Vahompa vauvali
17 Momvhura 12 zepangero lyaAhasi hompa gorudi rwaJuda, Hoseya munaEra ta kara hompa goVaisraeli moSamaliya. Age kwa pangerere nomvhura ntane. 2 Age kwa twikilire kurugana yininke yoyidona kosipara saJehova, nye age kapi ga rugene yininke yoyidona unene ngwendi eyi ngava rugana vahompa woVaisraeli ava ngava pangere nare. 3 Saramanesere hompa gwaAsiliya kwa rwisire Hoseya, makura Hoseya ta kara mukareli gwendi ntani ta tameke kugava mutero* kwendi. 4 Konyima, hompa gwaAsiliya ta zuvhu asi Hoseya ana hara kumurwanesa, yeeyi Hoseya kwa tumine vantu kwaSo hompa gwaEgipite ntani kapi ga geve mutero kwahompa gwaAsiliya ngwendi moomu nga yi rugana monomvhura pita. Yipo nye, hompa gwaAsiliya ta tura Hoseya modorongo ntani ta mu manga.
5 Hompa gwaAsiliya ta zi kumwe novakwayita vendi mosirongo nasinye, tava ka sika kositata saSamaliya, makura ta si kundurukida ure wonomvhura ntatu. 6 Momvhura zauntane zepangero lyaHoseya, hompa gwaAsiliya ta kwata sitata saSamaliya. Makura ta twara Vaisraeli kounkwate koAsiliya, ta va ninki va tunge moHala ntani moHaboro pepi nomukuro gwaGosani nomoyitata yoVamede.
7 Eyi kwa horokerere Vaisraeli morwa awo kwa zonene kwaKarunga gwawo Jehova, ogu ga va gusire mosirongo saEgipite omu nga va hepeke Farawo hompa gwaEgipite. Awo ngava karere* yikarunga yapeke 8 ntani ngava kwama nompo donomuhoko edi ga tjidire Jehova komeho zoVaisraeli. Awo hena ngava kwama nompo edi va tulisire po vahompa woVaisraeli.
9 Vaisraeli kwa twikilire kurugana yininke eyi ga tere Karunga gwawo Jehova asi yidona. Awo kwa dikire mavango gokukarera yikarunga yoyimpempa moyitata yawo nayinye, kutundilira koruhungu dogoro kositata esi va kundurukida nomakuma.* 10 Awo kwa twikilire kudika mamanya gokupongoka ntani nonongundi dokupongoka* konondundugona nadinye ntani moyitji yoyinene. 11 Awo hena ngava gava nonzambo* komavango aga ngava karere yikarunga yoyimpempa ngwendi moomu nga di yi rugana nomuhoko edi ga tjidire mo Jehova mosirongo komeho zawo. Awo kwa twikilire kurugana yininke yoyidona unene va handukise Jehova.
12 Awo kwa karerere yikarunga yokunyata eyi ga va tanterere Jehova asi kapisi ngava yi karere. 13 Jehova kwa twikilire kurondora Vaisraeli novantu womorudi rwaJuda kupitira movaporofete vendi novantu ava ngava mono mamoneko. Age kwa va tanterere asi: “Hagekeni kurugana yininke yoyidona mu limburukwe nompangera dange nonoveta dange, edi na pere ozinyakurweni ntani edi na mu tanterere kupitira movaporofete vange.” 14 Nye awo kapi va purakenene ntani kwa kere ndino* ngwendi ozinyakurwawo ava va dilire kukara nepuro mwaKarunga gwawo Jehova. 15 Awo kwa nyokere kukwama nompangera dendi negwanekero* eli ga tulisire po kumwe nozinyakurwawo nomarondoro aga ga va pere. Awo kwa twikilire kukarera yikarunga yokudira mulyo, ano eyi kwa va ninkisire va dire kukara nomulyo morwa awo kwa honenene nomuhoko edi da va kundurukidire, edi ga va tanterere Jehova asi kapisi va di honene.
16 Awo kwa sigire nompangera daKarunga gwawo Jehova ntani kwa liruganenene nontana mbali doyivera nongundi zokupongoka.* Awo ngava nyongamene nombungururu nokukarera Bara. 17 Awo hena ngava zamba vana vawo wovagara nava wovakadi momundiro, ngava ruganesa umpure, ngava papara yidiviso ntani ngava rugana yininke yoyidona kosipara saJehova va mu handukise.
18 Makura Jehova ta handukire unene Vaisraeli, ta va gusa ko komeho zendi. Age kwa tjidire mo Vaisraeli mosirongo, kugusa ko vantu womorudi rwaJuda.
19 Vantu womorudi rwaJuda nawo kapi va limburukwire nompangera daKarunga gwawo Jehova; nawo kwa kweme nompo edi ngava kwama Vaisraeli. 20 Jehova kwa nyokere Vaisraeli navenye* ntani kwa va swaukisire, makura ta va gava momawoko gononkore dawo dogoro ta va gusa ko komeho zendi. 21 Age kwa gusire Vaisraeli mepangero lyoruvharo rwaNdafita, makura awo tava tura Jerobiyamu munaNebata a kare hompa. Nye Jerobiyamu kwa ninkisire Vaisraeli va hageke kukarera Jehova nokuvaninkisa va zone unene. 22 Vaisraeli kwa rugene yininke yoyidona eyi ga rugene Jerobiyamu. Awo kwa twikilire kuyirugana 23 dogoro Jehova ta va gusa ko komeho zendi, ngwendi moomu ga yi tente kupitira movaporofete vendi. Makura Vaisraeli tava va gusa mo mosirongo sawo, va va tware kounkwate koAsiliya oku vana kara dogoro naina.
24 Makura hompa gwaAsiliya ta gusa vantu moBabironi, moKuti, moAvha, moHamati ntani moSefaravayimu, ta va twara va ka tunge moyitata yomoSamaliya omu va kere nare Vaisraeli. Awo kwa gusire Samaliya makura tava tungu moyitata eyi ya kere mo. 25 Apa va hovere kukatunga mo, awo kapi va tjilire* Jehova. Makura Jehova ta va tumine vanyime, makura vanyime owo tava dipaga mo vantu vamwe. 26 Hompa gwaAsiliya tava mu tantere asi: “Vantu ava wa ka reta va ya tunge moyitata yomoSamaliya, kapi va diva kukarera Karunga gomosirongo esi. Eyi yiyo Karunga a va tuminine vanyime ava vana kuvadipaga, yeeyi awo kapi va diva kukarera Karunga gomosirongo esi.”
27 Makura hompa gwaAsiliya ta tanta asi: “Ninkeni gumwe govapristeli ava mwa ka simba a tengure a ka tunge nawo, a ka va ronge omu nava karera Karunga gomosirongo oso.” 28 Makura gumwe govapristeli ogu va ka simbire koSamaliya, ta tengura a ka tunge moBeteli. Age ta tameke kuvaronga omu nava tjira* Jehova.
29 Nye nkenye muhoko kwa rugene sikarunga* sago, tava yi tura mononzugo dokukarera yikarunga yoyimpempa edi va dikire vaSamaliya konondundu; nkenye muhoko kwa rugene yininke oyo moyitata eyi va tungire. 30 Vababironi kwa rugene sikarunga sedina Sukoto-benoto, Vakuti kwa rugene sikarunga sedina Neregali, Vahamati kwa rugene sikarunga sedina Asima, 31 ano Vaavha kwa rugene sikarunga sedina Nibuhasi ntani sikarunga Tarateke. Vasefaravayimu ngava zamba vana vawo koyikarunga yawo, Adaramereki naAnamereki. 32 Nampili ngomu va tjilire Jehova, awo kwa horowere vantu mokatji kawo va kare vapristeli wokomavango gokukarera yikarunga yoyimpempa konondundu. Ano vapristeli owo ngava rugana mononzugo dokukarera yikarunga yoyimpempa edi da kere konondundu. 33 Yipo nye, awo kwa tjilire Jehova, nye simpe ngava karere yikarunga yawo ngwendi moomu ngava yi rugana koyirongo oku va ka va simbire.
34 Awo kukarera yikarunga yawo dogoro naina. Kwato ogu a karere* Jehova ndi a kwame noVeta, nompangera ntani noyipango yendi eyi ga pere Jehova womoruvharo rwaJakopo, ogu ga rukire asi Israeli. 35 Jehova apa ga tulisire po egwanekero kumwe noVaisraeli, age kwa va pangerere asi: “Mwa ha tjira yikarunga yapeke ntani mwa ha yi nyongamena ndi mu yi karere ndi mu yi zambere nonzambo. 36 Nye Jehova ogu ga mu gusa mosirongo saEgipite nononkondo dendi dononene, yige nomu tjira nokunyongamena ntani yige nomu gavera nonzambo. 37 Mwa hepa kukwama nkenye apa mavyukiso, noVeta, nompangera ntani noyipango eyi ga mu pa ntani kapisi ngomu tjire yikarunga yapeke. 38 Kapisi ngomu divare egwanekero eli na tura po kumwe none ntani kapisi ngomu tjire yikarunga yapeke. 39 Nye mwa hepa kutjira Karunga gweni Jehova, yeeyi age yige nga mu popera kononkore deni nadinye.”
40 Nye awo kapi va limburukwire ntani awo kwa karerere yikarunga yawo eyi ngava karere nare. 41 Yipo nye, nomuhoko edi kwa tjilire Jehova, nye awo ngava karere mafano goyikarunga yawo. Ano vana vawo novatekuru vawo, nawo kwa rugana eyi ngava rugana ozinyakurwawo dogoro naina.