Ehistoli lyauvali
28 Ahasi kwa kere nonomvhura 20 apa ga kere hompa ntani kwa pangerere moJerusarema nomvhura 16. Age kapi ga rugene yininke youhunga kosipara saJehova, ngwendi moomu ngava yi rugana ozinakuru Ndafita. 2 Nye age kwa honenene vahompa woVaisraeli ntani kwa rugene mafano gaBara goyivera. 3 Age hena nga gava nonzambo* moMuramba gwaHinomu* ntani nga zamba vana vendi momundiro ngwendi moomu ngadi yi rugana nomuhoko edi ga tjidire Jehova komeho zoVaisraeli. 4 Age nga zamba hena nonzambo komavango aga ngava karere yikarunga yoyimpempa gokonondundu, konondundugona ntani moyitji yoyinene.
5 Makura Jehova Karunga ta mu gava momawoko gahompa gwaSiliya. Awo kwa mu fundire ntani kwa kwete vantu wovanzi tava va twara koDamasikusi. Karunga kwa mu geve hena momawoko gahompa goVaisraeli ogu ga dipagere vantu vaAhasi wovanzi. 6 Posiruwo oso, Peka munaRemaliya kwa dipagere vagara wouradi 120 000 mosirongo sorudi rwaJuda mezuva limwe tupu, yeeyi awo kwa sigire Jehova Karunga gozinyakurwawo. 7 Ano Sikili gomoruvharo rwaEfurayimi ogu ga kere mukwayita, kwa dipagere Maseya munahompa ntani kwa dipagere Asilikamu ogu nga pakere mbili mbara* naElikana ogu nga vatere hompa. 8 Vaisraeli kwa ka kwete hena vakadi novanona 200 000 womorudi rwaJuda ntani awo kwa ka kwete emona lyenzi, makura tava li twara koSamaliya.
9 Nye moSamaliya mwa kere muporofete gwaJehova gedina Odedi. Apa ga mwene vakwayita kuna kuwiza moSamaliya, ta zi komeho zawo ta va tantere asi: “Jehova Karunga gozinyakurweni kwa handukilire vantu womorudi rwaJuda, yiyo ana va gavere momawoko geni ntani one kuna va dipaga nonyanya dogoro Karunga ana yi zuvhu. 10 Ano ngesi one muna hara kuninka vantu womoJerusarema nava va tunga moyitata yapeke yomoJuda va kare vakareli veni wovagara nava wovakadi. Nye none mwa zona kwaKarunga gweni Jehova. 11 Purakeneni nge ntani tengwideni vakweni womorudi rwaJuda ava mwa ka kwata, yeeyi Jehova ana handuka unene morwa eyi muna rugana.”
12 Makura Asaliya munaJehohanani naBerekiya munaMesiremoto naJehisikiya munaSarumu ntani naAmasa munaHadirayi ava va kere masimbi gomorudi rwaEfurayimi, tava kondere ava va ka tundire koyita, 13 tava va tantere asi: “Mwa ha reta mositata vantu ava mwa ka kwata ngano nayi tu ninkisa tu kare nounzoni kwaJehova. Eyi muna hara kurugana tayi gwederere kounzoni wetu, yeeyi ose twa zona unene nare kwaKarunga ntani age ana tu handukire unene.” 14 Makura vakwayita owo tava gava vantu nemona eli va ka kwete kovapangeli ntani koVaisraeli navenye. 15 Makura vagara ava va horowere tava gusa vantu owo, tava gava yikovererero eyi va ka kwete kovantu vamwe ava va dilire yikovererero. Awo kwa va pere yikoverero, yicamakaku, nondya, yikunwa ntani nomagadi gokulikwita. Awo hena kwa rondekere poyindongi ava va dilire nonkondo, makura tava va twara kovakwawo ava va kere moJeliko, sitata soyitji yonongone. Konyima vagara owo tava tengura koSamaliya.
16 Posiruwo oso, hompa Ahasi kwa pulire evatero kovahompa vaAsiliya. 17 Vaedomu kwa homokerere hena vantu womorudi rwaJuda, makura tava twara vantu kounkwate. 18 Vafilisiti nawo kwa homokerere yitata yomoSefera naNegebu zomoJuda ntani kwa kwete sitata saBete-semesi, saAiyaroni, saGederoto, saSoko nonodoropa edi da si kundurukida, saTimuna nonodoropa edi da si kundurukida ntani saGimuso nonodoropa edi da si kundurukida, makura tava tungu moyitata oyo. 19 Jehova kwa tengekere vantu womorudi rwaJuda, morwa Ahasi hompa gwaIsraeli kwa ninkisire vantu womorudi rwaJuda va lizumbilire moyirugana yoyidona, ano eyi kwa va ninkisire va dire kulimburukwa Jehova.
20 Tiligata-pilinesere hompa gwaAsiliya kwa wizire a ya mu rwanese nokumuretera maudigu mevango lyokumuvatera. 21 Ahasi kwa gusire yininke eyi ya kere monzugo zaJehova nomombara* zahompa ntani neyi ya kere mononzugo dovapangeli, ta yi gava kwahompa gwaAsiliya ngouhwi, nye kapi ya mu vaterere. 22 Apa ga ligwanekerere nomaudigu, hompa Ahasi kwa zonene unene kwaJehova. 23 Age kwa tamekere kuzamba nonzambo koyikarunga yomoDamasikusi eyi ngava karere vantu ava va mu fundire ntani age kwa tente asi: “Mokumona asi yikarunga eyi ava karere vahompa woVasiliya kuvavatera, name tani zamba nonzambo koyikarunga yawo, yipo yi vatere nge.” Nye ayo kwa mu reterere maudigu noVaisraeli navenye. 24 Ahasi kwa pongaikire hena yininke eyi ngava ruganesa monzugo zaKarunga gousili, ta yi tetagura nokupata mavero gokonzugo zaJehova ntani ta dike yizambero yoyikarunga yoyimpempa moJerusarema mudima. 25 Age kwa dikire mavango gokukarera yikarunga yoyimpempa gokonondundu moyitata nayinye yorudi rwaJuda, yipo a zambere po nonzambo koyikarunga yapeke, ano eyi kwa handukisire Jehova Karunga gozinakuru.
26 Ano yininke yimwe eyi ga rugene Ahasi kutunda ketamekero dogoro kehagero, kwa yi tjanga mobuke zovahompa worudi rwaJuda novahompa woVaisraeli. 27 Konyima, Ahasi ta fu ngwendi ozinakuru, tava ka mu horeka mositata saJerusarema, yeeyi awo kapi va mu horekere mevango eli va horeka vahompa woVaisraeli. Ano munendi Hisikiya ta mu kwama mouhompa.