Egaununo 106

Kwa va tulire poruzera kupitira moyifanekeso yosikunino sovhinyu

JESUS kwa kere pontembeli. Age kwa piyaganesere vampitisili womaukarelikarunga ava va here kudiva asi mononkondo dalye ga ruganene yininke. Komeho zokuvapwa epiyagano lyawo, Jesus ta va pura asi: “Ngapi nani omu muna kugazara?” Kupitira mosifanekso, tava likida asi awo vantu musinke sili.

Jesus ta simwitire asi: “Pwa kere mugara novana vendi vavali wovagara. Makura ta zi kwagumwe, ta ka mu tantera asi: ‘Munwange, zende o ka rugane mosikunino sange sovhinyu naina.’ Makura gwina ta limburura asi: ‘Nina nyoka.’ Konyima ntani ana livere, makura ta ka za ko. Kutunda opo ta zi kwamukwawo, ta ka mu tantera ngoroorwina. Age ta mu limburura asi: ‘Nhi, Tate, nani za,’ nye kapi ga zire ko. Pwava vavali, yilye ogu ga rugene po mpango zaguhwe?”

Awo tava mu limburura asi: “Gomuhowo.”

Makura Jesus ta faturura asi: “Yosili nina kumutantera asi, vafutisi womutero novakadi worukehe yiwo ngava ka mu lihovera kuza moUtungi waKarunga.” Vafutisi womutero novakadi worukehe pomuhowo kwa nyokere kukarera Karunga. Nye, ngwendi munona gwina gokuhova, awo va litezwilire makura tava karere Karunga. Mokulisiga, ngwendi munona gwina gwauvali, vampitisili womaukarelikarunga kwa tente asi awo kukarera Karunga, nye ngamoomu ga uyungire Jesus asi: “Johanesa [Mukuhwi] kwa wizililire, a ya mu likide nzira zouhunga, nye one kapi mwa mu pulire. Nye vafutisi womutero novakadi worukehe awo va mu pulire. One kumona mwa yi mwene, nye kutunda opo kapi mwa litezwilire, mu mu pure.”

Makura Jesus ta likida asi udona wovampitisili womaukarelikarunga kapisi wokudira kupakera sinka tupu kukarera Karunga. Awo kwa kere sili vantu wovadona. Jesus ta simwitire asi: “Pwa kere nturagumbo, ogu ga tapekere sikunino sovhinyu. Makura ta tura ko ngumbu, ta tungu mo sikameno sovhinyu, ta tungire mo hena ruhungu. Makura ta si heheda vanasikunino, mwene makura ta zi ugenda. Ano eyi sina siki siruwo sokupya yiyimwa, makura ta tumu ko nye vakareli vendi kovanasikunino, va ya hare eyi yendi. Nye vanasikunino tava heda ko va kwate vakareli; gumwe tava mu toona, ogu gumwe tava mu dipaga, ano ogu mukwaawo tava toona nomamanya. Kutunda opo ta tumu hena vakareli wovanzi, kupitakana wopomuhowo. Nava tava ya va rugana ngoroorwina.”

“Vakareli” ava ga tumine “nturagumbo” Jehova Karunga ‘kovanasikunino’ ‘wosikunino sendi sovhinyu,’ kwa kere vaporofete. Vanasikunino ava kwa kererere po vapitisili womuhoko gwaIsraeli, muhoko ogu za nongonona Bibeli asi ‘sikunino sovhinyu’ saKarunga.

Mokumona asi “vanasikunino” kwa tekwire momudona nokudipaga “vakareli,” makura Jesus ta faturura asi: “Moruhura makura ta va tumine nye munwendi, ta tanta asi: ‘Munwange nava ka mu tara nonsenyawoma.’ Nye vanasikunino eyi va mona muna ta wiza, tava litantere-tantere asi: ‘Yige mupingi googu, tu zeni, tu mu dipageni, tu guse upingwa wendi.’ Makura tava mu kwata, tava mu zugumine kesinya kwina lyosikunino, tava mu dipaga.”

Pokuuyungisa vampitisili womaukarelikarunga, Jesus ta va pura asi: “Ngapi nye omu nga ya va tengeneka vene owo vanasikunino, apa nga wiza mwenyasikunino?”

Awo tava limburura asi: “Vantu wovadona ngoso nga ya va dipaga momudona, sikunino makura nga si pe vanasikunino peke, ava ngava mu retera yiyimwa posiruwo sayo.”

Mokumona asi awo nawo kwa kere womombunga zoVaisraeli “vanasikunino” womuhoko gwaJehova gwaIsraeli ‘gosikunino sovhinyu,’ awo kwa lipangwire vene va hana kuyidivira. Yiyimwa eyi ga ndindilire ko Jehova kovanasikunino kwa kere epuro mwaMunwendi, Mesiyasa gousili. Mokudira kuyima kwawo siyimwa oso, Jesus ta va rondora asi: “Hamwa kara mu rese momatjangwa [mEpisarome 118:22, 23] asi: ‘Emanya eli va zumbire vatungi, yilyo lya kara emanya lyemekovhu. Hompa ga yi rugana, makura yiyo yina kututetura.’ Yipo nye nina kumutantera asi, Untungi waKarunga ngava u mu gusa, va u pe muhoko peke, ogu ngagu yima yiyimwa yawo. (Ano ogu nga gwira pemanya eli, nga myoka. Nye pogu ngali gwira, nga swaunuka.)”

Apa valirongi womatjangwa novapristeli wovanene va nongwenene asi Jesus yiwo ana tamba, makura tava hara kudipaga ‘mupingwa.’ Yipo nye mfumwa zokukara vapangeli moUhompa waKarunga, kwa zi va gusire ngomuhoko ano muhoko gomupe ‘govanasikunino sovhinyu’ kwa gu tulire po, ogu gwa yimine yiyimwa yoyiwa.

Morwa vampitisili womaukarelikarunga kwa tjilire mbunga ezi za tere Jesus asi muporofete, makura tayi va limbi mokuheteka kumudipaga. Mateusa 21:28-46; Marukusa 12:1-12; Rukasa 20:9-19; Jesaya 5:1-7.

▪ Wolye va fanekesere vanona vavali mosifanekeso saJesus sokuhova?

▪ Mosifanekeso sauvali, wolye va fanekesa “nturagumbo,” ‘sikunino sovhinyu,’ “vanasikunino,” “vakareli,” ntani ‘mupingwa’?

▪ Yinke ya horokerere ‘vanasikunino sovhinyu,’ ntani wolye va ya va pinganene po?