Vahompa vauvali
4 Mukadi gumwe ogu ga kwere gumwe govana wovaporofete, ta likwambere kwaElisa asi: “Mugara gwange ga dogoroka ntani wa yi diva asi age kwa tjilire Jehova. Ano mugara ogu ga korotesere mugara gwange kuna wiza a ya guse vana vange vavali, va ka kare vapika vendi.” 2 Makura Elisa ta mu pura asi: “Yisinke nani kuruganena? Tantera nge eyi ono kara nayo membo lyoge.” Age ta limburura asi: “Ame mukareli goge kuna kara tupu nokavaza komagadi.” 3 Makura Elisa ta mu tantere asi: “Pwaga ponze o ze kovamusinda woge, o ka va hundire yipako yomawoko-woko. Wa ha ka simba yoyisesu. 4 Konyima ka tengure o ya lizedilire membo lyoge kumwe novana woge wovagara, makura o ya ture magadi moyipako oyo. Ano yipako eyi na yi zura magadi, yi tura koruha rumwe.” 5 Makura mukadi ogo ta ka za.
Age kwa ka lizedilire monzugo kumwe novana vendi, ano vana vendi kwa mu tambekere yipako, age ta tjire mo magadi. 6 Apa ya zulire yipako magadi, ta tantere gumwe govana vendi asi: “Retera nge hena sipako simwe.” Age ta mu limburura asi: “Yipako nayinye yina pu.” Makura magadi taga hageke kupita. 7 Mukadi ogo ta zi, ta ka yi tantera muporofete gwaKarunga gousili ano age ta mu tantere asi: “Zende o ka randese magadi ogo yipo o ka fute makongo goge. Yimaliwa eyi ngayi hupa po yiyo ngomu lireresa novana woge.”
8 Ezuva limwe, Elisa kwa zire mositata saSunemu omu ga tungire mukadi ogu ga fumanene, ano mukadi ogo ta mu zigida a ka lye membo lyendi. Nkenye apa nga piti Elisa mositata oso, age nga zi a ka lye membo lyendi. 9 Makura mukadi ogo ta tantere mugara gwendi asi: “Na yi diva asi mugara ogu a wiza nkenye apa membo lyetu ga pongoka ntani muporofete gwaKarunga. 10 Ninka tu mu dikire kanzugo kokanunu peguru lyonzugo, tu mu tulire mo mbete, sitafura, sipundi ntani nouzweko woramba, yipo nga rare mo nkenye apa nga wiza kembo lyetu.”
11 Ezuva limwe apa ga wizire Elisa membo lyawo, ta zi konzugo zekeguru a ka rare, 12 makura ta tantere mukareli gwendi Gehasi asi: “Ka zigidire nge mukadi gemembo eli.” Makura Gehasi ta zi ta ka mu zigida, ano mukadi ogo ta wiza. 13 Elisa ta tantere Gehasi asi: “Mu tantera asi: ‘Ove kwa tu ruganena yininke yoyinzi. Yisinke ono hara ni ku ruganene? Ono hara ni ka kuuyungire po kwahompa ndi komukurona govakwayita ndi?’” Mukadi ogo ta ka limburura asi: “Ame kwa tunga mombili mokatji kovantu vange.” 14 Makura Elisa ta pura Gehasi asi: “Yisinke nye natu mu ruganena?” Gehasi ta limburura asi: “Mukadi ogo kapi ga kara nomuna gomugara ntani mugara gwendi ga kurupa.” 15 Makura Elisa ta tanta asi: “Ka mu zigide.” Gehasi ta ka mu zigida, ano mukadi ogo ta sikama pevero. 16 Makura Elisa ta mu tantere asi: “Mvhura ozo zina kukwama ko posiruwo ngaseesi, ove ngo hampuruka munona gomumati.” Age ta limburura asi: “Hompa gwange, ove muporofete gwaKarunga gousili! Wa ha kumbagera mukareli goge.”
17 Nye konyima, mukadi ogo ta kara nomarutu gavali ntani ta hampuruka munona gomumati mvhura ezi za kweme ko ngwendi moomu ga yi mu tanterere Elisa. 18 Munona ogo kwa kulire. Ano ezuva limwe age kwa zire koguhwe ava va kere kumwe novatezi. 19 Age kwa sivanene oguhwe asi: “Nane mutwe gwange! Nane mutwe gwange!” Makura oguhwe tava tantere mukareli gwawo asi: “Mu damuna omu tware kozina.” 20 Age ta mu damuna a mu tware kozina. Ozina kwa mu tulire pomatungi gawo dogoro metaha, makura ta fu. 21 Konyima mukadi ogo ta twara munendi a ka mu rangeke pombete zomuporofete gwaKarunga gousili, makura ta zedire kevero, ta ka za ko. 22 Mukadi ogo ta zigida mugara gwendi, ta mu tantere asi: “Na kanderere pulisira nge ni ze usimbu komuporofete gwaKarunga gousili kumwe nomukareli gumwe ntani nosindongi simwe. Konyima ngani ka tengura.” 23 Age ta mu limburura asi: “Morwasinke ono harere kuza kwendi naina? Aso kapisi sipito sokwedi kokupe ndi ezuva lyesabata.” Nye mukadi ta mu limburura asi: “Wa ha kara nosinka, nayinye yiwaawa.” 24 Makura mukadi ta wapaike sindongi sendi ntani ta tantere mukareli gwendi asi: “Genderera usimbu, wa ha ndindira nge ntudi dogoro ni ku tantere.”
25 Makura ta zi komuporofete gwaKarunga gousili koNdundu zaKarumeli. Muporofete gwaKarunga gousili apa ga mwene mukadi ogo koure, ta tantere mukareli gwendi Gehasi asi: “Tara! Mukadi gomoSunemu gogwina. 26 Duka o ka mu pure omu ana karere namugara gwendi ntani namunendi.” Mukadi gomoSunemu ta ka limburura asi: “Nayinye yiwaawa.” 27 Apa ga ya sikire mukadi ogo komuporofete gwaKarunga gousili kondundu, ta kwata muporofete konompadi dendi. Makura Gehasi ta mu hedere yipo a mu zundure. Nye muporofete gwaKarunga gousili ta mu tantere asi: “Mu siga, yeeyi age kuna kara noudigu, nye ame kapi nina u diva, yeeyi Jehova kapi ana u tantere nge.” 28 Mukadi ogo ta mu tantere asi: “Ame kapi na kuhundilire o pe nge munona gomumati ntani na ku tanterere asi: ‘Wa ha pa nge ehuguvaro lyomawoko-woko.’”
29 Muporofete ta tantere Gehasi asi: “Limanga yikoverero yoge mombunda ntani gusa mpango zange o ze. Nsene no ligwanekera nomuntu, kapisi o mu morore. Ano nsene gumwe na kumorora kapisi o mu limburure. Zende o ka ture mpango zange posipara somumati.” 30 Makura ozina womumati ogo tava tanta asi: “Tani gana kwaJehova Karunga goMunamwenyo ntani koge asi ame kapi nani kusiga.” Makura muporofete ta katuka, ta zi kumwe nomukadi ogo. 31 Gehasi kwa pitire komeho zawo makura ta ka tura mpango posipara somumati, nye kwato eyi ya likidire asi mumati ogo muzuni. Makura ta ka tengura a ya gwane Elisa, ta mu tantere asi: “Mumati kapi ana pinduka.”
32 Apa ga hwililire Elisa monzugo, ta ka gwana mumati pombete zendi age ana fu. 33 Elisa ta hwilire monzugo, ta zedire ko. Awo kwa kere mo tupu vavali, makura Elisa ta kanderere kwaJehova. 34 Makura Elisa ta rondo pombete ta wombomana pomunona, ta tura kana kendi kokana komunona ntani meho gendi ta ga nwike meho gomunona. Age kwa mu kwete hena komawoko gendi ntani ta twikire kuwombomana pomunona dogoro rutu rwendi ta ru genye. 35 Age kwa gendagwire monzugo ta rondo pombete ntani ta wombomana hena pomumati. Mumati ta wetjumwisa yikando ntambali, ano konyima ta pahuka. 36 Elisa makura ta zigida Gehasi, ta mu tantere asi: “Ka zigide ozina.” Makura Gehasi ta ka va zigida, tava wiza kwaElisa. Ano Elisa ta va tantere asi: “Damuna munoge.” 37 Apa va hwililire mo ozina, tava ligandere konompadi dendi ntani tava linyongamene komeho zendi. Ano konyima tava damuna munawo, tava pwaga.
38 Apa ga tengwire Elisa koGiligali, ta ka gwana mosirongo erumbu lina kara mo. Vana wovaporofete kwa hingilire komeho zendi, makura Elisa ta tantere mukareli gwendi asi: “Tenteka kayiga kokanene pomundiro o terekere muhoka vana wovaporofete.” 39 Gumwe govana wovaporofete ta zi ponze zositata a ka rembe ehidi, makura ta ka gwana sitji somowiza ta gusa ko enyango lyako ntani ta li tura posikoverero sendi. Makura ta tengura ta ka yi tetagwira mokayiga komuhoka, ga hana kuyidiva asi ayo yininke musinke. 40 Konyima ta gava muhoka ogo kovana wovaporofete va lye. Nye tupu va lire muhoka ogo, tava zigire asi: “Ove muporofete gwaKarunga gousili, uhungu una kara mokayiga.” Awo kapi va gu lire hena. 41 Makura Elisa ta tanta asi: “Retereni nge usura.” Apa va u retere, age ta u tura mokayiga ntani ta tanta asi: “Peni vantu va lye.” Ano mokayiga kapi mwa kere hena uhungu.
42 Mugara gumwe kwa wizire a tunde koBara-salisa. Age kwa reterere muporofete gwaKarunga gousili nomboroto 20 dombuto* zomuzangu gokuhova nonsako zombuto zompe. Makura Elisa ta tanta asi: “Di gava kovantu va lye.” 43 Nye mukareli gwendi ta tanta asi: “Edi nondya kapi tava di gwaneke vantu 100.” Elisa ta mu tantere asi: “Di gava kovantu va lye, yeeyi Jehova kuna kutanta asi: ‘Awo nava lya ntani nava hupisa po.’” 44 Makura age ta di va pe, ano awo tava li ntani tava hupisa po, ngwendi moomu ga yi tente Jehova.