Josuwa
6 Marungavero gaJeliko kwa ga pete morwa Vaisraeli, kwato ogu ga vhulire kupwaga mo ndi a hwilire mo.
2 Jehova ta tantere Josuwa asi: “Ame na gava Jeliko momawoko geni nahompa gwaso ntani novakwayita vamo wononkondo. 3 Vakwayita navenye va hepa kulikunduruka kositata sikando simwe mezuva. Eyi yiyo ngomu rugana mazuva ntazimwe. 4 Ninka vapristeli ntambali va simbe nombinga* ntambali va pite komeho zosikesa. Ano mezuva lyauntambali va hepa kulikunduruka kositata yikando ntambali ntani vapristeli va hepa kufuda nombinga. 5 Apa ngava fuda nombinga ntani apa tupu ngomu zuvha muhagaro ogo, vakwayita ngava zigire ngwendi vantu ava vana kara moyita, makura makuma gositata ngaga gwa, ano vakwayita ngava ze mositata.”
6 Makura Josuwa munaNunu ta zigida vapristeli, ta va tantere asi: “Damuneni sikesa segwanekero, ano vapristeli ntambali va hepa kusimba nombinga ntambali va pite komeho zosikesa saJehova.” 7 Age kwa tanterere vakwayita asi: “Zendeni mu likunduruke kositata, ano vakwayita vamwe ava vana kara noyirwiso va hepa kupita komeho zosikesa saJehova.” 8 Vapristeli ntambali ava va simbire nombinga ntambali komeho zaJehova, kwa pitire komeho va fude nombinga ngwendi moomu ga tanterere Josuwa vakwayita, ano sikesa saJehova segwanekero kwa va kweme monyima. 9 Ano vakwayita vamwe ava va simbire yirwiso kwa pitire komeho zovapristeli ava va fudire nombinga ntani vakwayita vamwe kwa kweme sikesa ngomu vapristeli va twikilire kufuda nombinga.
10 Josuwa kwa tanterere vakwayita asi: “Kapisi mu zigire ndi va zuvhe mazwi geni. Kapisi mu uyunge dogoro apa ngani mu tantera asi: ‘Zigireni,’ ntani nye ngomu zigira.” 11 Josuwa kwa ninkire vantu va likunduruke kositata sikando simwe kumwe nosikesa saJehova. Konyima tava tengura kokamba, tava ka rara kooko.
12 Ezuva lyokukwama ko, Josuwa ta pinduka ngurangura zonene makura vapristeli tava simbi sikesa saJehova. 13 Vapristeli ntambali ava va simbire nombinga ntambali, tava piti komeho zosikesa saJehova ntani awo kwa twikilire kufuda nombinga, ano vakwayita vamwe ava va kere noyirwiso kwa gendere komeho zawo. Vakwayita vamwe kwa va kweme konyima zosikesa saJehova ngomu vapristeli va fudire nombinga. 14 Mezuva lyauvali, awo kwa likundurukire kositata sikando simwe, makura tava tengura kokamba. Eyi yiyo va rugene mazuva ntazimwe.
15 Mezuva lyauntambali, awo kwa pindukire ngurangura zonene makura tava likunduruka kositata hena yikando ntambali. Ezuva olyo yilyo tupu lyelike va likundurukire kositata yikando ntambali. 16 Sikando sauntambali, vapristeli kwa fudire nombinga, ano Josuwa kwa tanterere vakwayita asi: “Zigireni, yeeyi Jehova ana gava sitata momawoko geni! 17 Mwa hepa kuzonagura sitata nanayinye eyi ya kara mo, yeeyi nayinye kwa hamena kwaJehova. Rahabu gohondedi yige gelike nava parura kumwe nava va kara membo lyendi, morwa age kwa horekere vagara ava twa tumine va ya tare sirongo. 18 Mwa ha hedera koyininke eyi nava zonagura po, yipo mu dire kuyidowokera mu yi guse, makura mu ninkise kamba zoVaisraeli va zi zonagure po nokuziretera udigu. 19 Nye siliveli nazinye nongoporo ntani noyipako yongoporo neyi yoyivera kwa pongoka kwaJehova, mwa hepa kuyitura mevango omu ava pungura yininke yaJehova yomulyo.”
20 Makura tava fudu nombinga, ano vakwayita tava zigire. Apa va zuvhire vakwayita muhagaro gonombinga, tava zigire ngwendi vantu ava vana kara moyita, makura makuma taga gu. Konyima vakwayita tava zi mositata, tava ka si kwata. 21 Awo kwa dipagere vagara navenye novakadi, kukwatera mo vanona novakondi. Awo hena kwa dipagere nontwedu, nonzwi ntani noyindongi.
22 Josuwa ta tantere vagara vavali ava va zire va ka tare sirongo asi: “Zendeni membo lyohondedi mu ka simbe mo mukadi ogo ntani nanavenye ava va kara membo lyendi ngwendi moomu mwa mu tumbwidilire.” 23 Makura vagara owo wovadinkantu tava zi, tava ka simba Rahabu kumwe noguhwe nozina nekoro lyendi nalinye nava va tungire membo lyendi. Awo kwa va retere pepi nokamba zoVaisraeli.
24 Makura tava hwike sitata nanayinye eyi ya kere mo. Nye siliveli nongorodo ntani noyipako yongoporo neyi yoyivera, awo kwa yi tulire mevango omu ava pungwire yininke yaJehova yomulyo. 25 Nye Rahabu tupu gelike gohondedi ntani nepata lyoguhwe nava va kere membo lyendi, yiwo tupu ga parwire Josuwa. Age simpe mweli moIsraeli dogoro naina, morwa age kwa horekere vagara ava ga tumine Josuwa va ka tare Jeliko.
26 Posiruwo oso, Josuwa kwa gene* asi: “Mugara ogu nga tungurura sitata saJeliko, nga va mu finge komeho zaJehova. Apa nga tunga etateko lyositata oso, age nga zumbanesa mbeli zendi, ano apa nga tura ko mavero, age nga zumbanesa nsiraura zendi.”
27 Jehova kwa kere kumwe naJosuwa ntani age kwa divikwire mouzuni mudima.