Esimwititi 39
Mpango zaArona tazi mene nombya
TO MONO nombya nonomandeli dokupya odo dina kumena kompango ezi. Ezi kuna kara mpango zaArona. Nombya nenyango lyokupya eli kwa menene kompango zaArona momasiku gamwe tupu! Tu tareni asi morwasinke.
Vaisraeli vana gendagura momburundu siruwo sosire. Vantu vamwe kuna kugazara asi Mosesa ga ha kara hena mpitisili, ntani asi Arona kapisi a kare mupristeli gomunene. Vamwe ava vana kugazara ngesi kuna kara Kora naDatani naAbiramu ntani novampitisili wovantu 250. Ava tava wiza kwaMosesa nokumutantera asi: ‘Morwasinke o lizerwire o tu pitakane ose natuvenye?’
Mosesa ta tantere Kora novakwami vendi asi: ‘Mungura ngurangura ngomu guse yipana yomundiro nokutura po manganganga gokututumikidisa. Makura ngomu wize konkongoronzugo zaJehova. Ngatu mona asi yilye ogu nga horowora Jehova.’
Ezuva lyokukwama ko Kora novasikuli vendi 250 tava wiza konkongoronzugo. Vamwe hena wovanzi nawo tava wiza va ya kwatese ko vagara ava. Jehova ta handuka unene. Mosesa makura ta tanta asi: ‘Liporeni ko konotenta dovantu ava wovadona. Mwa ha guma kwankenye kaninke aka va weka.’ Vantu tava purakene, makura tava lipora ko konotenta doKora naDatani naAbiramu.
Mosesa ta tanta asi: ‘Apa yipo nomu divira asi yilye ogu ga horowora Jehova. Evhu nali zahama nokumina po vantu ava wovadona.’
Tupu ga mene Mosesa kuuyunga, evhu tali zahama. Tenta zaKora neyi ga weka ntani naDatani naAbiramu ntani nava va kara nawo tava gwire mo nawo, makura evhu tali limbandwire kontunda zawo. Vantu apa vana kuzuvha nomutaku dowo vana kugwira mevhu, tava takuma asi: ‘Tu dukeni, evhu neisi nali tu mina nose!’
Kora novasikuli vendi 250 simpe va kerera pepi nonkongoronzugo. Jehova makura ta tumu mundiro, ano navenye makura tava va hwike po. Jehova makura ta tantere munaArona Eliyasara a guse yipana yomundiro yovantu ava va fire nokuyirugana sipereki sokukudumikisa sizambero. Sikudumikisa sizambero esi kwa kara erondoro koVaisraeli navenye asi Arona novana vendi yiwo velike nava kara vapristeli kwaJehova.
Nye Jehova kuna hara kuyizeresa nawa asi Arona novana vendi yiwo ga horowere va kare vapristeli. Ta tantere Mosesa asi: ‘Ninka nkenye mugendesi gorudi romoIsraeli a rete mpango zendi. Korudi rwaRevhi, ninka Arona a rete mpango zendi. Tura nye nompango edi monkongoronzugo komeho zosikesa segwanekero. Mpango zomugara ogu nani horowora a kare mupristeli tazi mene nombya.’
Mosesa apa ana ka tara ngurangura zokukwama ko, hawe, mpango zaArona zina hokere nonombya ntani nonomandeli dokupya dina mene ko! To mono nye asi morwasinke Jehova ga ninkisilire mpango zaArona zi mene nombya?
Numeri 16:1-49; 17:1-11; 26:10.