Ehistoli lyauvali
32 Konyima zapa ga mene Hisikiya kurugana yininke eyi, Senakelibu hompa gwaAsiliya ta wiza a ya homokere sirongo sorudi rwaJuda. Age kwa kundurukidire yitata eyi va kundurukida makuma, morwa kwa here kubomona makuma goyitata oyo yipo a yi kwate.
2 Apa ga mwene Hisikiya asi Senakelibu ana wiza a ya rwise vantu womoJerusarema, 3 ta pura magano kovapangeli vendi novakwayita vendi, makura ta tokora kusitika marunone gomema aga ga kere ponze zositata, makura awo tava mu kwatesa ko. 4 Vantu wovanzi kwa pongere kumwe, makura tava sitike marunone gomema aga ngaga pupire mosirongo, tava tanta asi: “Kapi tuna hara vahompa woVaasiliya va ya gwane mema gomanzi.”
5 Age hena kwa tungwilire makuma aga ga bomaukire nokutungira po maruhungu ntani kwa tungire ponze zositata ekuma lyapeke. Age kwa wapaikire hena ndundu* ezi za kere moSitata saNdafita ntani kwa rugene yirwiso yoyinzi noyilikandwiso. 6 Konyima ta horowora vapitisili wovakwayita va pitisire vantu, tava va ninki va ponge ponze zevero lyositata, makura ta va korangeda asi: 7 “Kareni nouradi ntani koreni. Mwa ha tukuka ndi mu tjire hompa gwaAsiliya novantu wovanzi ava vana kara kumwe nage, yeeyi ava vana hama kwetu vanzi kupitakana ava vana hama kwendi. 8 Age kuna huguvara mononkondo* dovantu, nye ose kuna huguvara mwaKarunga gwetu Jehova a tu vatere ntani a tu rwire po yita.” Ano vantu kwa nkondoparere apa va zuvhire nonkango daHisikiya hompa gorudi rwaJuda.
9 Konyima, Senakelibu hompa gwaAsiliya kwa kere moRakisi kumwe novakwayita vendi wononkondo, makura ta tumu vakareli vendi kwaHisikiya hompa gorudi rwaJuda ntani nokoVajudeya ava va tungire moJerusarema va ka va tantere asi:
10 “Senakelibu hompa gwaAsiliya kuna kutanta asi: ‘Kweli muna huguvara eyi muna karere moJerusarema nampili ngomu vana zi kundurukida ndi? 11 Hisikiya kuna kumukumbagera pokumutantera asi Karunga gweni Jehova nga mu popera momawoko gahompa gwaSiliya. Age na mu hwedesa mu fe konzara nenota. 12 Nani Hisikiya kapisi yige ga zonagwire mavango gokonondundu aga ngomu karere Karunga gweni noyizambero yendi, makura konyima a tantere vantu womoJerusarema nava va tunga moyitata yapeke yomoJuda asi mwa hepa kukarera Karunga gweni kosizambero simwe tupu nokugavera po nonzambo ndi? 13 Nani kapi mwa zuvha eyi na rugene ntani eyi va rugene omama vantu wokonomuhoko dapeke ndi? Vakarunga wonomuhoko odo kapi va vhulire kuvapopera mokuwoko kwange. 14 Omama kwa zonagwire po nomuhoko dononzi ntani kwato Karunga ogu ga vhura kupopera vantu vendi mokuwoko kwange. Yisinke nye eyi yina kumuninkisa mu gazare asi Karunga gweni kuvhura a mu popere mokuwoko kwange? 15 Mwa ha pulisira Hisikiya a mu kumbagere ntani a mu pukise. Mwa ha mu huguvara, yeeyi kwato karunga ogu ava karere vantu wokonomuhoko ndi hompa ogu ga vhura kupopera vantu vendi mokuwoko kwange ndi mokuwoko komama. One nyone nye na popera Karunga gweni mokuwoko kwange ndi!’”
16 Vakareli vaSenakelibu nawo kwa swawire Jehova Karunga gousili nomukareli gwendi Hisikiya. 17 Senakelibu kwa tjenge hena nombilive a swaure Jehova Karunga goVaisraeli ntani a mu uyunge momudona. Monombilive odo, age kwa tente asi: “Karunga gwaHisikiya kapi nga popera vantu vendi mokuwoko kwange ngwendi moomu tupu vakarunga wokonomuhoko dapeke va dilire kupopera vantu vawo mokuwoko kwange.” 18 Vakareli vaSenakelibu kwa twikilire kuzigira vantu womoJerusarema ava va kere keguru lyekuma meraka lyoVajuda va va tjilise ntani va va tukukise, yipo va kwate sitata sawo. 19 Awo kwa swawire Karunga ogu ngava karere vantu womoJerusarema ngwendi moomu va swawire yikarunga eyi ngava karere vantu wokonomuhoko dapeke, eyi va rugana nomawoko. 20 Nye hompa Hisikiya nomuporofete Jesaya munaAmosi kwa twikilire kukanderera kuhamena yininke eyi ntani kwa likwamberere kwaKarunga ogu ga kara meguru, yipo a va vatere.
21 Makura Jehova ta tumu muengeli, ta ka dipaga vakwayita navenye wononkondo novapitisili ntani nomupitisili govakwayita ogu ga kere mokamba zahompa gwaAsiliya, makura hompa gwaAsiliya ta tengura kosirongo sendi neswau. Konyima ta ka hwilira montembeli zakarunga gwendi, ano vana vendi vamwe tava mu dipaga norufuro. 22 Yipo nye, Jehova kwa poperere Hisikiya novantu ava va tunga moJerusarema kwaSenakelibu hompa gwaAsiliya ntani kononkore dawo nadinye, makura mosirongo ta mu kara mbili. 23 Ano vantu wovanzi kwa retere mauhwi kwaJehova moJerusarema noyininke yoyiwa kwaHisikiya hompa gorudi rwaJuda. Kutunda opo, vantu wokonomuhoko nadinye kwa fumadekere unene Hisikiya.
24 Konyima, Hisikiya kwa verere dogoro ta hara kufa makura ta kanderere kwaJehova. Ano Karunga ta mu limburura ntani ta mu likida sidiviso. 25 Nye Hisikiya kapi ga likidire rupandu koyininke yoyiwa eyi va mu ruganenene yeeyi age kwa linenepekere, makura Karunga ta handukire Hisikiya novantu womoJerusarema nava va tungire moyitata yapeke yomoJuda. 26 Konyima, Hisikiya ta hageke kulinenepeka. Age ta linunupike kumwe novantu ava va tunga moJerusarema. Ano Jehova kapi ga va handukilire hena posiruwo saHisikiya.
27 Hisikiya kwa ya kere nemona lyenzi ntani kwa ya fumanene. Age kwa tungire nonzugo dokupungwira siliveli, ngorodo, mamanya gomulyo, magadi gobalisemu, yilikandwiso ntani noyipako nayinye yoyiwa. 28 Age kwa dikire hena nonzugo dokupungwira nombuto, vhinyu zompe, magadi ntani nohambo doyimuna yokulisiga-siga noyinyongo yononzwi noyikombo. 29 Age kwa tungire hena yitata ntani kwa kere noyimuna yoyinzi kukwatera mo nongombe, nonzwi ntani yikombo, yeeyi Karunga kwa mu pere emona lyenzi. 30 Hisikiya yige ga sitikire mema gomoGihoni nokuganinka ga kunkumuke ga ze koUtokero woSitata saNdafita. Yininke nayinye eyi ga rugene Hisikiya kwa mu tompokere. 31 Nye apa vapangeli womoBabironi va tumine vantu kwaHisikiya, va ka mu pure kuhamena sidiviso esi sa monekere mosirongo, Karunga gousili kwa mu sigire a mu heteke, a tare eyi ya kere momutjima gwendi.
32 Ano yininke yimwe eyi ga rugene Hisikiya nomu ga likidire eharo lyanarunye, kuyigwana momamoneko aga ga tjenge muporofete Jesaya munaAmosi ntani kwa yi tjanga mobuke zovahompa worudi rwaJuda ntani vahompa woVaisraeli. 33 Konyima, Hisikiya ta fu ngwendi ozinakuru, ano vantu ava va tunga moJerusarema nomoyitata yapeke yomoJuda kwa mu likidire efumadeko ntani awo kwa mu horekere kondundu pepi nevango oku va horeka vana vaNdafita wovagara. Ano munendi Manase ta mu kwama mouhompa.