Ehistoli lyauvali
30 Hisikiya kwa tumine mbudi koVaisraeli navenye novantu womorudi rwaJuda ntani age kwa tjangerere hena nombilive vantu womorudi rwaEfurayimi naManase yipo va wize konzugo zaJehova moJerusarema, va ya danene Jehova Karunga goVaisraeli sipito soPaska. 2 Nye hompa novapangeli vendi ntani novantu navenye womoJerusarema kwa tokwere kudana sipito soPaska mokwedi kwauvali, 3 yeeyi vapristeli vamwe kapi va lizeresere vene ntani vantu kapi va pongere moJerusarema, yipo nye, awo kapi va vhulire kudana sipito oso posiruwo esi va tura po. 4 Hompa novantu navenye kwa haferere ewapaiko eli. 5 Makura tava tokora kudivisa vantu navenye moIsraeli, kutundilira koBere-seba dogoro koDana, yipo vantu va wize moJerusarema va ya danene Jehova Karunga goVaisraeli sipito soPaska, yeeyi awo kapi va dene sipito oso kumwe ngwendi moomu va yi tjanga.
6 Makura vantu* ava va tumine tava zi mosirongo saIsraeli nesi sorudi rwaJuda, va tware nombilive edi da tundire kwahompa novapangeli vendi. Monombilive odo, hompa kwa tente asi: “One Vaisraeli, tengureni kwaJehova Karunga gwaAbirahamu naIsaka ntani naIsraeli yipo Karunga a tengure kweni one mwa hupa po, one mwa tjwayuka momawoko govahompa vaAsiliya. 7 Mwa ha honena ozinyakurweni ntani novakweni ava va dilire kulimburukwa Jehova Karunga gozinyakurwawo, makura yiyo ga va ninka va ligwanekere nomaudigu aga ga tjilisire vantu ava va yi mwene nokuyizuvha ngwendi moomu yina kuhoroka naina. 8 Mwa ha kara ngwendi ozinyakurweni ava ngava dili kuzuvha. Ligaveni kwaJehova ntani wizeni kontembeli zendi ezi ga kuhura dogoro narunye, mu ya karere Karunga gweni Jehova yipo nga hageke kumuhandukira. 9 Yeeyi nsene mu tengura kwaJehova, vantu ava va kwata vakweni novana veni, ngava va fira nkenda nokuvapulisira va tengure kosirongo esi, yeeyi Karunga gweni Jehova kwa kara nonkenda zonene ntani kapi nga mu sigilira nsene mu tengura kwendi.”
10 Makura vantu* ava va tumine tava zi tunda sitata zende sitata, mosirongo nasinye sorudi rwaEfurayimi ntani naManase ntani nampili mosirongo sorudi rwaSeburoni, nye vantu tava va zoro ntani tava va sindagura. 11 Nye vantu vamwe womorudi rwaAseli noru rwaManase ntani naSeburoni, kwa linunupikire tava wiza koJerusarema. 12 Karunga gousili kwa vaterere vantu womorudi rwaJuda va lize kumwe, va sikise mo mpangera zaJehova ezi va gwene kwahompa ntani kovapangeli.
13 Ano mbunga zonene kwa pongere kumwe moJerusarema, va dane sipito sonomboroto dokudira yihaheso mokwedi kwauvali. 14 Awo kwa gusire moJerusarema yizambero yoyikarunga yoyimpempa ntani noyizambero yoyitutumikidiso, tava ka yi zugumina moMuramba gwaKidironi. 15 Makura tava dipaga nzambo zoPaska mezuva 14 lyokwedi kwauvali. Vapristeli noVarevhi kwa lifire nomuga makura tava likuhura vene nokureta nonzambo deswakerero konzugo zaJehova. 16 Awo kwa sikeme pomavango gawo kuliza noVeta zaMosesa mukareli gwaKarunga gousili. Makura vapristeli tava nagere honde kosizambero ezi va va pere Varevhi. 17 Mombunga mwa kere vantu wovanzi ava va dilire kulikuhura, makura Varevhi tava dipaga nonzambo doPaska dovantu ava va dilire kukuhuka, yipo va kuhuke komeho zaJehova. 18 Yeeyi sinzi sovantu, unene po womorudi rwaEfurayimi, Manase, Isasikali ntani naSeburoni kapi va lizeresere vene. Nye awo kwa lire konzambo zoPaska nampili ngomu va yi silikire moveta, nye Hisikiya kwa va kanderere po. Age kwa tente asi: “Jehova Karunga gomuwa, ngano a gusire po 19 vantu navenye ava vana liwapaikire kukarera Jehova Karunga gousili, ogu ngava karere ozinyakurwawo, nampili ngomu va dira kulikuhura kuliza nonoveta edi va tura po, yipo va kare vana pongoka.” 20 Ano Jehova kwa purakenene kwaHisikiya, makura ta gusire po* vantu.
21 Makura Vaisraeli ava va kere moJerusarema tava dana sipito sonomboroto dokudira yihaheso mazuva ntambali awo vana hafa. Ano Varevhi novapristeli kwa hambererere Jehova nkenye ezuva ntani awo kwa sikire yisikiso mokuhamberera Jehova. 22 Hisikiya kwa korangedere hena Varevhi ava ngava karere nawa Jehova. Ano vantu kwa lire nawa mazuva nagenye ntambali gosipito ntani awo kwa geve nonzambo dombili nokupandura Jehova Karunga gozinyakurwawo.
23 Vantu navenye tava tokora kudana sipito oso mazuva hena ntambali. Awo kwa dene sipito oso awo vana hafa. 24 Hisikiya hompa gorudi rwaJuda kwa gaverere po vantu nontwedu 1 000 nononzwi 7 000. Ano vapangeli kwa gaverere po vantu nontwedu 1 000 nononzwi 10 000 ntani vapristeli wovanzi kwa lizeresere. 25 Vantu navenye womorudi rwaJuda kwa hefe, kukwatera mo vapristeli, Varevhi novantu navenye ava va tundilire moIsraeli novanayirongo ava va tundilire moIsraeli nomosirongo sorudi rwaJuda. 26 Vantu kwa hefe unene moJerusarema, yeeyi yininke yangesi kapi ya horoka rumwe moJerusarema, kutunda posiruwo saSaromo munaNdafita hompa goVaisraeli. 27 Konyima, Varevhi wovapristeli tava katuka va tungike vantu. Karunga kwa va zuvhire ntani age kwa zuvhire ekanderero lyawo meguru mevango lyokupongoka omu ga kara.