Ehistoli lyauvali
17 Ano munendi Jehosafata ta mu kwama mouhompa ntani age kwa nkondopekere uhompa wendi moIsraeli. 2 Age kwa tulire vakwayita moyitata yorudi rwaJuda eyi va kundurukidire makuma ntani nonokamba dovakwayita mosirongo sorudi rwaJuda nomoyitata yorudi rwaEfurayimi, eyi va kwete oguhwe Asa. 3 Jehova kwa kere kumwe naJehosafata, morwa age kwa honenene ozinakuru Ndafita ntani kapi nga karere Bara. 4 Age kwa paparere Karunga goguhwe nokulimburukwa yipango yendi ntani kapi ga kweme eyi ngava rugana Vaisraeli. 5 Jehova kwa ninkire uhompa waJehosafata u kare nononkondo ntani vantu navenye womorudi rwaJuda ngava mu retere mauhwi. Yipo nye, age kwa kere nemona lyenzi ntani vantu kwa mu fumadekere. 6 Age kwa kere nouradi wokulimburukwa Jehova ntani kwa gusire mosirongo sorudi rwaJuda mavango gokukarera yikarunga yoyimpempa gokonondundu nonongundi dokupongoka.*
7 Momvhura zautatu zepangero lyendi, ta zigida Beni-hayili, Obadja, Sakaliya, Netaneli ntani Mikaya ava va kere vapangeli, ta va tumu va ka ronge vantu moyitata yorudi rwaJuda. 8 Awo kwa zire noVarevhi ava: Semaya, Netaniya, Sebadiya, Asaheli, Semiramoto, Jehonatani, Adoniya, Tobiya ntani naTobadoniya kumwe naElisama, naJehoramu ava va kere vapristeli. 9 Awo kwa tamekere kuronga mosirongo sorudi rwaJuda ntani kwa simbire buke zoVeta zaJehova, makura tava gendi moyitata yorudi rwaJuda nokuronga vantu.
10 Ano vantu ava va kundurukidire sirongo sorudi rwaJuda, tava tameke kutjira Jehova ntani kapi va rwisire Jehosafata. 11 Ano Vafilisiti kwa reterere Jehosafata mauhwi noyimaliwa ngomutero. Vaarabiya kwa mu reterere nonzwi donongara 7 700 ntani noyikungwe 7 700.
12 Jehosafata kwa nkondoparere ntani kwa twikilire kutunga yitata eyi va kundurukida makuma ntani noyitata eyi ngava pungwire yininke mosirongo sorudi rwaJuda. 13 Age kwa rugene yirugana yoyinene yokulisiga-siga moyitata yorudi rwaJuda ntani age kwa kere novakwayita wononkondo moJerusarema. 14 Aga kuna kara madina govakwayita ava ngava pitisire vakwayita womomazimo gokulisiga-siga: gomorudi rwaJuda ogu nga pitisire vakwayita mayovi kwa kere Adina ntani age kwa kere novakwayita wononkondo 300 000. 15 Age nga pitisire hena Jehohanani mukurona govakwayita ogu ga kere novagara 280 000. 16 Age nga pitisire hena Amasiya munaSikili, ogu nga vatere mosirugana saJehova ntani age kwa kere novakwayita wononkondo 200 000. 17 Ano gomorudi rwaMbenyameni kwa kere Eliyada mukwayita gononkondo ntani age kwa kere novagara 200 000 ava va kere nomauta gonkanza noyilikandwiso. 18 Age kwa pitisilire Jehosabadi, ogu ga kere novagara 180 000 ava va liwapaikilire kuza koyita. 19 Awo kwa ruganenene hompa kumwe novantu ava ga tulire hompa moyitata eyi va kundurukidire makuma mosirongo nasinye sorudi rwaJuda.