Ehistoli lyauvali
23 Momvhura zauntambali, Jehoyada kwa likidire uradi ntani kwa tulisire po egwanekero* kumwe novagara ava ngava pitisire vantu mafere. Awo kuna kara: Asaliya munaJerohamu, Isimayeli munaJehohanani, Asaliya munaObedi, Maseya munaAdaya naElisafata munaSikili. 2 Makura tava zi mosirongo nasinye saJuda, tava pongaike Varevhi ava va kere moyitata yorudi rwaJuda ntani nomasimbi gomomazimo goVaisraeli. Apa va ka sikire moJerusarema, 3 mbunga nazinye ta zi tulisa po egwanekero kumwe nahompa konzungo zaKarunga gousili, ano konyima Jehoyada tava tantere asi:
“Munahompa yige nga pangera ngwendi moomu ga uyungire Jehova kuhamena vana vaNdafita. 4 Eyi yiyo ngomu rugana: Mwa hepa kugaununa vapristeli noVarevhi ava ngava rugana mEsabata monombunga ntatu. Mbunga zokuhova ngazi sikama pomavero zi nomene; 5 mbunga zauvali ngazi sikama kombara zahompa, ano mbunga zautatu ngazi sikama pErungavero lyEtateko ntani vantu navenye ngava sikame momaharango gokonzugo zaJehova. 6 Kapisi ngomu pulisire nkenye ogu a hwilire monzugo zaJehova kugusa ko vapristeli noVarevhi ava ngava rugana mezuva olyo. Awo kuvhura ngava hwilire morwa awo kwa pongoka, ano vantu navenye wokuhupa ko va hepa kusikisa mo veta zaJehova pokukara ponze. 7 Varevhi ngava takamese hompa komaruha nagenye ntani nkenye ogu nga kwaterere yirwiso yendi. Nkenye ogu nga hetekera ko kuhwilira monzugo, ngomu mu dipage. Ngomu kare nahompa nkenye oku nga za.”
8 Varevhi novantu navenye womorudi rwaJuda, tava rugana moomu ga va tanterere mupristeli Jehoyada. Makura nkenye ogu ta gusa vantu vendi ava va rugene mEsabata kumwe nava va dilire kurugana mEsabata, yeeyi mupristeli Jehoyada kapi ga va pulisilire va hageke sirugana sawo sokontembeli. 9 Makura mupristeli Jehoyada ta pe vagara ava ngava pitisire vantu mafere magonga, yilikandwiso yoyinunu* ntani yilikandwiso yokuliudinga yahompa Ndafita, eyi ya kere monzugo zaKarunga gousili. 10 Makura ta tantere vantu va sikame pomavango gawo awo vana kwaterere yirwiso yawo. Awo kwa sikeme kutundilira koMbindakano zonzugo dogoro koMuzogo gonzugo. Vamwe kwa sikeme pepi nosizambero, ano vamwe pepi nombara, va kundurukide hompa. 11 Makura tava pwagesa munahompa ponze, tava mu dwareke nkata ntani tava mu pe madiworokeso,* makura tava mu tura a kare hompa. Ano Jehoyada novana vendi tava mu gwaveke, tava tanta asi: “Hompa a kare nomwenyo gomure!”
12 Apa ga zuvhire Ataliya vantu kuna kuduka ntani kuna kuhamberera hompa, ta zi usimbu kovantu ava va kere konzugo zaJehova. 13 Makura Ataliya ta mono hompa ana sikama pepi nongundi* ezi za kere pevero. Vapangeli novasiki wonombendo kwa kere kumwe nahompa ntani vantu navenye womosirongo kwa hefe nokufuda nombendo. Ano vantu ava ngava dimbi ava va kere noyininke yokusikisa, kwa pitisilire vakwawo va hamberere hompa. Makura Ataliya ta taura yikoverero yendi, ta zigire asi: “Urwanesi! Urwanesi!” 14 Nye mupristeli Jehoyada ta tantere vagara ava ngava pitisire vantu mafere, ava ngava pitisire vakwayita asi: “Mu guseni mo mokatji kovakwayita. Ano nkenye ogu na mu kwama va hepa kumudipaga norufuro!” Yeeyi age kwa tente asi: “Mwa ha mu dipagera monzugo zaJehova.” 15 Makura tava mu kwata, ano apa va ka sikire pErungavero lyoNonkambe lyomombara zahompa, tava mu dipagere poopo.
16 Konyima, Jehoyada ta tulisa po egwanekero kumwe novantu navenye ntani nahompa asi ngava twikira kukara vantu vaJehova. 17 Konyima zoyo, vantu navenye tava zi kontembeli zaBara, tava ka zi zonagura po noyizambero yendi ntani tava bomagura mafano gendi. Awo hena kwa dipagere Matani mupristeli gwaBara komeho zoyizambero. 18 Makura Jehoyada ta ninki vapristeli noVarevhi va pakere mbili nzugo zaJehova. Ndafita kwa ninkire vapristeli owo noVarevhi va rugane monombunga konzugo zaJehova, yipo va gave nonzambo deswakerero kwaJehova kuliza nomu va yi tjanga moVeta zaMosesa. Ndafita kwa tente asi va yi rugane noruhafo ntani va dimbe. 19 Age kwa tulire vanomeni pomavero gokonzugo zaJehova yipo va kondere vantu wokudira kukuhuka. 20 Age kwa ninkire vagara ava ngava pitisire vantu mafere, vanekuto, vapangeli ntani vantu navenye womosirongo va sindikire hompa a tunde konzugo zaJehova. Awo kwa pitilire kerungavero lyere, tava ka sika kombara zahompa ntani tava ninki hompa a hingire posipundi souhompa. 21 Vantu navenye womosirongo kwa hefe ntani mositata kwa kere mo mbili, yeeyi awo kwa dipagere Ataliya norufuro.