Esimwititi 8
Makisi kontunda zevhu
NSENE o mona muntu ana kukuwizira age gomure gokusika posihokwa-hokwa sonzugo zeni, yinke no gazara? Muntu ogo ekisi! Posiruwo simwe pevhu nawa-nawa pwa kere makisi. Bibeli kwa likida asi vaguhya vago kwa kere vaengeli vemeguru. Nye eyi ngapi omu nayi vhura kukara?
Diworoka, muengeli gomudona Satana kwa kere age ta reta po maudigu. Age kwa hetekerere ko kuninka novaengeli vaKarunga vaava va kare wovadona. Konyima zosiruwo, vaengeli vamwe ava kwa tamekere kupurakena kwaSatana. Awo kwa hagekere yirugana eyi ga va pere Karunga va rugane meguru. Yipo va wizire pevhu nokuyaliruganena vene marutu gosintu. Ono diva asi morwasinke?
Bibeli kwa tanta asi morwa vana vaKarunga ava kwa mwene vakadi wovawa pevhu yipo va here kuyakara nawo. Yipo va wizire pevhu nokuyakwara vakadi ava. Bibeli kwa tanta asi eyi epuko, morwa Karunga kwa rugene vaengeli va paruke meguru.
Vaengeli ava novakadi vawo apa va retere vanona, vanona ava kwa likarerere. Pomuhowo awo nampo kapi va monekere namopeke. Nye awo kwa twikilire kukura tava nenepa, ntani tava ya kara wononkondo unene, dogoro va kere makisi.
Makisi aga kwa kere madona. Morwa ago kwa kere gomanene ntani gononkondo, ago ngaga rwadeke vantu. Ago ngaga sininike navenye asi va kare wovadona ngwendi gene.
Henoka ga fire, nye pevhu ngesi pwa kere mugara gumwe ogu ga kere gomuwa. Edina lyomugara ogu kwa kere Nowa. Age nkenye apa nga rugana eyi ga mu harerere Karunga asi yiyo na rugana.
Ezuva limwe Karunga ta tantere Nowa asi siruwo sina siki mo Age a ka zonagure po vantu wovadona navenye. Nye Karunga kwa kere mokukaparura Nowa nepata lyendi ntani noyikorama yoyinzi. Tu tareni asi ngapi omu Karunga ga yi rugene eyi.