Ehistoli lyauvali
14 Konyima, Abiya ta fu ngwendi ozinakuru, tava mu horeke moSitata saNdafita, ano munendi Asa ta mu kwama mouhompa. Posiruwo esi nga pangere Asa, mosirongo kwa kere mo mbili nomvhura murongo.
2 Asa kwa rugene yininke yoyiwa ntani youhunga kosipara saKarunga gwendi Jehova. 3 Age kwa zonagwire po yizambero yoyikarunga yoyimpempa nomavango gokukarera yikarunga yoyimpempa gokonondundu ntani kwa bomagwire mamanya gokupongoka nokutetagura nongundi dokupongoka.* 4 Age hena kwa tanterere vantu womorudi rwaJuda va papare Jehova Karunga gozinyakurwawo ntani va sikise mo Veta nonompangera dendi. 5 Yipo nye, Asa kwa gusire moyitata yorudi rwaJuda mavango gokukarera yikarunga yoyimpempa gokonondundu noyizambero eyi ngava zambere yitutumikidiso ntani posiruwo esi ga pangerere, kwato ogu ga mu rwanesere. 6 Age kwa dikire yitata mosirongo sorudi rwaJuda eyi va kundurukidire makuma, yeeyi mosirongo kwa kere mo mbili ntani kwato ogu ga mu rwanesere morwa Jehova kwa mu ninkire a kare mombili. 7 Age kwa tanterere vantu womorudi rwaJuda asi: “Tu dikeni yitata ntani tu yi kundurukideni makuma, tu ture ko maruhungu, marungavero* noyininke yokupatesa ko.* Sirongo kuna kara mepangero lyetu, yeeyi ose kwa papara Karunga gwetu Jehova. Mokumona asi ose kwa mu papara, age kwa tu ninka tu kare nombili mosirongo.” Makura awo tayi va tompoka kudika yitata oyo.
8 Asa kwa kere novakwayita 300 000 womorudi rwaJuda ava va kere noyilikandwiso yoyinene ntani nomagonga. Ano vakwayita vendi wononkondo womorudi rwaMbenyameni kwa kere 280 000. Awo kwa simbire yilikandwiso yoyinunu* ntani nomauta gonkanza.
9 Konyima, Zera gokoEtiyopiya kwa ya mu rwisire novakwayita 1 000 000 ntani nomatemba 300. Apa ga ka sikire koMaresa, 10 Asa ta zi a ka mu rwise makura vakwayita tava liwapaike va rwe yita moMuramba gwaSefata moMaresa. 11 Makura Asa ta likwambere kwaKarunga gwendi Jehova asi: “Jehova, ove kuvatera vantu, yi kare asi awo nonkondo* ndi kwato nonkondo. Yipo nye, Karunga gwetu Jehova tu vatera, yeeyi moge tuna huguvara ntani ose kuna kurwisa mbunga ezi zonene medina lyoge. Ove Karunga gwetu Jehova, wa ha pulisira muntu gokudira mulyo a ku funde.”
12 Makura Jehova ta fundu Vaetiyopiya ava ga rwisire Asa novantu womorudi rwaJuda. Ano Vaetiyopiya tava duka va tjwayuke. 13 Asa novantu ava ga kere nawo tava tjida Vaetiyopiya dogoro koGerara. Awo kwa va dipagere dogoro navenye tava fu, yeeyi Jehova novakwayita vendi kwa zonagwire po Vaetiyopiya. Konyima, tava gusa emona lyenzi. 14 Awo hena kwa va tompokere kufunda vantu womoyitata nayinye eyi ya kundurukidire Gerara, yeeyi vantu vamo kwa kankamene Jehova. Moyitata oyo, kwa kere mo emona lyenzi, makura awo tava li gusa. 15 Awo hena kwa homokerere vasita ava va tungire monotende, tava va hakana nonzwi noyikombo ntani nonongameru, makura tava tengura koJerusarema.