Vahompa vauvali
14 Amasiya munaJehoyasi hompa gorudi rwaJuda kwa tamekere kupangera momvhura zauvali zepangero lyaJehoyasi munaJehoyahasi hompa gwaIsraeli. 2 Age kwa kere nonomvhura 25 apa ga kere hompa ntani kwa pangerere moJerusarema nomvhura 29. Edina lyozina kwa kere Jehoyadini gomoJerusarema. 3 Age kwa twikilire kurugana yininke youhunga kosipara saJehova, nye kapisi ngwendi moomu va yi rugene ozinakuru Ndafita. Age kwa honenene nayinye eyi va rugene oguhwe Jehoyasi. 4 Nye nampili ngoso, mavango gokukarera yikarunga yoyimpempa gokonondundu kapi va ga zonagwire po ntani vantu kwa twikilire kugava nonzambo komavango ogo. 5 Apa ga ya kere nononkondo dononene, ta dipaga vakareli vendi ava va dipagere oguhwe, ava va kere hompa. 6 Nye age kapi ga dipagere vana vawo ngwendi moomu va yi tjenge moVeta zaMosesa. MoVeta ozo, Jehova kwa tente asi: “Vaguhya kapisi ngava va dipage morwa yirugana yovana vawo, ano vanona kapisi ngava va dipage morwa yirugana yovaguhya vawo. Nye nkenye muntu va hepa kumudipaga morwa nzo zamwene.” 7 Age kwa dipagere Vaedomu 10 000 moMuramba goMungwa, makura ta kwata sitata saSera, ta si ruku Jokiteli ano edina olyo yilyo ava si zigidisa dogoro naina.
8 Makura Amasiya ta tumu vantu kwaJehoyasi munaJehoyahasi zaJehu hompa gwaIsraeli va ka mu tantere asi: “Wiza tu ya rwe.”* 9 Jehoyasi hompa gwaIsraeli ta tumu mbudi ezi kwaAmasiya hompa gorudi rwaJuda asi: “Sihwa somega somoLibanoni kuna tumu mbudi kositji sosedeli somoLibanoni asi: ‘Ninka munoge gomukadi a kware munange gomugara.’ Nye sikasama somoLibanoni yiyo sina piti kosihwa somega makura yiyo sina si lyatanga. 10 Ove kwa funda Vaedomu yiyo ono kulinenepeka. Hafera efumano lyoge, nye kara mombara zoge. Morwasinke ono kulipaparera udigu nokuninkisa vantu womorudi rwaJuda va va funde kumwe nove?” 11 Nye Amasiya kapi ga yi purakenene.
Makura Jehoyasi hompa gwaIsraeli ta zi a ka rwise Amasiya hompa gorudi rwaJuda moBete-semesi, sitata sorudi rwaJuda. 12 Vaisraeli tava fundu vantu womorudi rwaJuda, makura nkenye ogu ta dukire kembo lyendi.* 13 Jehoyasi hompa gwaIsraeli ta kwata Amasiya munaJehoyasi zaAhasiya moBete-semesi. Amasiya kwa kere hompa gorudi rwaJuda. Apa va ka sikire moJerusarema ta ka bomona ekuma lyaJerusarema, kutundilira kErungavero lyaEfurayimi dogoro kErungavero lyemEkovhu. Kutunda kErungavero lyaEfurayimi dogoro kErungavero lyemEkovhu kwa kere sinano sokusika ponometa 178.* 14 Jehoyasi kwa gusire ngorodo nazinye nosisiliveli ntani noyipako nayinye eyi ga gwene monzugo zaJehova nomononzugopungwiro domombara zahompa. Age kwa gusire hena nonkwate makura ta tengura koSamaliya.
15 Ano yininke yimwe eyi ga rugene Jehoyasi nononkondo edi ga kere nado ntani nomu ga rwisire Amasiya hompa gorudi rwaJuda, kwa yi tjanga mobuke zehistoli lyovahompa woVaisraeli. 16 Makura Jehoyasi ta fu ngwendi ozinakuru, tava mu horeke moSamaliya kumwe novahompa woVaisraeli, ano munendi Jerobiyamu* ta mu kwama mouhompa.
17 Kutunda apa ga fire Jehoyasi munaJehoyahasi hompa goVaisraeli, Amasiya munaJehoyasi hompa gorudi rwaJuda kwa parukire nomvhura 15. 18 Ano yininke yimwe eyi ga rugene Amasiya, kwa yi tjanga mobuke zehistoli lyovahompa worudi rwaJuda. 19 Konyima, vantu vamwe womoJerusarema tava mu rwanesa makura age ta dukire koRakisi, nye awo tava tumu ko vagara vamwe koRakisi, tava ka mu dipagera kooko. 20 Makura tava tura simpu sendi metemba eli da kokere nonkambe, tava ka mu horeka oku va horeka ozinakuru moJerusarema, Sitata saNdafita. 21 Makura vantu womorudi rwaJuda tava gusa Asaliya* ogu ga kere nonomvhura 16, tava mu tura a kare hompa a pinganene po oguhwe Amasiya. 22 Age kwa kwete sitata saErate, tasi kara hena sitata sorudi rwaJuda ntani ta si tungurura, konyima zapa ga fire hompa* ngwendi ozinakuru.
23 Momvhura 15 zepangero lyaAmasiya munaJehoyasi hompa gorudi rwaJuda, Jerobiyamu munaJehoyasi hompa goVaisraeli, ta kara hompa moSamaliya ntani age kwa pangerere nomvhura 41. 24 Age kwa twikilire kurugana yininke yoyidona kosipara saJehova. Age kwa kweme sihonena sosidona saJerobiyamu munaNebata, ogu ga ninkisire Vaisraeli va zone. 25 Age kwa tengwidilire po mururani goVaisraeli gwanare kutundilira koRebo-hamati* dogoro kEfuta lyaAraba* ngwendi moomu ga tente Jehova Karunga goVaisraeli kupitira momukareli gwendi Jona munaAmitayi, muporofete gomoGata-hefere. 26 Jehova ga mwene omu ngava hepa Vaisraeli. MoIsraeli kapi mwa kere muntu gokuvhura kuvavatera ntani kapi mwa kere nampili vantu wokudira epopero nava wokudira nonkondo. 27 Nye Jehova kwa tumbwidilire Vaisraeli asi kapi nga va zonagwilira po pevhu. Yipo nye, age kwa ruganesere Jerobiyamu munaJehoyasi a va popere.
28 Ano yininke yimwe eyi ga rugene Jerobiyamu nononkondo edi ga kere nado nomu ga rwire yita ntani nomu ga ninkire sitata saDamasikusi nesi saHamati yi kare hena yitata yorudi rwaJuda moIsraeli, kwa yi tjanga mobuke zehistoli lyovahompa woVaisraeli. 29 Makura Jerobiyamu ta fu ngwendi ozinakuru ava va kere vahompa moIsraeli, ano munendi Sakaliya ta mu kwama mouhompa.