Egaununo 11

Evatero lyokutunda kovaengeli vaKarunga

VANTU vamwe kutanta asi awo kupura tupu mweyi ava vhuru kumona. Nye owo ugova. Apo kwa kara po yininke yoyinzi eyi atu dili kumona nomeho getu. Kuvhura o tumbure ko simwe ndi?—

Ngapi kuhamena mpepo ezi atu hesere? Kuvhura kuzizuvha ndi?— Gonyonona kuwoko koge, makura fudira po. Ono zuvhu yuma ndi?— Ove ono zuvhu mpepo, nye kapi to vhuru kuzimona.

Twa zogera nare kuhamena vantu wopampepo, ava atu dili kumona. Ose twa lironga asi vamwe vawa nye vamwe vadona. Tumbura ko vantu vamwe wovawa wopampepo ava atu dili kumona.— Yimo, pwa kara Jehova Karunga naJesus ntani novaengeli wovawa. Koveli hena vaengeli wovadona ndi?— Bibeli kutanta asi koveli. Tantera nge eyi wa lironga kuhamena vaengeli ava.—

Sininke simwe esi twa diva kuna kara asi vaengeli navenye wovawa nava wovadona kwa kara nononkondo kutupitakana ose. Murongi goMunene ga divire yoyinzi kuhamena vaengeli. Morwa nage kwa kere muengeli komeho zokuyamuhampuruka ngomukeke pevhu. Age kwa parukire kumwe novaengeli vapeke meguru. Age ga divire mamiliyona govaengeli. Vaengeli navenye ava nomadina gawo ndi?—

Ose twa lirongere asi Karunga kwa pa nombungururu madina. Yipo nye ose kuvhura kuyihuguvara asi vaengeli navenye nomadina gawo. Ntani twa yi diva asi awo kuvhura kuuyunga novaengeli vakwawo morwa Bibeli kututantera kuhamena ‘eraka lyovaengeli.’ (1 Vakolinte 13:1) Omu ono kugazara, yokuhamena kosinke ava uyunga vaengeli? Awo kuuyunga yokuhamena kwetu ndi?—

Ose twa diva asi vaengeli vaSatana, ndi nompepo donondona, kuhetekera ko mokutuninkisa tu dire kulimburukwa Jehova. Yipo nye asi awo va hepa kuuyunga kuhamena omu nava vhura kuyirugana eyi. Awo kuna tu harere tu fane ngwendi yiwo yipo Jehova a dire nose kutuhara. Nye ngapi kuhamena vaengeli wovalimburukwi vaKarunga? Omu ono kugazara, nawo kuuyunga yokuhamena kwetu ndi?— Yimo, awo kuyirugana. Awo kuna hara kutuvatera. Tanko ni ku tantere ko omu vaengeli vamwe vaKarunga va vaterere vantu ava va here Jehova ntani nokumukarera.

Pasihonena, pwa kere mugara gumwe gedina Ndaniyera ogu ga tungire moBabironi. Sinzi sovantu ava va kere mo kapi va here Jehova. Vantu kwa tulire po veta zokutengeka nkenye ogu nga kanderere kwaJehova Karunga. Nye Ndaniyera kapi ga hagekere kukanderera kwaJehova. Ono diva asi yinke va rugene Ndaniyera?—

Vantu wovadona kwa ninkisire va zugumine Ndaniyera mekero lyovanyime. Ndaniyera kwa kere mo gelike novanyime wonzara. Ono diva asi yisinke ya horokere kutunda opo?— Ndaniyera kwa tente asi: ‘Karunga kuna tumu muengeli a ya kumateke tuna tovanyime.’ Age kapi va mu zuvhisire kukora nampili nakauke! Vaengeli kuvhura kuruganena owo ava karere Jehova yininke yoyiwa unene.—Ndaniyera 6:18-22.

Posiruwo simwe Peturusa kwa kere modorongo. Diworoka asi Peturusa kwa kere kaume koMurongi goMunene, Jesus Kristusa. Vantu vamwe kapi va yi here apa Peturusa ga va tanterere asi Jesus MunwaKarunga. Awo makura tava tura Peturusa modorongo. Awo kwa tulire ko vakwayita mokunomena Peturusa asi ga ha tjwayuka mo. Pweli gumwe ogu ngano ga vhulire kumuvatera ndi?—

Peturusa kwa rere pokatji kovakwayita vavali, ntani kwa mu menge nomalyenge komawoko. Bibeli kutanta asi: ‘Ga tara ko, muengeli gwaJehova ana wiza, uzera tau tameke kuminikira monzugo. Muengeli ta gumu Peturusa monompatji, ta mu pindura, ta tanta asi: “Pinduka usimbu!”’

Makura, malyenge taga gu ko komawoko gaPeturusa! Ano muengeli ta mu tantere asi: ‘Dwara erwakani nononkaku doge, makura o kwame nge!’ Vakwayita kapi va vhulire kuvakondera morwa muengeli kwa vaterere Peturusa. Apa va ya sikire pevero lyosivera, makura tapa horoka sininke sokutetukisa. Evero tali lizegurura lyene. Muengeli gwina kwa mangwilire Peturusa yipo a vhure kutwikira kuzuvhisa.—Yirugana 12:3-11.

Vaengeli vaKarunga kuvhura kutuvatera nose ndi?— Yimo, awo kuvhura. Eyi kuna kutanta nye asi awo kapi ngava tu pulisira mokutukoresa ndi?— Hawe, vaengeli kapi ava tu kondere mokudira kutukoresa nsene tatu rugana yininke yougova. Nye nampili kapi tuna kurugana yininke yougova, ose kuvhura kutukoresa. Vaengeli kapi ava va tantere mokukandana po yininke eyi mokuhoroka. Nye, Karunga kwa va pa sirugana sokulikarera va rugane.

Bibeli kwa uyunga kuhamena muengeli ogu ana kutantera vantu nakunye mokukarera Karunga. (Ehororo 14:6, 7) Ngapi omu muengeli a yi rugana oyo? Age kuzigira nye kutundilira meguru yipo navenye va vhure kumuzuvha ndi?— Hawe, vasikuli vaJesus vepevhu kutantera ko vapeke kuhamena Karunga, ntani vaengeli kuvapitisira mosirugana sawo. Vaengeli kudivilisa asi ava vana hara kudiva sili kuhamena Karunga va gwane mpito mokuzizuvha. Ose kuvhura kulihameka mo mosirugana sina sokuzuvhisa, ntani vaengeli ngava tu vatera.

Nye ngapi nsene vantu ava va dira kuhara Karunga va tu retera maudigu? Ngapi nsene va tu tura modorongo? Vaengeli ngava tu mangurura ndi?— Awo kuvhura kuyirugana, nye kapi ava yi rugana nkenye apa.

Sikando simwe Paurusa, musikuli gwaJesus, kwa kere modorongo. Age kwa gendere nosikepa mekundungu lyedona. Nye vaengeli kapi va mu mangwilire poopo. Morwa pwa kere vantu vapeke ava va hepere kuzuvha yokuhamena kwaKarunga. Muengeli kwa mu tanterere asi: “Neisi no tjilira, Paurusa. Kosipara sahompa gwaRoma yiko tupu ngo ka sikama.” Paurusa va hepere kumutwara komupangeli gwaRoma yipo a ka mu zuvhisire. Vaengeli va divire nkenye apa oku nga kara Paurusa, ntani awo ngava mu vatere. Nose ngava tu vatera nsene tu karera sili Karunga.—Yirugana 27:23-25.

Kosili hena sirugana simwe somulyo esi ngava rugana vaengeli, ntani awo ntaantani tupu ngava si rugane. Siruwo saKarunga sokuzonagura po vantu wovadona pepi sina kara. Navenye ava ava dili kukarera Karunga gosili ngava va zonagura po. Ava ava tanta asi awo kapi va pura movaengeli morwa kapi ava va mono, ngava nongonona asi mepuko va kara.—2 Vatesaronika 1:6-8.

Yisinke ngayi tanta oyo kwetu?— Nsene ose kwa hamena koruha rovaengeli vaKarunga, awo ngava tu vatera. Nye ose koruha rwawo twa hamena ndi?— Ose yiko twa hamena, nsene tu karera Jehova. Ano nsene ose kukarera Jehova, ngatu tantera ko vapeke nawo va mu karere.

Mokulironga ko yoyinzi omu vaengeli ava kundama maparu govantu, resa mEpisarome 34:7; Mateusa 4:11; 18:10; Rukasa 22:43; ntani Yirugana 8:26-31.

[Efano pepenuno 63]

Yisinke ga rugene Karunga mokuparura Ndaniyera?

[Efano pepenuno 64]

Ngapi omu muengeli ga vaterere Peturusa mokupwaga mo modorongo?

[Efano pepenuno 66]

Yisinke muengeli ana kutantera Paurusa?