Vahompa vauvali
16 Momvhura 17 zepangero lyaPeka munaRemaliya, Ahasi munaJotamu hompa gorudi rwaJuda ta kara hompa. 2 Ahasi kwa kere nonomvhura 20 apa ga kere hompa ntani kwa pangerere moJerusarema nomvhura 16. Age kapi ga rugene yininke youhunga kosipara saKarunga gwendi Jehova, ngwendi moomu ngava yi rugana ozinakuru Ndafita. 3 Nye age kwa honenene vahompa woVaisraeli ntani kwa zembe munendi momundiro ngwendi moomu ngadi yi rugana nomuhoko edi ga tjidire Jehova komeho zoVaisraeli. 4 Age nga zamba hena nonzambo komavango aga ngava karere yikarunga yoyimpempa gokonondundu, konondundugona ntani moyitji yoyinene.
5 Konyima, Resini hompa gwaSiliya naPeka munaRemaliya hompa gwaIsraeli tava zi va ka rwise vantu womositata saJerusarema. Awo kwa kundurukidire Ahasi novantu vendi, nye awo kapi va vhulire kukwata sitata. 6 Posiruwo oso, Resini hompa gwaSiliya ta tengwida sitata saErate koVaedomu. Konyima, age kwa tjidire Vajuda* moErate. Ano Vaedomu tava zi moErate ntani awo yimo va tunga dogoro naina. 7 Makura Ahasi ta tumu vantu kwaTigirata-piresere hompa gwaAsiliya va ka mu tantere asi: “Ame mukareli goge ntani munoge. Wiza o ya popere nge kwahompa gwaSiliya ntani kwahompa gwaIsraeli ava vana kurwisa nge.” 8 Ahasi ta gusa siliveli nongorodo ezi za kere monzugo zaJehova ntani mononzugopungwiro domombara zahompa, ta yi tumu kwahompa gwaAsiliya ngouhwi. 9 Hompa gwaAsiliya ta rugana eyi ga mu pulire Ahasi, makura ta zi kositata saDamasikusi ta ka si kwata, ta twara vantu vamo koKire ntani ta dipaga Resini.
10 Makura hompa Ahasi ta zi koDamasikusi a ka gwane Tigirata-piresere hompa gwaAsiliya. Apa ga ka mwene sizambero moDamasikusi, ta tumu efano lyaso komupristeli Uliya. Efano olyo kwa likidire omu va si rugene. 11 Mupristeli Uliya ta dike sizambero kuliza nomavyukiso aga ga mu tuminine hompa Ahasi ogu ga kere koDamasikusi. Mupristeli Uliya kwa mene kudika sizambero oso komeho hompa Ahasi a ya sike, a tunde koDamasikusi. 12 Apa ga ya sikire hompa a tunde koDamasikusi, ta mono sizambero makura ta zi a ka gavere po nonzambo. 13 Age kwa zamberere po hena nonzambo dendi deswakerero nononzambo dendi dombuto nononzambo dendi doyikunwa ntani kwa nagerere po hena honde zononzambo dendi dombili. 14 Makura ta gusa sizambero songoporo esi sa kere komeho zaJehova pokatji kosizambero sendi nonzugo zaJehova, ta ka si tura koMuzogo gosizambero sendi. 15 Hompa Ahasi ta tantere mupristeli Uliya asi: “Ngo zambere po nonzambo deswakerero posizambero sosinene ngurangura. Ano ngurova ngo zambere po nzambo zombuto, nzambo zeswakerero zahompa, nonzambo zendi zombuto ntani nononzambo dovantu deswakerero, dombuto nedi doyikunwa. Ngo nagere po hena honde zononzambo deswakerero ntani nohonde zononzambo dapeke, ano kuhamena sizambero songoporo, tanko ni gazadare ko eyi nani si rugana.” 16 Makura mupristeli Uliya ta rugana nayinye eyi ga mu pangerere hompa Ahasi.
17 Hompa Ahasi kwa gusire hena tuninke tokoturukara otu va tulire monompatji, tatu tetagura ntani ta gusa po yiyaha eyi va tulire peguru lyoturukara. Age hena kwa gusire emuyaha eli va tulire ponontwedu dongoporo, ta li tura pevhu pemanya. 18 Age kwa gusire ko hena etaratara eli ngava ruganesa mEsabata nevero eli ngava hwililire vahompa monzugo zaJehova. Age kwa yi rugene eyi morwa hompa gwaAsiliya.
19 Ano yininke yimwe eyi ga rugene Ahasi, kwa yi tjanga mobuke zehistoli lyovahompa worudi rwaJuda. 20 Konyima, Ahasi ta fu ngwendi ozinakuru, tava ka mu horeka oku va horeka ozinakuru, moSitata saNdafita. Ano munendi Hisikiya* ta mu kwama mouhompa.