanterere. 6 Makura hompa ta zigida Jehoyada mukurona govapristeli, ta mu pura asi: “Morwasinke wa dilira kutantera Varevhi va ka simbe mutero gokupongoka kovantu womoJerusarema nava womoyitata yapeke yomoJuda, ngwendi moomu ga yi pangerere Mosesa mukareli gwaJehova? Mosesa kwa pangerere Vaisraeli va gave mutero gokupongoka yipo ngava gu ruganese monkongoronzugo omu mwa kere madiworokeso. 7 Yeeyi vana wovagara womukadi gomudona Ataliya kwa za monzugo zaKarunga gousili yiyo va ka vaka yininke nayinye yokupongoka yomonzugo zaJehova va ka yi ruganese mokukarera Bara.” 8 Makura vantu tava rugana sikesa ngwendi moomu ga va pangerere hompa ntani tava si tura ponze pevero lyonzugo zaJehova. 9 Konyima, tava divisa vantu womoJerusarema nava womoyitata yapeke yomoJuda, va gave kwaJehova mutero gokupongoka kuliza noveta ezi ga pere Vaisraeli Mosesa mukareli gwaKarunga gousili momburundu. 10 Vapangeli novantu navenye kwa hefe ntani awo kwa twikilire kutura yigava mosikesa dogoro tasi zura.*
11 Varevhi apa ngava twara sikesa kwahompa makura va mone asi mosikesa muna zura yimaliwa, hamutjanga gwahompa ntani ogu nga vatere mukurona govapristeli, ngava wiza va ya guse yimaliwa mosikesa nokusitengwidira pevega lyaso. Awo ngava yi rugana eyi nkenye ezuva ntani awo kwa pongaikire yimaliwa yoyinzi. 12 Makura hompa naJehoyada ngava gava yimaliwa oyo kovantu ava ngava tarere yirugana yokonzugo zaJehova. Makura awo ngava futu vantu ava ngava tete mamanya ntani novahongi, yipo va wapukurure nzugo zaJehova. Awo hena ngava futu vantu ava ngava rugana noyivera ntani nongoporo, yipo va wapukurure nzugo zaJehova. 13 Ano vantu ava ngava tarere sirugana tava tameke nosirugana sokuwapukurura nzugo zaKarunga ntani sirugana kwa gendere po nawa mepitisiro lyawo. Makura nzugo zaKarunga gousili tazi pu kuwapukurura, tazi fana ngwendi moomu za fene pomuhowo ntani azo kwa korere. 14 Apa va mene sirugana sawo, tava twara yimaliwa eyi ya hupire po kwahompa ntani kwaJehoyada, makura tava yi ruganesa mokurugana yipako yomonzugo zaJehova ngwendi eyi ngava ruganesa vapristeli neyi ngava ruganesa mokugava nonzambo, nonkinda ntani yiruganeso yongorodo neyi yosiliveli. Ano vantu ngava gava nonzambo deswakerero konzugo zaJehova nkenye ezuva, siruwo nasinye esi ga parukire Jehoyada.
15 Jehoyada kwa parukire nawa siruwo sosire ntani kwa kurupire. Ano apa ga kere nonomvhura 130, ta dogoroka. 16 Makura tava mu horeke moSitata saNdafita oku ngava horeke vahompa, morwa age kwa ruganenene Vaisraeli yininke yoyiwa kukwatera mo Karunga nonzugo zendi.
17 Konyima zapa ga fire Jehoyada, vapangeli womoJuda tava wiza kwahompa, tava ya mu nyongamene, ano age ta va purakene. 18 Awo kwa sigilire nzugo zaJehova Karunga gozinyakurwawo, tava tameke kukarera nongundi dokupongoka* ntani noyikarunga, ano eyi kwa ninkisire Karunga a handukire vantu womoJerusarema nava womoyitata yapeke yomoJuda. 19 Jehova kwa twikilire kuvatumina vaporofete yipo va tengure kwendi ntani awo kwa twikilire kuvarondora, nye awo kapi va va purakenene.
20 Mpepo zaKarunga tazi gwana Sakaliya munamupristeli Jehoyada, makura ta zi a ka sikame komeho zovantu, ta tanta asi: “Karunga gousili kuna kutanta asi: ‘Morwasinke omu dili kusikisa mo nompango daJehova? One kapi ngayi mu tompoka! Mokumona asi one mwa siga Jehova, nage nga mu siga.’” 21 Nye vantu tava mu liyongo makura tava mu dipaga nomamanya meharango lyonzugo zaJehova ngwendi moomu ga va pangerere hompa. 22 Yipo nye, hompa Jehoyasi kapi ga diworokere eharo lyanarunye eli ga mu likidire Jehoyada oguhwe vaSakaliya. Age kwa dipagere munendi Sakaliya ogu ga uyungire komeho a fe asi: “Jehova ngano nga ku tengwide kuwoko kweyi ono kurugana.”
23 Ketamekero lyomvhura, vakwayita woVasiliya kwa wizire va ya rwise Jehoyasi ntani awo kwa homokerere vantu womoJerusarema nava womoyitata yapeke yomoJuda. Awo kwa dipagere vapangeli navenye ntani kwa tumine emona lyawo nalinye kwahompa gwaDamasikusi. 24 Nampili ngomu vakwayita woVasiliya va kere wovasesu, Jehova kwa geve vakwayita woVajuda ava va kere wovanzi momawoko gawo, morwa awo kwa sigire Jehova Karunga gozinyakurwawo. Yipo nye, Vasiliya kwa tengekere Jehoyasi. 25 Apa va mu sigire (awo kwa mu sigire age ana remana unene*), vakareli vendi tava mu gendi konhi morwa age kwa dipagere vana* womupristeli Jehoyada. Awo kwa mu dipagerere pombete zendi makura tava ka mu horeka moSitata saNdafita, nye kapi va mu horekere mevango omu ngava horeke vahompa.
26 Vagara ava va mu gendere konhi kuna kara: Sabadi munaSimeyati mukadi goMuamoni naJehosabadi munaSimiliti mukadi goMumowaba. 27 Mauzera gokuhamena vana vendi nomarondoro aga ga gwene ntani nomu va wapukwilire nzugo zaKarunga gousili, kwa yi tjanga mobuke zovahompa. Ano munendi Amasiya yige ga mu kweme mouhompa.