Egaununo 100

Sifanekeso soyimaliwa

JESUS nampo kwa kere simpe membo lyaSakeusa, omu ga pitire morugendo rwendi rokuza koJerusarema. Varongwa vendi kwa yi pulilire asi apa ngano va ka sikire moJerusarema, age nga ka lidivisa asi yige Mesiyasa ntani nokutulisa po Uhompa wendi. Mokuvyukisa magano gawo nokuvalikida asi Uhompa simpe ure una kara, Jesus ta va pe sifanekeso.

Age ta tanta asi: “Pwa kere mugara gumwe gemezimo lyovazuni, ga zire kosirongo sokoure, va ka mu ture mouhompa, ntani nga ka tengura.” Jesus kuna kara ‘mugara gemezimo lyovazuni,’ ano eguru kuna kara ‘sirongo sokoure.’ Apa ga tengwire Jesus meguru, oGuhwe va ka mu pere nonkondo dosiuhompa.

Nampili ngoso, komeho zokuza, mugara ogu gemezimo lyovazuni ta zigida vakareli murongo nokuvapa nkenye ogu yimaliwa, nokuvatantera asi: “Yiruganeseni dogoro noku ngani ka tengura.” Mesikiliromo lyomuhowo vakareli murongo kwa fanekesere varongwa vaJesus wokuhova. Ano mesikiliromo lyenene, awo kwa fanekesa navenye ava ngava ka pinga kumwe nendi Uhompa wemeguru.

Yimaliwa eyi ga gwene nkenye mukareli kwa ka sikire koyiha yomfeto zomakwedi gatatu. Nye yinke ya fanekesa? Monkedi musinke ngano va yi ruganesere vakareli yimaliwa?

Yimaliwa kwa fanekesa yiweka eyi ngano nava ruganesa vagwavekwa mokureta vapingwa wovanzi woUhompa wemeguru dogoro apa Jesus nga wiza ngoHompa moUhompa wetumbwidiro. Konyima zevhumbuko lyendi napa ga monekerere varongwa vendi, age kwa va pere yimaliwa yopasifanekeso mokutulisa po varongwa wovanzi ntani nokugwederera ko kombunga zemeguru zoUhompa.

Jesus ta twikire asi: “Nye vanasirongo kwa mu nyengere, makura tava tuminikida ko nontumi di ka tante asi, ‘Mugara ogo ose kapi tuna hara asi a kare hompa gwetu.’” Vanasirongo kuna kara Vaisraeli ndi Vajuda, nye kapisi varongwa vendi. Konyima apa Jesus ga tengwire meguru, pokuhepeka varongwa vendi Vajuda ava kwa yi likidire asi kapi va mu here a kare hompa gwawo. Monkedi ezi awo kwa kere ngwendi vanasirongo ava va tumine nontumi.

Ngapi omu vakareli murongo va ruganesere yimaliwa yawo? Jesus ta faturura asi: “Mugara ga ka tengura, age vana ka mu tura mouhompa. Ta tanta asi, va ka zigide ava vakareli ava ga sigilire yimaliva, a ya tare asi nkenye ogu nsonso zokuhura kupi ga gwanena po. Gopomuhowo ta wiza po, ta tanta asi, ‘Hekurwange, simaliva soge songorodo sa gwana ko nsonso zoyimaliva yikwawo murongo.’ Hompa ta mu tantere asi, ‘Yina wapa, nani o mukareli gomuwa. Ngomu wa limburukwa mweyi yoyisesu, yipo nye no gwanena nonkondo dokupangera yitata murongo.’ Gwauvali nage ta hedere po, ta tanta asi, ‘Hekurwange, simaliva soge songorodo sa gwanena po yimaliva yikwawo yitano.’ Nage ta mu tantere asi, ‘Nove to pangere yitata yitano.’”

Mukareli ogu ga kere noyimaliwa murongo kwa fanekesa mbunga zovarongwa kutundilira poPentekoste 33 S.N., dogoro ngesi kukwatera mo novapositoli. Mukareli ogu ga gwene yimaliwa yitano nage kwa fanekesa mbunga ezi za parukire posiruwo sooso, azo kwa vhukisire yiweka yahompa pevhu, kuliza nevhuliko lyawo ntani nonompito edi va gwene. Nombunga mbali edi kuzuvhisa noupampi mbudi zongwa ntani ngoyitundwamo, vantu wovanzi wonomutjima donongwa kwa ya kara Vakriste. Vakareli vatano-navane kwa tompwere nawa mongesefa ano awo kwa gwederere ko kweyi va va pere.

Jesus ta twikire asi: “Gwautatu hena ta hedere po, ta tanta asi, ‘Hekurwange, simaliva soge sesi. Ame kwa si mangera posikayiwa, yiyo na si horeka. Yeeyi ame kwa tjira, morwa ove muntu gomudigu: ove kugusa eyi ya hana asi yoge, ove hena kuzangura eyi wa dira kukuna.’ Hompa ta mu tantere asi, ‘Ame tani ku pangwisa kononkango domokana koge, mukareli ove gomudona! Wa diva nge no asi ame ni muntu gomudigu, ani gusa eyi ya hana asi yange, ame hena kuzangura eyi na dira kukuna. Yisinke nye eyi wa dilira kutwarera nge yimaliva yange kombanga? Eyi na ka tengura, ngano na ya gwana emona lyange nonsonso zalyo.’ Ava va sikeme po, hompa ta va tantere asi: ‘Si mu guseni mu si pe ogu ana kara noyimaliva yongorodo murongo.’”

Pokugusa yimaliwa komukareli gomudona, ayo kwa tente asi ga zumbanesere evango moUhompa wemeguru. Ga zumbanesere mfumwa zokupangera yitata murongo ndi yitano. Koneka asi mukareli kapi ga kere mudona morwa asi kwa rugene yoyidona, nye morwa kudira kurugana a gwederere koungawo wouhompa wahekurwendi.

Apa yimaliwa yomukareli gomudona va yi geve kogu gokuhova, vamwe kwa tente asi: “Hekurwetu, age koyili nare yimaliva murongo.” Nye Jesus ta limburura asi: “Ogu ga kara noyuma, kumupa yi mu vhukilire, ano ogu ya pira, kuyimugusa neyi ga kara nayo. Nye nonkore dange edi da dira kuhara asi ni kare hompa gwado, di reteni oku mu ya di dipage ame kuna kutara.” Rukasa 19:11-27; Mateusa 28:19, 20.

▪ Yinke ya retesere po sifanekeso saJesus kuhamena yimaliwa?

▪ Yilye ga kere mugara gemezimo lyovazuni, ntani kosirongo musinke esi ga zire?

▪ Wolye vakareli, ntani yinke ya fanekesa yimaliwa?

▪ Wolye vanasirongo, ntani ngapi omu va likidire nyengo zawo?

▪ Morwasinke mukareli gumwe va mu tumbwire asi mudona, ntani yinke ya tente apa va si mu gusire simaliwa?