Ehistoli lyauvali

6 Posiruwo oso, Saromo ta tanta asi: “Jehova ove kwa tente asi ngo tunga meremo lyenene lyesovagani. 2 Ame na kutungira nzugo zongwa omu ngo tunga narunye.”

3 Makura ta piruka, ta tungike Vaisraeli navenye, awo vana sikama. 4 Age ta tanta asi: “Jehova Karunga goVaisraeli va mu hamberere, ogu ga tumbwidilire* otate Ndafita nokusikisa mo* eyi ga tente asi: 5 ‘Kutunda apa na gusa vantu vange mosirongo saEgipite, ame kapi na horowora sitata momarudi goVaisraeli esi ngava tungira nzugo omu ngava fumadekera edina lyange dogoro narunye ntani ame kapi na horowora mugara a pitisire vantu vange Vaisraeli. 6 Nye ame kwa horowora Jerusarema yipo ngava fumadekere mo edina lyange dogoro narunye ntani ame kwa horowora Ndafita a pangere vantu vange Vaisraeli.’ 7 Otate Ndafita kwa here kutunga nzugo ezi ngava fumadekera edina lyaJehova Karunga goVaisraeli. 8 Nye Jehova kwa tanterere otate Ndafita asi: ‘Ove kuna hara kutunga nzugo ezi ngava fumadekera edina lyange, aso sininke sosiwa sili. 9 Nye nampili ngoso, ove kapisi nyove ngo tungira nge nzugo. Nye munoge ogu ngava hampuruka yige nga tunga nzugo omu ngava fumadekera edina lyange.’ 10 Jehova ga sikisa mo etumbwidiro lyendi, yeeyi ame kwa kwama otate Ndafita mouhompa ntani ame kuna hingire posipundi souhompa moIsraeli ngwendi moomu ga tumbwidilire Jehova. Ame hena kwa tunga nzugo zokufumadekera edina lyaJehova Karunga goVaisraeli 11 ntani ame kwa tura mo sikesa. Mosikesa oso kwa kara mo mamanya gegwanekero eli ga tulire po Jehova kumwe noVaisraeli.”

12 Makura ta sikama komeho zosizambero saJehova, a livyuke noVaisraeli navenye, ta zerura mawoko gendi meguru. 13 (Yeeyi Saromo kwa rugene sitantara songoporo ntani age kwa si tulire pokatji keharango. Monaure aso kwa kere nometa 2,25* ano monompatji nometa 2,25 ntani momusika meta zimwe;* makura ta sikama positantara oso.) Age ta tongamene komeho zoVaisraeli navenye ntani ta zerura mawoko gendi meguru, 14 ta tanta asi: “Jehova Karunga goVaisraeli, kwato Karunga ogu ga kufana, yi kare asi meguru ndi pevhu. Ove kusikisa mo egwanekero* lyoge ntani kulikida eharo lyanarunye kovakareli woge ava ava kulimburukwa nomutjima nagunye. 15 Ove wa sikisa mo eyi wa tumbwidilire otate Ndafita. Ove kwa va pere etumbwidiro, ano neina ono li sikisa mo. 16 Jehova Karunga goVaisraeli, ove hena kwa tumbwidilire mukareli goge Ndafita asi: ‘Nsene vana woge ngava limburukwa konoveta dange ngwendi moomu o limburukwa nge, moruvharo roge ngamu tunda nkenye apa gumwe ogu nga hingira posipundi souhompa moIsraeli.’ Yipo nye, sikisa mo hena etumbwidiro eli. 17 Na kanderere Jehova Karunga goVaisraeli, ninka eyi wa tumbwidira mukareli goge Ndafita yi sike mo.

18 “Nye Karunga kuvhura sili a tunge novantu pevhu ndi? Nampili eguru lyekeguru-guru kapi to vhuru kugwaneka mo. Ngapi nye kuhamena nzugo ezi na ku tungira? 19 Purakena kekanderero lyange ame mukareli goge ntani pe nge eyi nina kukuhundira. Jehova Karunga gwange, purakena kekanderero lyange ntani purakena kweyi nina kukuhundira. 20 Ngano o tarere nzugo ezi mutenya nomasiku, yipo o purakene komakanderero gomukareli goge mevango eli. Alyo evango eli wa tente asi yiko ngava fumadekera edina lyoge. 21 Purakena makanderero gomukareli goge ntani makanderero govantu woge Vaisraeli apa ngava kanderera awo vana pirukire kevango eli. Ngano ngo va purakene meguru, mevango lyoge omu wa kara ntani ngo va gusire po.

22 “Nsene muntu a zonena mukwawo makura va mu ninke a gane,* yipo ngava mu tengeke nsene asi ga kara nousima ntani nsene nga wiza kosizambero soge konzugo ezi siruwo esi nga kara momugano, 23 ngano ngo yi zuvhe kutundilira meguru o rugane ko yuma ntani o pangure vakareli woge pokutengeka ogu ana kara nousima ntani pokudivisa ogu ana dili kukara nousima, o mu pe mfeto kuliza nouhungami wendi.

24 “Nsene vantu woge Vaisraeli ngadi va funda nonkore dawo morwa awo kapi va hageka kuzona koge, makura va tengure koge nokufumadeka edina lyoge ntani va kanderere nokulikwambera koge monzugo ezi yipo o va hafere, 25 ngano ngo zuvhe makanderero gawo kutundilira meguru ntani ngo gusire po vantu woge Vaisraeli nonzo dawo ntani ngo va tengwide kosirongo esi wa va pere nozinyakurwawo.

26 “Eguru apa ngali dira kugava mvhura morwa Vaisraeli kwa zona koge, makura ngava kanderere awo vana pirukire kevango eli va fumadeke edina lyoge ntani va hageke kuzona morwa wa va nunupika,* 27 ngano ngo zuvhe ekanderero lyawo kutundilira meguru ntani ngo gusire po vakareli woge Vaisraeli. Ove ngo va ronga kuhamena nzira zongwa ezi ngava genda ntani ngo va rokesera mvhura mosirongo esi wa pa vantu woge ngoupingwa.

28 “Mosirongo nsene nga mu kara erumbu, ehamba, upyu wounene, yimeno yi kukute, simbonde,* ndi nonkore dawo ngadi va homokere mwankenye sitata esi sa kara mosirongo sawo, ndi nkenye udigu ndi mauvera, 29 nkenye eyi ngava kanderera ndi nkenye eyi nga hundira muntu ndi vantu woge Vaisraeli (yeeyi nkenye muntu ga diva udigu wendi ntani neyi ayi mu koresa) apa ngava zerura mawoko gawo awo vana pirukire konzugo ezi, 30 ngano ngo va zuvhe kutundilira meguru omu wa tunga ntani ngo va gusire po nokufuta nkenye ogu kuliza noyirugana yendi, yeeyi ove wa diva mutjima gwendi (nyovelike wa diva eyi ya kara momutjima gomuntu), 31 yipo ngava ku tjire pokukulimburukwa siruwo nasinye esi ngava tunga mosirongo esi wa pa ozinyakurwetu.

32 “Ano vanayirongo ava va dira kuhamena kovantu woge Vaisraeli ntani ava va tunda kosirongo sokoure morwa edina lyoge lyenene ntani nonkondo doge dononene, makura ngava wize va ya kanderere kevango eli, 33 ngano ngo zuvhe makanderero gawo kutundilira meguru omu wa tunga ntani ngo rugane nayinye eyi ngava kuhundira vanayirongo, yipo vantu navenye vepevhu ngava dive edina lyoge ntani ngava kutjire ngwendi moomu ava kutjira vantu woge Vaisraeli. Nzugo ezi na tunga ngano ngazi retere edina lyoge efumano.

34 “Nsene ngo tuma vantu woge va ze koyita va ka rwise nonkore dawo nkenye oku ngo va tuma, makura ngava kanderere koge awo vana pirukire kositata esi wa horowora ntani konzugo ezi na tunga va fumadekere mo edina lyoge, 35 ngo purakene ekanderero lyawo kutundilira meguru, ngo rugane eyi ngava kuhundira ntani ngo va vatere.

36 “Nsene ngava zona koge (yeeyi kwato muntu ogu a dili kuzona) makura ngo va handukire unene ntani ngo va gave momawoko gononkore dawo, makura ngava va tware kounkwate, yi kare asi ure ndi pepi, 37 konyima ngava litezurure mosirongo esi ngava va twara mounkwate ntani va tengure nokulikwambera koge yipo o va hafere mosirongo esi ngadi va twara nonkore dawo makura ngava tante asi: ‘Ose twa zona ntani kwa lipuka. Ose kwa rugana yininke yoyidona unene,’ 38 makura ngava tengure koge nomutjima nagunye nomwenyo* nagunye kosirongo oku da va twara nonkore dawo, ano awo va kanderere koge awo vana pirukire kosirongo esi wa geve kozinyakurwawo ntani kositata esi wa horowora ntani konzugo ezi na tunga va fumadekere mo edina lyoge, 39 ngo zuvhe ekanderero lyawo kutundilira meguru, ngo rugane eyi ngava kuhundira ntani ngo va vatere. Ngo gusire po vantu woge nonzo dawo.

40 “Karunga gwange, ngo tu tare eho ntani ngo purakene komakanderero aga ngava kanderera mevango eli.* 41 Jehova Karunga, zende kevango lyoge lyokupwizumukira nosikesa esi a si likida asi wa kara nononkondo. Ngano vapristeli woge Jehova va likide asi ove kupopera vantu ntani ngano vantu woge ava ava kulimburukwa va hafe, morwa yirugana yoge yoyiwa. 42 Jehova Karunga, wa ha sigilira hompa ogu wa gwaveka. Ngano o twikire kudiworoka eharo lyanarunye eli wa likidire mukareli goge Ndafita.”