Egaununo 31

Varongwa vaJesus tava teza ntafu mEsabata

JESUS novarongwa vendi kwa tundire moJerusarema va tengure koGalireya. Aso kwa kere sinema apa yilya ngayi kuru momapya. Varongwa vendi nzara za va kwete. Makura tava tezagura ntafu va lye. Vantu va yi nongwenene, morwa asi alyo kwa kere Esabata.

Vampitisili womaukerelikarunga moJerusarema kwa here kudipaga Jesus morwa kwa mu gazarere asi age ga tezere po Esabata. Makura opo Vafalisayi tava rundire varongwa vaJesus asi: “Ko tara si varongwa woge kuna kurugana eyi va silika mEsabata.”

Vafalisayi kwa tente asi kuteza yilya nokuyidiga nomawoko o lye kwa kere ngwendi kuna kuteza nokupuma. Monkedi omu va fatwilire yirugana eyi va silikire mEsabata kwa ninkisire ezuva olyo li kare mudigo, nye alyo ngano kwa kere siruwo sokuhafa sokulitunga pampepo. Jesus yipo nye ga va limbwilire noyihonena yomoMatjangwa mokulikida asi Jehova Karunga kapi ga kere nositambo asi Esabata li kare ezuva lyonoveta dononzi unene.

Jesus kwa uyungire asi apa Ndafita novantu vendi za va kwete nzara, awo kwa lire nomboroto donzambo konkongoronzugo. Varevhi va tulire nare nomboroto donompe kosipara saJehova, ano mokuliza noVeta, danare kwa di pungwilire vapristeli velike. Nye, morwa ukaro wawo, Ndafita novantu vendi kapi va va pangwire mokulya nomboroto odo.

Pokugava sihonena sapeke, Jesus kwa tente asi: “Ndi kapi mwa resa moVeta zaKarunga, asi vapristeli ngapi omu ava taguruka Veta zEsabata montembeli, nye nousima si woou?” Nampili mEsabata, vapristeli ngava twikire kudipaga yikorama nokurugana kontembeli mokuwapaika nonzambo! Jesus kwa uyungire asi: “Nye ame tani mu tantere asi, ogu ga pita ntembeli pweli apa.”

Mokunyokera Vafalisayi, Jesus kwa twikilire ko asi: “Nye ngano si kwa diva eyi adi tanta nonkango edi asi, ‘Ame ufenkenda na hara, kapisi nzambo,’ ngano kapi muna pangura ava va hana usima.” Makura ta hulisa asi: “Yeeyi MunwaMuntu yige mwenyaEsabata.” Yisinke ga tembe Jesus? Age kwa tembe epangero lyendi lyoUhompa lyombili lyonomumvho eyovi limwe.

Monomvhura edi 6 000, vantu kwa hepa moupika wokuruganena Satana Muzonaguli, kumwe nonyanya noyita. Mokulisiga, mepangero lyEsabata lyenene lyaKrisusa, vantu ngava pwizumuka komaruhepo nagenye gangoso. Mateusa 12:1-8; Levitikus 24:5-9; 1 Samwere 21:1-6; Numeri 28:9; Hoseya 6:6.

▪ Yisinke va rundilire varongwa vaJesus, ntani ngapi omu ga limbwilire Jesus?

▪ Mapuko musinke goVafalisayi ga dimbwilire Jesus?

▪ Monkedi musinke ga kara Jesus “mwenyaEsabata”?