Esimwititi 40
Mosesa ta toona pemanya
NOMVHURA nonomvhura tadi piti po—nomvhura 10, nomvhura 20, nomvhura 30, nomvhura 39! Vaisraeli simpe ha va karera momburundu. Nye nomvhura nadinye edi Jehova ta pakere vantu vendi mbili. Age ta va rere nomana. Mutenya ta va pitisire nongundi zeremo, ano masiku nongundi zomundiro. Monomvhura nadinye edi yikoverero yawo kapi yina kukurupa ntani nompadi dawo kapi dina kuzuvha kukora.
Ngesi kuna kara nye kwedi kokuhova komomvhura zo-40 kutunda apa va pwege moEgipite. Vaisraeli tava ya dike hena kamba zawo poKadesi. Apa yipo va kere apa nondadi 12 va di tumine di ka nenge sirongo saKanani konyara nomvhura 40 komeho zeyi. MukurwaMosesa Miliyama ta fire poKadesi. Ano ngomuhowo, apa tapa katuka maudigu.
Vantu kapi vana kugwana mema. Makura tava tangwinine Mosesa asi: ‘Ayo ngano hansa ngano asi kwa fa. Morwasinke wa tu gusira moEgipite o tu rete mevango eli lyedona omu amu pili kumena yuma? Amo mutupu nombuto nekuzu nomandjembere nonondunga. Amo hena mutupu nampili mema gokunwa.’
OMosesa naArona apa vana zi konkongoronzugo va ka kanderere, Jehova ta tantere Mosesa asi: ‘Pongekeni mbunga. Ano komeho zazo uyungiseni emumanya olyo. Mema gokugwanena vantu noyikorama yawo naga pwaga mo mwalyo.’
Mosesa makura ta pongaike vantu nokutanta asi: ‘Purakeneni one ava omu pili kuhuguvara mwaKarunga! Ame naArona kuvhura nye tu mu gusire mema memanya eli ndi?’ Mosesa makura ta toona pemanya nompango yikando yivali, ano memanya tamu powomoka mema. Mema taga gwanene vantu navenye ntani noyikorama nayinye.
Nye Jehova ta handukire Mosesa naArona. Ono diva asi morwasinke? Morwa Mosesa naArona kwa tente asi awo tava ka gusa mema memanya. Nye mousili Jehova yige ga yi rugene. Jehova yipo ga tente asi ta ka tengeka oMosesa naArona morwa awo kapi va tente usili kuhamena eyi. Age ta tanta asi: ‘One kapi ngomu twara vantu vange moKanani.’
Vaisraeli makura tava tundu poKadesi. Konyima zosiruwogona tava ya siki pondundu zaHoro. Apa, keguru-guru lyondundu, Arona ta fu. Apa ga fire age ana kara nonomvhura 123. Vaisraeli kwa guvire unene, makura vantu navenye tava lili Arona mazuva 30. Munwendi Eliyasara ta kwama ko mokukara mupristeli gomunene komuhoko gwaIsraeli.
Numeri 20:1-13, 22-29; Deuteronomium 29:5.