Egaununo 32

Yininke musinke va pulisira mEsabata?

ALYO kwa kere hena Esabata apa ga ka dingwire Jesus sinagoge zopopepi nEkurudiva lyaGalireya. Amo kwa kere mo mugara ogu ga fa kuwoko. Valirongi womatjangwa noVafalisayi kwa tarerere Jesus nsene asi na mu verura. Moruhura makura tava mu pura asi: “MEsabata kuvhura kuverura mo muntu ndi?”

Vampitisili womaukarelikarunga goVajuda kwa pulire asi everuro kulipulisira mEsabata ntudi nsene eparu kuna kara mosiponga. Pasihonena, awo ngava rongo asi mEsabata kapi va pulisilire kudinga ndi kuvyura sisupa sina teka. Valirongi womatjangwa noVafalisayi kwa puragerere Jesus asi va gwanene po yokumupesa usima.

Nye, Jesus kwa divire magazaro gawo. Age ga nongwenene hena asi awo kwa kere nomagano gosintu gepuko kombinga zoyirugana eyi va silikire mEsabata. Makura Jesus ta tantera mugara ogu ga kere nokuwoko kokufa asi: “Katuka o wize pokatji kovantu.”

Jesus ta tantere valirongi womatjangwa noVafalisayi asi: “Opo muna kara pokatji keni, yilye ogu ga kara nonzwi zimwe tupu, ano eyi nazi gwira mekero ngoso, nye a dire kukazihora mo moomo mEsabata?” Mokumona asi nzwi siweka somulyo, awo ngano kapi va zi sigilire mekero dogoro ezuva lyokukwama ko, zi vere ndi zi fe. Mokugwederera ko, Matjangwa kuuyunga asi: “Muntu gomuwa kunomena nawa yimuna yendi.”

Jesus makura ta twikire ko asi: “Pomuntu nonzwi, gefumano po yilye? Ano mEsabata kuvhura kuninka mo yoyiwa.” Vampitisili womaukarelikarunga kwa va vhulire kupatana usili wangoso, makura awo tava mwena teete.

Jesus ta va tarurura nehandu oku ana guwu pokumona ukukutu wonomutjima dawo. Makura ta tantere mugara asi: “Gonyonona kuwoko koge.” Makura mugara ta ku gonyonona, ano kuwoko taku kara kwandjewa-ndjewa.

Mevango lyokuhafa asi kuwoko komugara kuna veruka, Vafalisayi tava pwaga mo mosinagoge, va ka liyonge nava onkwaHerodesa mokudipaga Jesus. Mbunga ozo zoupolitika kwa kwaterere mo vamwe woVasadukayi womaukarelikarunga. Mbunga ezi zoupolitika noVafalisayi ngava lirwanesa-rwanesa, nye kwa likwatakanene kumwe yipo va rwanese Jesus. Mateusa 12:9-14; Marukusa 3:1-6; Rukasa 6:6-11; Yisewe 12:10; Exodus 20:8-10.

▪ Yinke ya retesere po nompata pokatji kaJesus novampitisili womaukarelikarunga goVajuda?

▪ Yinke va pulire vampitisili womaukarelikarunga goVajuda kuhamena kuverura mEsabata?

▪ Sifanekeso musinke ga ruganesere Jesus mokunyokera po magano gawo gepuko?