Vahompa vauvali
22 Josiya kwa kere nonomvhura ntantatu apa ga kere hompa ntani age kwa pangerere moJerusarema nomvhura 31. Edina lyozina kwa kere Jedida munaAdaya gomoBosikati. 2 Age kwa rugene yininke youhunga kosipara saJehova ntani kwa kweme sihonena sozinakuru Ndafita, kapi ga zapukire a ze korulyo ndi korumoho.
3 Momvhura 18 zepangero lyahompa Josiya, hompa kwa tumine hamutjanga Safani munaAsaliya zaMesuramu, a ze konzugo zaJehova. Age kwa mu tanterere asi: 4 “Zende komupristeli gomunene Hilikiya o ka mu tantere a guse yimaliwa eyi ava reta vantu konzugo zaJehova, eyi ava pongaike vantu ava ava rugana pomavero. 5 Yimaliwa oyo va ka yi gave kovantu ava va horowere va pitisire sirugana sokonzugo zaJehova, yipo va ka yi gave kovantu ava ngava wapukurura* nzugo zaJehova: 6 vahongi novatungi ntani nava ava rugana nomamanya. Makura ngava yi ruganese mokuranda yitji nomamanya aga va teta yipo va wapukurure nzugo. 7 Nye kapisi ngava varure yimaliwa eyi ngava va pa, yeeyi awo kwa va huguvara.”
8 Konyima, mupristeli gomunene Hilikiya ta tantere hamutjanga Safani asi: “Nina gwana buke zoVeta monzugo zaJehova.” Makura Hilikiya ta gava buke ozo kwaSafani, ano age ta zi resa. 9 Makura hamutjanga Safani ta zi kwahompa, ta ka mu tantera asi: “Vakareli woge vana gusa yimaliwa eyi va gwana monzugo ntani vana yi gava kovagara ava va horowora va pitisire sirugana sokonzugo zaJehova.” 10 Hamutjanga Safani kwa tanterere hena hompa asi: “Pozili buke ana pe nge mupristeli Hilikiya.” Makura Safani ta resere hompa buke ozo.
11 Apa ga zuvhire hompa nonkango domobuke zoVeta, ta taura yikoverero yendi. 12 Makura hompa ta gava mpangera komupristeli Hilikiya naAhikamu munaSafani naAkibora munaMikaya nahamutjanga Safani ntani naAsaya mukareli gwahompa asi: 13 “Zendeni mu ka pulire nge ko kwaJehova ntani mu ka pulire po vantu norudi rwaJuda kuhamena eyi natu rugana kuliza neyi va tjanga mobuke ezi vana gwana, yeeyi Jehova kuna tu handukire unene, morwa ozinyakurwetu kapi va limburukwire nonkango domobuke ezi pokukwama nayinye eyi va tjanga mo kutuhamena.”
14 Makura mupristeli Hilikiya naAhikamu naAkibora naSafani ntani naAsaya, tava zi komuporofete gomukadi Hulida. Age kwa kere mukadaSarumu munaTikivha zaHarahasi, ogu nga pakere mbili yikoverero. Hulida kwa tungire moruha rorupe rositata saJerusarema, makura awo tava ka uyunga nage. 15 Age ta va tantere asi: “Jehova Karunga goVaisraeli kuna kutanta asi: ‘Ka tantereni muntu ogu ana mu tumu kwange asi: 16 “Jehova kuna kutanta asi: ‘Ame ngani reta udigu mosirongo esi nokutengeka vantu ava va tunga mo, ano nonkango nadinye edi ana resa hompa gorudi rwaJuda nga di sika mo. 17 Mokumona asi awo kwa siga nge ntani awo kuna kugava nonzambo koyikarunga yapeke va handukise nge noyirugana yawo, ame ngani handukira sirongo esi ntani ehandu lyange kapi ngali litura.’” 18 Nye ka tantereni hompa gorudi rwaJuda ogu ana mu tumu, mu ya pure kwaJehova asi: “Eyi yiyo ana kuuyunga Jehova Karunga goVaisraeli kuhamena nonkango edi ono zuvhu: 19 ‘Mokumona asi ove ono tambura eyi ono zuvhu ntani ono linunupike komeho zaJehova apa ono zuvhu eyi na uyunga kuhamena sirongo esi novantu vamo asi ngau va gwana udigu ntani ngava va finga ntani yiyo ono taura yikoverero yoge nokulira komeho zange, ame nina kuzuvhu, yimo ana kutanta Jehova. 20 Eyi yiyo ngo fira ngwendi onyokokuru* ntani ove ngava kuhoreka montoko zoge nombili. Ove kapi ngo mona udigu ou ngani retera sirongo esi.’”’” Makura awo tava twara elimbururo kwahompa.