Ehistoli lyauvali
29 Hisikiya kwa kere nonomvhura 25 apa ga kere hompa ntani kwa pangerere moJerusarema nomvhura 29. Edina lyozina kwa kere Abiya munaSakaliya. 2 Age kwa twikilire kurugana yininke youhunga kosipara saJehova ngwendi moomu va yi rugene ozinakuru Ndafita. 3 Momvhura zokuhova zepangero lyendi mokwedi kokuhova, age kwa patwilire mavero gokonzugo zaJehova ntani ta ga wapukurura. 4 Makura ta ninki vapristeli noVarevhi va ponge mevango eli lya kere koUpumezuva wositata. 5 Age ta va tantere asi: “One Varevhi, purakeneni nge. Likuhureni ntani kuhureni nzugo zaJehova Karunga gozinyakurweni ntani guseni mo yininke yokunyata mevango lyokupongoka. 6 Yeeyi vaguhya vetu kapi va limburukwire ntani kwa rugene yininke yoyidona kosipara saKarunga gwetu Jehova. Awo kwa mu sigire ntani kapi va likidire efumadeko konkongoronzugo zaJehova. 7 Awo hena kwa pete mavero gokonzugo zokuhwililira zokontembeli ntani kwa dimisire noramba. Awo kwa hagekere kugava kwaKarunga goVaisraeli nonzambo noyitutumikidiso mevango lyokupongoka. 8 Yipo nye, Jehova kwa handukilire unene vantu womoJerusarema nava va tungire moyitata yapeke yomoJuda, makura tava retere maudigu yipo asi apa vantu ngava yi mona nokuyizuvha ngayi va tjilise nokuvatetukisa ntani ngava va sindagure ngwendi moomu muna kuyimona. 9 Eyi yiyo ya ninkisire ozinyakurwetu va va dipage norufuro ntani vana vetu novakadi vetu va va tware kounkwate. 10 Yipo nye, ame nina hara kutulisa po egwanekero* kumwe naJehova Karunga goVaisraeli yipo a hageke kutuhandukira. 11 Vakwetu esi kapisi siruwo sokupwizumuka, yeeyi Jehova kwa mu horowora mu sikame komeho zendi, mu mu ruganene ntani mu gave nonzambo.”*
12 Makura Varevhi tava zi va ka tameke sirugana sawo. Awo kwa kere: Mahati munaAmasayi naJowera munaAsaliya womoruvharo rwaKohati; Kisi munaAbudi naAsaliya munaJeharereli womoruvharo rwaMerali; Jowa munaSima naEdeni munaJowa womoruvharo rwaGeresoni; 13 Simuli naJeweli womoruvharo rwaElisafani; Sakaliya naMataniya womoruvharo rwaAsafa; 14 Jehiyeli naSimeyi womoruvharo rwaHemani ntani Semaya naUsiyeli womoruvharo rwaJedutuni. 15 Awo kwa tanterere vakwawo va ponge ntani tava likuhura vene. Makura tava wiza va ya kuhure nzugo zaJehova ngwendi moomu ga yi va pangerere hompa kuliza nonompangera daJehova. 16 Vapristeli tava zi monzugo zaJehova va ka zi kuhure. Awo kwa ka gusire mo yininke nayinye yokunyata eyi va ka gwene montembeli zaJehova, tava yi twara meharango lyokonzugo zaJehova. Konyima Varevhi tava yi gusa, tava yi twara ponze zositata moMuramba gwaKidironi. 17 Awo kwa tamekere kukuhura ntembeli mezuva lyokuhova lyokwedi kokuhova, ano mezuva lyauntantatu lyokwedi oko, tava kuhura nzugo zokuhwililira montembeli zaJehova. Awo kwa kuhwire hena nzugo zaJehova mazuva ntantatu aga ga kweme ko, ano mezuva 16 lyokwedi kokuhova, tava mana kukuhura ntembeli.
18 Konyima, tava zi kwahompa Hisikiya tava ka mu tantera asi: “Ose tuna mana kukuhura nzugo nazinye zaJehova, sizambero sononzambo deswakerero noyiruganeso yako nayinye ntani sitafura sonomboroto delikido noyiruganeso yako nayinye. 19 Ntani tuna wapaike nokukuhura yiruganeso eyi ga gusire hompa Ahasi montembeli posiruwo esi ga pangerere, apa ga dilire kulimburukwa ntani tuna yi tura komeho zosizambero saJehova.”
20 Makura hompa Hisikiya ta pinduka ngurangura zonene ta tantere vapangeli womositata va ponge kumwe, konyima tava zi konzugo zaJehova. 21 Awo kwa zire nonontwedu ntambali nononzwi donongara ntambali nononzwigona donongara ntambali ntani yikungwe ntambali, va ka yi gave ngonzambo zononzo yipo Karunga a gusire po hompa nepata lyendi novantu ava ava rugana kontembeli ntani vantu womorudi rwaJuda. Makura hompa ta tantere vapristeli womoruvharo rwaArona va yi zambe posizambero saJehova. 22 Awo kwa dipagere nongombe, makura vapristeli tava gusa honde tava zi nagere posizambero. Awo kwa dipagere hena nonzwi donongara, tava gusa honde tava zi nagere posizambero ntani konyima tava dipaga nonzwigona donongara tava gusa honde, tava zi nagere posizambero. 23 Awo tava twara hena yikungwe yonzambo zononzo komeho zahompa novantu, makura tava yi kambeke mawoko gawo. 24 Vapristeli tava yi dipaga makura tava gusa honde zayo tava zi gava ngonzambo zononzo posizambero, yipo Vaisraeli navenye va va gusire po nonzo dawo, yeeyi hompa kwa tente asi nzambo zeswakerero nonzambo zononzo kwa kere zoVaisraeli navenye.
25 Konyima, hompa ta tantere Varevhi va sikame konzugo zaJehova awo vana kwaterere nonkonkweso, yiumba noyisikiso yimwe ngwendi moomu ga yi va tanterere Ndafita naGada ogu nga tantere hompa mamoneko ntani muporofete Natana. Awo kwa gwene mavyukiso ogo kwaJehova kupitira movaporofete vendi. 26 Makura Varevhi tava sikama awo vana kwaterere yisikiso eyi ga rugene Ndafita, ano vapristeli kwa kwaterere nombendo.
27 Makura Hisikiya ta gava mpangera va gave nzambo zeswakerero posizambero. Apa va tamekere kugava nzambo zeswakerero, vantu tava tameke kudimbira Jehova ntani tava fudu nombendo ano vamwe kwa sikire yisikiso eyi ga rugene Ndafita hompa gwaIsraeli. 28 Apa va dimbire nokufuda nombendo, vantu kwa linyongamenene. Eyi kwa horokere dogoro tava mana kugava nzambo zeswakerero. 29 Apa va mene kugava nonzambo, hompa novantu navenye ava ga kere nawo tava linyongamene. 30 Makura hompa Hisikiya novapangeli tava tantere Varevhi va hamberere Jehova nononsumo daNdafita naAsafa ogu nga mono mamoneko. Awo makura tava dimbi awo vana hafa unene ntani tava linyongamene.
31 Makura Hisikiya ta tanta asi: “Mokumona asi one muna likuhura mu ruganene Jehova, wizeni mu ya gave nonzambo ntani nonzambo dompandu konzugo zaJehova.” Makura vantu tava reta nonzambo ntani nonzambo dompandu, ano vamwe kwa retere hena nonzambo deswakerero nomutjima nagunye. 32 Sivaro sononzambo deswakerero edi va retere vantu kwaJehova kwa kere nongombe 70, nonzwi donongara 100, nonzwigona donongara 200 33 nonongombe 600 ntani yikombo nononzwi 3 000 eyi va geve ngonzambo zokupongoka. 34 Nye vapristeli kapi va vhulire kuhuva nonzambo deswakerero yeeyi awo vasesu va kere, makura Varevhi vakwawo tava va vatere dogoro tava mana sirugana sawo ntani dogoro vapristeli wokuhupa ko tava mana kulikuhura, yeeyi Varevhi kwa kere noupampi wokulikuhura kupitakana vapristeli. 35 Nonzambo deswakerero nonzi unene da kere kukwatera mo magadi gononzambo dombili ntani nononzambo doyikunwa edi va geve kumwe nononzambo deswakerero. Kutunda opo, sirugana sokonzugo zaJehova ta si tameke hena. 36 Makura Hisikiya novantu navenye tava hafa unene kweyi ga va ruganenene Karunga gousili, yeeyi yininke oyo kwa yi rugene usimbu.