Ehistoli lyauvali
31 Apa va mene kudana sipito, Vaisraeli navenye ava va kere po kwa zire moyitata yorudi rwaJuda, tava ka zonagura po mamanya gokupongoka nokutetagura nongundi dokupongoka.* Awo kwa zonagwire po hena mavango gokukarera yikarunga yoyimpempa gokonondundu noyizambero mosirongo nasinye sorudi rwaJuda noru rwaMbenyameni ntani mosirongo sorudi rwaEfurayimi noru rwaManase. Konyima, Vaisraeli navenye tava tengura komambo gawo, moyitata omu va tungire.
2 Makura Hisikiya ta wapaike vapristeli noVarevhi kuliza nonombunga dawo, yipo va sikise mo sirugana esi va va pa. Awo kwa geve nonzambo deswakerero nononzambo dombili ntani awo kwa ruganenene Karunga nokumuhamberera pomavero gomaharango* gaJehova. 3 Hisikiya kwa geve yimuna yendi yimwe va yi gave ngonzambo zeswakerero ngurangura nongurova ntani ngonzambo zeswakerero ezi ngava gava mEsabata, poyipito yokwedi kokupe ntani poyipito hena yimwe, ngwendi moomu va yi tjanga moVeta zaJehova.
4 Age hena kwa pangerere vantu womoJerusarema va gave kovapristeli noVarevhi ruha oru va va pa, yipo va liture mo unene mokusikisa mo veta zaJehova. 5 Konyima zokuvapangera va rugane yininke oyo, Vaisraeli kwa geve yininke yoyinzi unene. Awo kwa geve muzangu gwawo gokuhova gonombuto, vhinyu zompe, magadi, usi ntani noyininke nayinye eyi va zangwire momapya gawo. Awo kwa retere yiumurongo yoyininke yawo nayinye. 6 Vaisraeli ntani novantu ava va tungire moyitata yorudi rwaJuda kwa retere hena yiumurongo yonongombe nononzwi ntani yiumurongo yoyininke yokupongoka eyi va geve kwaKarunga gwawo Jehova. Awo kwa yi retere ntani tava yi pongaike kumwe. 7 Awo kwa tamekere kupongaika yininke oyo mokwedi kwautatu, ano mokwedi kwauntambali tava mana kuyipongaika. 8 Konyima, Hisikiya novapangeli tava wiza, tava mono yininke eyi va pongaikire makura tava hamberere Jehova ntani tava tungike Vaisraeli.
9 Makura Hisikiya ta pura vapristeli noVarevhi kuhamena yininke eyi va pongaikire. 10 Ano Asaliya mukurona govapristeli gomoruvharo rwaSadoko ta mu limburura asi: “Kutunda apa vantu va tameka kureta yigava konzugo zaJehova, vantu kuna kulya dogoro tava kuta, nye simpe yinzi yina hupu po, yeeyi Jehova kwa tungika vantu vendi. Tara tupu unzi woyininke eyi yina hupu po.”
11 Makura Hisikiya ta va tantere va wapaike nonzugopungwiro* edi da kere monzugo zaJehova, ano awo tava di wapaike. 12 Vantu kwa twikilire kureta yigava, yiumurongo ntani noyininke yokupongoka. Ano Murevhi gedina Konaniya, yige nga pakere mbili yininke eyi ntani mumbyendi* Simeyi yige nga mu vatere. 13 Hompa Hisikiya kwa pangerere Jehiyeli naAsasiya naNahati naAsaheli naJelimoti naJosabadi naEliyeli naIsimakiya naMahati ntani naBenaya va vatere Konaniya namumbyendi Simeyi. Ano Asaliya yige nga pakere mbili nzugo zaKarunga gousili. 14 Murevhi gedina Kore munaImuna, ogu ga kere munomeni gekevero lyokoUpumezuva, nga pakere mbili yigava eyi ngava reta vantu kwaKarunga gousili ntani nga gavere kovapristeli yigava eyi ngava reta vantu kwaJehova noyininke yokupongoka unene. 15 Age nga pitisire Edeni naMiniyamini naJesuwa naSemaya naAmaliya ntani naSekaniya. Awo kwa va pere situmbukira sokugavera kovakwawo ava va tungire moyitata yovapristeli, yininke eyi ngava gava Vaisraeli. Awo kwa gaverere yininke eyi kovakondi nokovanona. 16 Awo kwa geve hena yininke eyi kovantu wonomvhura ntatu yikandwise, ava va tjenge kuliza nomazimo gawo, ava ngava wiza konzugo zaJehova nkenye ezuva va ya sikise mo situmbukira esi va pa mbunga zawo.
17 Vapristeli kwa va tjenge kuliza nomazimo gawo ntani kuliza noyitumbukira eyi va pere mbunga zawo, ngwendi moomu va tjenge Varevhi wonomvhura 20 yikandwise. 18 Mehistoli lyezimo lyawo kwa tjenge mo hena vana vawo, vakadi vawo ntani nekoro lyawo nalinye. Awo ngava divilisa asi vana pongoka, morwa awo ngava rugana sirugana sokupongoka. 19 Mehistoli lyezimo lyawo, awo kwa tjenge mo hena vapristeli womoruvharo rwaArona ava va tungire momavango gokulisira yimuna, aga ga kundurukidire yitata yawo. Moyitata yawo nayinye oyo, kwa horowere mo vagara wovasesu va gavere nondya kovapristeli ntani kovantu vemezimo lyoVarevhi ava va tjenge.
20 Hisikiya kwa rugene yininke eyi mosirongo nasinye sorudi rwaJuda. Age kwa twikilire kurugana yininke yoyiwa neyi youhunga komeho zaKarunga gwendi Jehova nokumulimburukwa. 21 Yininke nayinye eyi ga rugene mokukarera Karunga, yi kare asi yirugana yokonzugo zaKarunga gousili ndi kulimburukwa Veta, age kwa yi rugene nomutjima gwendi nagunye ntani kwa mu tompokere.