Buke zokuhova zoVahompa

20 Beni-hadadi hompa gwaSiliya ta pongaike vakwayita vendi novahompa vakwawo 32 nononkambe dawo ntani nomatemba gawo. Makura tava zi va ka kundurukide sitata saSamaliya yipo va si rwise. 2 Makura ta tumu vantu va ze kositata kwaAhaba hompa goVaisraeli va ka mu tantere asi: “Beni-hadadi kuna tanta asi: 3 ‘Pe nge siliveli nongorodo zoge ntani novakadi woge novana woge wovagara wovawa po.’” 4 Makura hompa goVaisraeli ta limburura asi: “Ame tani rugana nayinye eyi ono tanta hompa gwange. Tani ligava koge noyininke yange nayinye eyi na weka.”

5 Konyima, vantu ava va tumine tava ka tengura, tava ya tanta asi: “Beni-hadadi kuna tanta asi: ‘Ame kwa ku tanterere o pe nge siliveli nongorodo zoge ntani novakadi woge novana woge wovagara. 6 Mungura posiruwo esi, ame ngani kutumina vakareli vange. Awo ngava ya papara nawa monzugo zoge ntani mononzugo dovakareli woge, makura ngava ya guse yininke yoge nayinye yoyiwa.’”

7 Apa ga yi zuvhire hompa goVaisraeli, ta zigida masimbi nagenye gomosirongo, ta ga tantere asi: “Tareni ogu mugara ana hara kuretera nge udigu. Age kuna hara kugusa vakadi vange novana vange wovagara ntani nosiliveli nongorodo zange, nye ame kapi nina nyoka.” 8 Makura masimbi nagenye ntani novantu navenye tava mu tantere asi: “Kapisi o yi rugane ntani kapisi o mu purakene.” 9 Makura hompa gwaIsraeli ta tantere vantu ava ga tumine Beni-hadadi asi: “Ka tantereni hompa gwange asi: ‘Ame tani ku pe nayinye eyi wa hovere kuhundira nge ame mukareli goge, nye eyi ono gwederere ko kapi nani yi ku pa.’” Vantu ava ga tumine Beni-hadadi tava tengura kwendi va ka mu tantere mbudi.

10 Beni-hadadi ta tumu vantu va ka tantere hompa gwaIsraeli asi: “Vakarunga ngano va tengeke nge nsene ndambo zositata saSamaliya ngazi gwaneka momawoko govakwayita vange!” 11 Hompa gwaIsraeli ta ka limburura asi: “Ka mu tantereni asi: ‘Ogu ana kudwara yirwiso yendi ga ha likanganga ngwendi gogu ana kuhutura yirwiso yendi.’” 12 Beni-hadadi ta zuvhu eyi ga uyungire hompa goVaisraeli, age posiruwo oso kuna kunwa kumwe novahompa monotende* dawo. Age ta tantere vakareli vendi asi: “Liwapaikireni mu rwise sitata!” Makura awo tava liwapaikire yipo va rwise sitata.

13 Nye muporofete ta zi kwaAhaba hompa goVaisraeli, ta ka mu tantera asi: “Jehova kuna kutanta asi: ‘Ono va mono ava vakwayita wovanzi ndi? Ame tani va gava momawoko goge naina, yipo o dive asi ame nyame Jehova.’” 14 Ahaba ta pura asi: “Yilye no ruganesa yipo o va funde?” Age ta limburura asi: “Jehova kuna kutanta asi: ‘Vakareli wovapangeli womosirongo.’” Ahaba ta pura asi: “Yilye ogu na tameka kurwisa vakwawo?” Age ta limburura asi: “Nyove!”

15 Ahaba makura ta varura vakareli wovapangeli womosirongo, ano sivaro sawo kwa kere 232. Konyima ta varura vagara womoIsraeli, sivaro sawo kwa kere 7 000. 16 Awo kwa tundire mositata kositenguko, posiruwo oso Beni-hadadi kuna kunwa dogoro ta korwa monotende* kumwe novahompa 32 ava va mu vaterere. 17 Tupu va tundire mositata vakareli wovapangeli womosirongo, Beni-hadadi ta tumu vantu va ka tare eyi yina kuhoroka. Awo kwa ya mu tanterere asi: “Vagara vana tundu mositata saSamaliya.” 18 Beni-hadadi ta tanta asi: “Nsene awo kuna wiza mombili, va kwateni nye mwa ha va dipaga. Nsene awo kuna wiza va ya rwe yita, va kwateni nye simpe mwa ha va dipaga.” 19 Nye vakareli wovapangeli womosirongo novakwayita ava va va kweme monyima apa va tundire mositata, 20 awo tava dipaga nonkore dawo. Makura Vasiliya tava duka, ano Vaisraeli kwa va sikwire. Nye Beni-hadadi hompa gwaSiliya ta duka age ponkambe kumwe novarondi vamwe wononkambe. 21 Nye hompa goVaisraeli ta va sikura, ano age kwa dipagere nonkore da kere pononkambe nomomatemba ntani kwa dipagere Vasiliya wovanzi.

22 Konyima, muporofete ta zi kwahompa gwaIsraeli, ta ka mu tantera asi: “Zende o ka wapaike vakwayita woge ntani o gazadare ko eyi ngo rugana, yeeyi ketamekero lyomvhura ezi* zina kukwama ko, hompa gwaSiliya nga wiza a ya kurwise.”

23 Makura vakareli vahompa gwaSiliya tava mu tantere asi: “Karunga gwawo kwa kara monondundu, eyi yiyo vana tu fundire. Nsene tu ka va rwisa pevega lyokudira nondundu, natu ka va funda. 24 Ntani hena, gusa vahompa navenye moyita, o va pinganesere po novanguuru. 25 Makura o pongaike* vakwayita wokusika povakwayita ava wa zumbanesere ntani nonkambe nomatemba aga wa zumbanesere ngatu ka va rwise pevega lyokudira nondundu. Ose ngatu ka va funda.” Hompa ta purakene komagano gawo, makura ta rugana eyi va mu tanterere.

26 Ketamekero lyomvhura,* Beni-hadadi ta pongaike Vasiliya, tava zi koAfeki va ka rwise Vaisraeli. 27 Vaisraeli nawo tava va pongaike ntani tava va pe nondya, makura tava zi va ka gwane Vasiliya. Apa va ka dikire Vaisraeli kamba zawo komeho zoVasiliya, awo kwa fene ngwendi yiundagona yivali yoyikombo, nye Vasiliya awo kwa zwidire sirongo. 28 Makura muporofete gwaKarunga gousili ta zi kwahompa goVaisraeli ta ka mu tantera asi: “Jehova kuna kutanta asi: ‘Mokumona asi Vasiliya kwa tanta asi: “Jehova kwa kara monondundu, nye kapisi pevega lyokudira nondundu,” ame tani gava vakwayita ava wovanzi momawoko goge. Ano ove no yi diva asi ame nyame Jehova.’”

29 Awo kwa kere monokamba dawo mazuva ntambali ntani nokamba dawo kwa livyukire. Ano mezuva lyauntambali tava tameke kurwa yita. Vaisraeli kwa dipagere vakwayita woVasiliya 100 000 mezuva limwe tupu. 30 Ano vakwayita wokuhupa ko kwa dukilire mositata saAfeki, nye ekuma ta ligwire vakwayita 27 000 ava va hupire po. Beni-hadadi nage kwa dukire a ze mositata, ta ka vanda monzugo zomonda.

31 Makura vakareli vendi tava mu tantere asi: “Ose twa zuvha asi vahompa woVaisraeli kwa kara nonkenda.* Tuna kanderere, ninka tu limange nonsako mombunda nomarugodi monomutwe makura tu ze kwahompa goVaisraeli, nampo na kufira nkenda, a kusige o paruke.” 32 Awo makura tava limanga nonsako mombunda nomarugodi monomutwe dawo. Tava zi kwahompa gwaIsraeli, tava ka mu tantera asi: “Mukareli goge Beni-hadadi kuna kutanta asi: ‘Na kanderere siga nge ni paruke.’” Age ta va limburura asi: “Nani simpe muzuni? Age mukwetu zange.” 33 Vakareli vaBeni-hadadi tava gazara asi aso sidiviso sosiwa, makura tava pura eyi ga uyungire, tava tanta asi: “Beni-hadadi mukweni.” Hompa gwaIsraeli ta tanta asi: “Zendeni mu ka mu simbe.” Ano Beni-hadadi ta wiza kwendi ntani ta rondo metemba lyahompa gwaIsraeli.

34 Beni-hadadi ta mu tantere asi: “Ame tani ku tengwidire yitata yoguho eyi va gusire otate ntani ame tani ku pulisire o kare nomavango gokurandesera* moDamasikusi ngwendi moomu va yi rugene otate moSamaliya.”

Ahaba ta limburura asi: “Nsene natu tura po elizuvhasano* eli, ame tani ku sigi o ze.”

Makura tava tulisa po elizuvhasano, konyima ta mu sigi a ze.

35 Jehova ta tantere gumwe govana wovaporofete* a tantere mukwawo asi: “Na kanderere toona nge.” Nye mukwawo ta nyoka kumutoona. 36 Makura ta mu tantere asi: “Mokumona asi kapi ono purakene kweyi ana ku tantere Jehova, apa no siga nge, nyime na ku dipaga.” Konyima apa ga zire, nyime ta mu homokere ntani ta mu dipaga.

37 Ta gwana hena mugara gwapeke ta mu tantere asi: “Na kanderere toona nge.” Mugara ogo ta mu toona dogoro ta mu remeke.

38 Konyima, muporofete ogo ta zi a ka ndindire hompa konzira. Age kwa limenge sikehe komeho yipo va dire kumudimburura. 39 Apa ga pitire hompa, age ta mu zigire asi: “Ame mukareli goge kwa zire koyita, ano pweli mugara ogu ga tundire moyita a retere nge muntu, ta tantere nge asi: ‘Takamesa mugara ogu. Nsene nga zumbana, ove va hepa kukudipaga yipo o mu pinganene po ndi wa hepa kufuta siliveli zonokilograma 34,2.’* 40 Ano apa na hokwere kurugana yapeke ame mukareli goge, mugara ogo ta zi.” Makura hompa goVaisraeli ta mu tantere asi: “Yimo ngorooro nava kutengeka, ono lipangura nare nyamoge.” 41 Mugara ogo ta ligusa usimbu sikehe komeho gendi, ano hompa gwaIsraeli ta mu dimburura asi age kwa kere gumwe govaporofete. 42 Age ta mu tantere asi: “Jehova kuna kutanta asi: ‘Mokumona asi ove kapi ono dipaga mugara ogu na ku tanterere o dipage, ove va hepa kukudipaga yipo omu pinganene po ntani mevango lyokufa vantu vendi, vantu woge yiwo ngava fa.’” 43 Makura hompa goVaisraeli ta tengura kositata saSamaliya, ano age kwa guvire unene.