Vahompa vauvali

15 Momvhura 27 zepangero lyaJerobiyamu* hompa gwaIsraeli, Asaliya* munaAmasiya hompa gorudi rwaJuda ta kara hompa. 2 Age kwa kere nonomvhura 16 apa ga kere hompa ntani kwa pangerere moJerusarema nomvhura 52. Edina lyozina kwa kere Jekoliya gomoJerusarema. 3 Age kwa twikilire kurugana yininke youhunga kosipara saJehova ngwendi moomu va yi rugene oguhwe Amasiya. 4 Nye nampili ngoso, mavango gokukarera yikarunga yoyimpempa gokonondundu kapi va ga zonagwire po ntani kwa twikilire kugava nonzambo komavango ogo. 5 Jehova kwa mu ninkire a kare noyingondwe dogoro konomfa dendi. Age kwa likarerere monzugo zagelike, ano munendi Jotamu yige nga pakere mbili mbara* zahompa ntani nga pangura vantu womosirongo. 6 Ano yininke yimwe eyi ga rugene Asaliya, kwa yi tjanga mobuke zehistoli lyovahompa worudi rwaJuda. 7 Konyima, Asaliya ta fu ngwendi ozinakuru ntani tava mu horeke oku va horeka ozinakuru, moSitata saNdafita. Ano munendi Jotamu ta mu kwama mouhompa.

8 Momvhura 38 zepangero lyaAsaliya hompa gorudi rwaJuda, Sakaliya munaJerobiyamu ta kara hompa goVaisraeli moSamaliya ntani age kwa pangerere makwedi ntazimwe. 9 Age kwa rugene yininke yoyidona kosipara saJehova ngwendi moomu va yi rugene ozinakuru. Age kwa honenene yirugana yoyidona eyi ga rugene Jerobiyamu munaNebata, ogu ga ninkisire Vaisraeli va zone. 10 Konyima, Sarumu munaJabesi kwa mu rwanesere ntani kwa mu dipagere mositata saIbiliyamu. Konyima zokumudipaga, ta gusa uhompa wendi. 11 Ano yininke yimwe eyi ga rugene Sakaliya, kwa yi tjanga mobuke zehistoli lyovahompa woVaisraeli. 12 Eyi kwa sikisire mo nonkango edi Jehova ga tanterere Jehu asi: “Vantu vane womoruvharo roge ngava pangera moIsraeli.” Ano eyi yiyo ya horokere.

13 Sarumu munaJabesi kwa kere hompa momvhura 39 zepangero lyaUsiya hompa gorudi rwaJuda ntani age kwa pangerere moSamaliya kwedi kumwe. 14 Konyima, Menahemu munaGadi ta tundu koTiresa a ze koSamaliya, ta ka dipaga Sarumu munaJabesi moSamaliya. Konyima zokumudipaga, ta gusa uhompa wendi. 15 Ano yininke yimwe eyi ga rugene Sarumu nomu ga rwanesere hompa, kwa yi tjanga mobuke zehistoli lyovahompa woVaisraeli. 16 Posiruwo oso, yipo Menahemu ga tundire moTiresa, ta ka homokera Tifisa ntani ta ka dipaga navenye ava va kere mo ntani monomukunda dopopepi, morwa kapi va zegwilire mavero gositata yipo a hwilire. Age kwa zonagwire po sitata oso ntani kwa tawire mazimo govakadi womarutu gavali.

17 Momvhura 39 zepangero lyaAsaliya hompa gorudi rwaJuda, Menahemu munaGadi ta kara hompa gwaIsraeli ntani age kwa pangerere moSamaliya nomvhura murongo. 18 Age kwa twikilire kurugana yininke yoyidona kosipara saJehova. Eparu lyendi mudima age kwa honenene yirugana yoyidona eyi ga rugene Jerobiyamu munaNebata, ogu ga ninkisire Vaisraeli va zone. 19 Puli hompa gwaAsiliya kwa wizire a ya rwise Vaisraeli, makura Menahemu ta gava yisiliveli yonokilograma 34 000* kwaPuli yipo a mu vatere a twikire kukara hompa. 20 Menahemu kwa pulire vagara wonongawo ava va divikwire yipo va mu pe yisiliveli eyi na gava kwahompa gwaAsiliya. Nkenye mugara kwa mu pulire a gave yisiliveli* 50, makura hompa gwaAsiliya ta tundu mosirongo a tengure kosirongo sawo. 21 Ano yininke yimwe eyi ga rugene Menahemu, kwa yi tjanga mobuke zehistoli lyovahompa woVaisraeli. 22 Konyima, Menahemu ta fu ngwendi ozinakuru, ano munendi Pekahiya ta mu kwama mouhompa.

23 Momvhura 50 zepangero lyaAsaliya hompa gorudi rwaJuda, Pekahiya munaMenahemu ta kara hompa gwaIsraeli moSamaliya ntani age kwa pangerere nomvhura mbali. 24 Age kwa twikilire kurugana yininke yoyidona kosipara saJehova ntani age kwa honenene yirugana yoyidona eyi ga rugene Jerobiyamu munaNebata, ogu ga ninkisire Vaisraeli va zone. 25 Makura mukwayita gwendi Peka munaRemaliya ta mu rwanesa ntani ta mu dipaga moSamaliya moruhungu rokombara zahompa, kumwe naArogobo ntani naAliye. Age kwa zire kumwe novagara 50 womoGiliyata. Konyima zapa ga mu dipagere, ta gusa uhompa wendi. 26 Ano yininke yimwe eyi ga rugene Pekahiya, kwa yi tjanga mobuke zehistoli lyovahompa woVaisraeli.

27 Momvhura 52 zepangero lyaAsaliya hompa gorudi rwaJuda, Peka munaRemaliya ta kara hompa goVaisraeli moSamaliya ntani age kwa pangerere nomvhura 20. 28 Age kwa twikilire kurugana yininke yoyidona kosipara saJehova ntani age kwa honenene yirugana yoyidona eyi ga rugene Jerobiyamu munaNebata, ogu ga ninkisire Vaisraeli va zone. 29 Posiruwo esi ga pangerere Peka hompa gwaIsraeli, Tigirata-piresere hompa gwaAsiliya kwa homokerere nokukwata sitata saIyoni, Abeli-bete-maka, Janowa, Kedesi, Hasoro ntani naGiliyata. Age kwa kwete hena sitata saGalireya nosirongo nasinye saNafitali. Konyima ta gusa vantu navenye womoyitata oyo, a va tware koAsiliya. 30 Makura Hoseya munaEra ta rwanesa Peka munaRemaliya ntani ta mu dipaga nokugusa uhompa wendi momvhura 20 zepangero lyaJotamu munaUsiya. 31 Ano yininke yimwe eyi ga rugene Peka, kwa yi tjanga mobuke zehistoli lyovahompa woVaisraeli.

32 Momvhura zauvali zepangero lyaPeka munaRemaliya hompa goVaisraeli, Jotamu munaUsiya hompa gorudi rwaJuda ta kara hompa. 33 Age kwa kere nonomvhura 25 apa ga kere hompa ntani kwa pangerere moJerusarema nomvhura 16. Edina lyozina kwa kere Jerusa munaSadoko. 34 Age kwa twikilire kurugana yininke youhunga kosipara saJehova ngwendi moomu va yi rugene oguhwe Usiya. 35 Nye nampili ngoso, mavango gokukarera yikarunga yoyimpempa gokonondundu kapi va ga zonagwire po ntani vantu kwa twikilire kugava nonzambo komavango ogo. Age yige ga dikire erungavero lyere lyokonzugo zaJehova. 36 Ano yininke yimwe eyi ga rugene Jotamu, kwa yi tjanga mobuke zehistoli lyovahompa worudi rwaJuda. 37 Posiruwo oso, Jehova kwa tumine Resini hompa gwaSiliya ntani naPeka munaRemaliya yipo va ya rwise vantu womorudi rwaJuda. 38 Konyima, Jotamu ta fu ngwendi ozinakuru, makura tava mu horeke oku va horeka ozinakuru, moSitata sozinakuru Ndafita. Ano munendi Ahasi ta mu kwama mouhompa.