Ehistoli lyauvali
33 Manase kwa kere nonomvhura 12 apa ga kere hompa ntani age kwa pangerere moJerusarema nomvhura 55.
2 Age kwa rugene yininke yoyidona kosipara saJehova pokuhonena eyi ngadi rugana nomuhoko edi ga tjidire Jehova komeho zoVaisraeli. 3 Age kwa wapukwilire mavango aga ngava karere yikarunga yoyimpempa gokonondundu, aga va zonagwire po oguhwe Hisikiya ntani kwa dikilire Bara yizambero nonongundi dokupongoka.* Manase nga nyongamene nombungururu ntani nga di karere. 4 Age kwa dikire hena yizambero monzugo zaJehova, ezi ga tente Jehova asi: “MoJerusarema yimo ngava fumadekera edina lyange dogoro narunye.” 5 Age kwa dikilire nombungururu yizambero momaharango gavali gokonzugo zaJehova. 6 Age kwa zembe vana vendi momundiro moMuramba gwaHinomu,* nga ruganesa umpure ntani kwa horowere vantu va uyunge novafe nokupumba. Age kwa rugene yininke yoyidona unene kosipara saJehova a mu handukise.
7 Age kwa tulire monzugo zaKarunga gousili efano eli ga rugene. Ano Karunga kwa tanterere Ndafita namunendi Saromo kuhamena nzugo ozo asi: “Monzugo ezi ntani mositata saJerusarema, esi na horowora mokatji komarudi goVaisraeli yimo ngava fumadekera edina lyange. 8 Nsene Vaisraeli ngava limburukwa nayinye eyi nava tantera, kukwatera mo Veta nonompangera edi nava pa kupitira mwaMosesa, ame kapi ngani va gusa hena mosirongo esi na pa ozinyakurwawo.” 9 Manase kwa twikilire kupukisa vantu womoJerusarema nava va tungire moyitata yapeke yomoJuda, va rugane yininke yoyidona unene kupitakana eyi ngadi rugana nomuhoko edi ga zonagwire Jehova komeho zoVaisraeli.
10 Jehova kwa twikilire kurondora Manase novantu vendi, nye awo kapi va yi pakerere mbili. 11 Makura Jehova ta va tumine vakurona wovakwayita vahompa gwaAsiliya, ano awo tava kwata Manase, tava mu tura nohake* nokumumanga nomauketanga gavali gongoporo, makura tava mu twara koBabironi. 12 Apa ga kere moudigu owo, ta likwambere kwaKarunga gwendi Jehova a mu fire nkenda ntani age kwa twikilire kulinunupika unene komeho zaKarunga gozinakuru. 13 Age kwa twikilire kukanderera kwaKarunga, ano Karunga ta zuvhu ekanderero lyendi, ta mu fire nkenda. Makura ta mu tengwida koJerusarema ntani ta mu tengwidire uhompa wendi. Konyima, Manase ta ya yi diva asi Jehova yige Karunga gousili.
14 Makura Manase ta tungu ekuma ponze zoSitata saNdafita. Alyo kwa kere koUtokero waGihoni kutundilira momuramba dogoro kErungavero lyoNomfi ntani dogoro koOfeli. Alyo kwa kere lyere unene. Age kwa horowere hena vapitisili wovakwayita moyitata nayinye yomoJuda eyi va kundurukida makuma. 15 Age kwa tanterere hena vantu va zugumine ponze zositata yikarunga yoyimpempa nomafano goyikarunga, eyi ya kere monzugo zaJehova ntani noyizambero nayinye eyi ga dikilire pondundu, apa za kere nzugo zaJehova neyi ya kere moJerusarema. 16 Age kwa wapaikire hena sizambero saJehova ntani ta tameke kuzambera po nonzambo dombili nedi dompandu, makura ta tantere vantu womorudi rwaJuda va karere Jehova Karunga goVaisraeli. 17 Nampili ngoso, vantu kwa ruganesere mavango gokukarera yikarunga yoyimpempa gokonondundu, va zambere po nonzambo kwaKarunga gwawo Jehova.
18 Ano yininke yimwe eyi ga rugene Manase nekanderero lyendi ntani nononkango edi va mu tanterere vantu ava ngava mono mamoneko, ava ga tumine Jehova Karunga goVaisraeli, kwa yi tjanga mehistoli lyovahompa woVaisraeli. 19 Ekanderero lyendi nomu ga mu limbwilire Karunga apa ga mu likwamberere, nonzo dendi nadinye nomu ga dilire kulimburukwa noku ga dikilire mavango gokukarera yikarunga yoyimpempa gokonondundu nonongundi dokupongoka* nomafano goyikarunga yoyimpempa eyi ga rugene komeho a linunupike, kwa yi tjanga moyininke eyi va tjenge vantu ava ngava mono mamoneko. 20 Makura Manase ta fu ngwendi ozinakuru, tava mu horeke pepi nembo lyendi, ano munendi Amoni ta mu kwama mouhompa.
21 Amoni kwa kere nonomvhura 22 apa ga kere hompa ntani age kwa pangerere moJerusarema nomvhura mbali. 22 Age kwa twikilire kurugana yininke yoyidona kosipara saJehova ngwendi moomu ngava yi rugana oguhwe Manase ntani Amoni nga gava nonzambo koyikarunga eyi va rugene oguhwe Manase ano age nga karere yikarunga oyo. 23 Age kapi ga linunupikire komeho zaJehova ngwendi moomu va linunupikire oguhwe Manase, nye age kwa twikilire kuzona unene. 24 Konyima, vakareli vendi tava mu gendi konhi makura tava mu dipagere membo lyendi. 25 Nye vantu womosirongo tava dipaga navenye ava va gendere hompa Amoni konhi, makura tava ninki munendi Josiya a mu kwame mouhompa.