Ruha 4

Hompa gwaIsraeli gokuhova dogoro kounkwate moBabironi

Sauru kwa kere hompa gwaIsraeli gokuhova. Nye Jehova kwa mu nyokere, ano Ndafita yipo va mu horowere a kare hompa mevango lyendi. Tatu lirongo yininke yoyinzi kuhamena Ndafita. Ngomudinkantu, age kwa rwanesere ekisi Golyata. Konyima age kwa tjwayukire hompa Sauru gomfudu. Ano Abigayili gosipa sosiwa ta mu kondere kokurugana sininke sosidona.

Kutunda opo tatu lirongo yoyinzi kuhamena munwaNdafita Saromo, ogu ga gusire evango lyaNdafita ngahompa gwaIsraeli. Vahompa vaIsraeli wokuhova vatatu navenye kwa pangerere nkenye ogu nomvhura 40. Konyima zonomfa daSaromo, Israeli kwa ligaunukire momauhompa gavali, uhompa wokoMuzogo ntani nou wokoMbindakano.

Uhompa wokoMuzogo womarudi 10 kwa kere nomvhura 257 komeho zokuyauzonagura po Vaasiliya. Ano konyima zonomvhura 133, uhompa wokoMbindakano womarudi gavali nawo kwa ya u zonagwire po. Siruwo esi Vaisraeli kwa va twere mounkwate koBabironi. Ruha RWAUNE kwa kwatakana histoli zonomvhura 510, mosiruwo esi yihorokwa yimwe yokuhafesa yina kutumonekera.