Egaununo 101
Jesus ta dingura embo lyaSimoni moBetani
APA ga tundire Jesus moJeliko, age kwa zire ko Betani. Rugendo kwa gusire ezuva nalinye, morwa kwa kere nzira zondigu zonondundu zokusika konokilometa 19. Nsene mu dirowoka, moBetani yimo va tungire oRasarusa novampanza vendi. Kamukunda aka kwa kara nokilometa 3 kutunda koJerusarema, ako kwa kara posikunkumuko korwaUpumezuva woNdundu zoMauzwe.
Wovanzi nare va ka sikire moJerusarema koPaska. Awo kwa livindukire yipo va ka likuhure vene pampo. Nampo awo kwa kwete simpu ndi kwa rugene yimwe eyi ya va ninkisire va kare vana nyata. Awo ngava kwama nongendeseso dokulikuhura vene yipo va ka dane Paska monaruwa. Ngomu va pongere vantu pontembeli, wovanzi kwa lipulire nsene asi Jesus na wiza koPaska.
MoJerusarema kwa zulire mo nonzogera dokuhamena Jesus. Ayo kwa divikwire asi vampitisili womaukarelikarunga kwa here kumukwata nokumudipaga. Awo va geve nare mpangera asi nkenye ogu ana diva oku ana kara, ga hepa kuyitanta. Vampitisili womaukarelikarunga ava kwa hetekere kudipaga Jesus yikando yitatu, poSipito soYikorogo nesi sEpongoro ntani napa ga vhumbwire Rasarusa. Makura vantu tava lipura nsene Jesus na moneka tupu hena moyitarameho. Tava lipuragere asi: “Ngapi omu muna kugazara one?”
Siruwo oso, Jesus ga ya sikire moBetani, mazuva ntazimwe komeho zoPaska, ezi za kere momazuva 14 gaNisani kuliza nokalinderi koVajuda. Jesus kwa ka sikire moBetani koyiha yoUtano ngurova, ketamekero lyomazuva 8 gaNisani. Age ngano kapi ga zire koBetani moMapeu morwa veta zoVajuda kwa yi silikire mokugenda mEsabata, kutundilira Utano apa ali toko ezuva dogoro Mapeu apa ali toko ezuva. Ngamoomu ga yi rugene nare, Jesus nampo kwa zire moUtano kembo lyaRasarusa nokukarara ko.
Nampili ngoso, moMapeu kongurova gumwe ogu ga tungire moBetani kwa zigidire Jesus kumwe novakwawo komurarero. Edina lyendi yige Simoni, ogu ga verwire nare Jesus koyingondwe. Mokuliza nonkareso zendi zokurugana unene, Malita ta gavere nondya kovagenda. Nye Mariya kwa ruganenene Jesus yuma, eyi ya retere nompata.
Mariya ta swikura sipako sosiwa semanya esi sa kere noharufa zolita zomagadi “gondiro goNarudisi.” Ago kwa kere nomulyo unene. Mulyo gwago kwa hetakanene nomfuto zomvhura nazinye! Ano apa Mariya ga tjilire magadi komutwe nokonompadi daJesus oku ta di kokotesa konohuki dendi, nzugo nazinye tazi zura edumba lyewa lyomagadi.
Varongwa vendi tava zuvhu nyengo, tava tanta asi: “Eh, eyi vana kugahepekera ngesi gene aga magadi hena yinke?” Makura Judasa Isikalyoto, ta tanta asi: “Magadi yinke vana dilire kugarandesa noranda efere limwe, oyo yimaliva ngano va yi pe nohepwe?” Nye kapi ga yi uyungilire morwa kuretera nkenda nohepwe, nye yeeyi ga kere muwidi pokuhora mokandjato koyimaliwa aka ngava simbi varongwa.
Jesus ta popere Mariya. Ta tanta asi: “Mu sigeni! Yinke muna kumuhepekera? Age kuna ruganene nge sirugana sosiwa. Owo vahepwe nawo ngomu kara nkenye apa. Sinene muna yi hara, kuvhura tupu mu va ruganene yoyiwa, nye ame kapi ngomu kara kumwe name nkenye apa. Age kuna rugana paapa ga hulira. Age kuna tjire magadi korutu rwange, a livinduke kuruwapaikira evhumbiko lyaro. Yosili nina kumutantera nkenye oku ngava udisira Mbudi zoNgwa ezi mouzuni mudima, neyi ana rugana ngava ka yi sanseka po, va mu diworokere po.”
Jesus kwa kere moBetani ezuva nalinye, ano nonkango dokumuhamena kwa lihene. Yipo nye, wovanzi va zire kembo lyaSimoni va ka tare Jesus, nye kapisi gelike va ka tere hena naRasarusa. Yipo nye vapristeli wovanene kwa here kudipaga Jesus kumwe naRasarusa. Yeeyi Vajuda wovanzi kwa pulire mwaJesus morwa va mwene ogu ga pindwire koufe! Eh, udona musi va kere nawo ava vampitisili womaukerelikarunga! Johanesa 11:55–12:11; Mateusa 26:6-13; Marukusa 14:3-9; Yirugana 1:12.
▪ Nonzogera musinke da kere po pontembeli moJerusarema, ntani morwasinke?
▪ Ngapi omu tuna yi diva asi Jesus ga ka sikilire moBetani moUtano, kapisi moMapeu?
▪ Apa ga ka kere Jesus moBetani, kupi oku ga ka kere mEsabata?
▪ Yinke ga rugene Mariya eyi ya retere nompata, ntani ngapi omu ga mu poperere Jesus?
▪ Yinke ya likidire udona wounene wovapristeli wovanene?