Buke zokuhova zoVahompa
19 Makura Ahaba ta tantere Jesebeli nayinye eyi ga rugene Eliya nomu ga dipagere vaporofete navenye norufuro. 2 Ano Jesebeli ta tumu muntu a ka tantere Eliya asi: “Vakarunga ngano va tengeke nge nsene ni dira kukudipaga mungura ngwendi vaporofete ava kodipagere!” 3 Makura Eliya tau mu gwana woma, ta katuka a tjwayuke a popere mwenyo gwendi. Konyima ta ka sika koBere-seba, mukunda gorudi rwaJuda makura ta ka siga mukareli gwendi moomo. 4 Age kwa gendere ezuva mudima momburundu, makura ta ka hingira mositji, ta tantere Karunga asi ana hara a fe. Ta tanta asi: “Kapi nina kuvhura hena kulididimikira, Jehova dipaga nge tupu, yeeyi ame kapi na lisigi nozinyakurwetu ava va fa.”
5 Makura ta rara mositji nye muengeli ta mu kwata, ta mu tantere asi: “Pinduka o lye.” 6 Apa ga kankukire, ta mono mboroto zina kara pomamanya goupyu nokavaza komema kana kara pepi nomutwe gwendi, makura ta li ntani ta nu, ta rara hena. 7 Konyima, muengeli gwaJehova ta ka tengura hena sikando sauvali, ta mu kwata ntani ta mu tantere asi: “Pinduka o lye, yeeyi oku ono kuza ure.” 8 Makura ta pinduka, ta li ntani ta nu. Ano nonkondo edi ga gwene konondya odo kwa mu vaterere a gende mazuva 40 nomasiku 40 dogoro ta ka sika kondundu zaKarunga gousili koHoreba.
9 Apa ga ka sikire, ta ka hwilira mekombombo ta rara moomo, makura Jehova ta mu pura asi: “Eliya, yisinke ono kuyarugana ko oku?” 10 Makura Eliya ta limburura asi: “Ame kwa ruganena Jehova Karunga Mupitisili govakwayita vemeguru noupampi, yeeyi Vaisraeli kapi va sikisa mo egwanekero* lyoge. Awo kwa zonagura po yizambero yoge ntani kwa dipaga vaporofete woge norufuro, nyamelike na hupa po. Ngesi awo vana hara kudipaga nge.” 11 Nye Karunga ta mu tantere asi: “Zende o ka sikame kondundu, komeho zaJehova.” Makura Jehova ta piti komeho zendi ntani mpepo zendi zononkondo kwa bamagwire nondundu nomamanya komeho zaJehova, nye Jehova kapi ga kere mompepo ozo. Konyima zompepo, ta kukwama ekankamo lyevhu, nye Jehova kapi ga kere mekankamo olyo lyevhu. 12 Konyima zekankamo lyevhu, ta kukwama mundiro, nye Jehova kapi ga kere momundiro. Konyima zomundiro, ta zuvhu ezwi lyenunu lyokugomoka. 13 Eliya apa ga zuvhire ezwi olyo, ta kudumike sipara sendi nosikoverero sendi, ta zi ta ka sikama komeho zekombombo. Makura ezwi ta li mu pura asi: “Eliya, yisinke ono kuyarugana ko oku?” 14 Makura Eliya ta limburura asi: “Ame kwa ruganena Jehova Karunga Mupitisili govakwayita vemeguru noupampi, nye Vaisraeli kapi va sikisa mo egwanekero lyoge. Awo kwa zonagura po yizambero yoge ntani kwa dipaga vaporofete woge norufuro, nyamelike na hupa po. Ngesi awo vana hara kudipaga nge.”
15 Jehova ta mu tantere asi: “Tengura, o ze komburundu zaDamasikusi. Apa no ka sika, ka gwaveke Hasayeli a kare hompa gwaSiliya. 16 Ka gwaveke hena Jehu mutekurwaNimusi a kare hompa goVaisraeli ntani ka gwaveke hena Elisa* munaSafata gomoAbeli-mehora a ku pinganene po ngomuporofete. 17 Nkenye ogu nga henduka rufuro rwaHasayeli, Jehu nga mu dipaga ntani nkenye ogu nga henduka rufuro rwaJehu, Elisa nga mu dipaga. 18 Ntani moIsraeli moveli simpe vantu vange 7 000 ava va dira kutongamena Bara ndi va mu ncumite.”
19 Makura Eliya ta zi, ta ka gwana Elisa munaSafata kuna kupurura mepya. Mepya olyo kwa purwire mo nonohove 24, ano Elisa kwa purwire nonohove mbali edi da kere monyima. Makura Eliya ta zire Elisa, ta mu zugumine sikoverero sendi. 20 Makura ta sigi nohove ta duka a kwame Eliya ntani ta mu tantere asi: “Pulisira nge ni ka ncumite otate nonane, konyima ntani nani ya za nove.” Eliya ta mu tantere asi: “Zende, ame kapi nina kukusilika.” 21 Makura Elisa ta zi ta ka gusa nohove mbali, ta di zamba. Age kwa ruganesere sipururu nondjoko, yipo a terekese ko nyama zonohove. Makura ta zi pe vantu va lye. Konyima ta katuka a kwame Eliya ntani ta tameke kumuruganena.