Kuuyunga kupitira monombilive

NOMBILIVE kwa rundurura maparu nononkareso domamiliyona govantu. Sinzi sonobuke doMatjangwa goRugereka goSikriste kwa kere nombilive. Nose naina kuvhura tu tjange nombilive yipo tu nkondopeke vapuli wovape nokuuyunga novakaume nokukorangeda vanavazinyetu ava vana gusa yitumbukira yokulikarera, nokuhengagwida owo vana kuligwanekera nomaudigu ntani nokugava mapukururo aga gana hepa po mokusikisa mo yirugana yomombungakriste.—1 Tes. 1:1-7; 5:27; 2 Pet. 3:1, 2.

Kutjanga mbilive nazo kuna kara nkedi zimwe zongwa zokugavera umbangi. Moyirongo yimwe, sinzi sovantu kwa tunga momatungo gomanene ndi monohotera omu no dira kuzuvhisira noumanguruki. Vamwe kapi va hwa kukara pembo nkenye apa, yipo nye kapi atu va gwana po apa atu udisa tunda embo zende embo. Ano vamwe kwa tunga komavango gokoure.

Mauvera noukarompepo woudona ndi noveta demembo kuvhura yi ku ninkise poyiruwo yimwe o kare membo. Kuvhura o tjangere mbilive mokugavera umbangi kwa gumwe gekoro ndi ogu wa uyungire nendi. Kweli murongwa goge goBibeli ga diruka ndi? Mbilive zokutundilira koge kuvhura zi mu vatere mokunkondopeka upampepo wendi. Ndi nampo kuvhura o ligavere Matjangwa gokuwapera kumwe nava kava likwere tupu ntaantani, ndi kava gwene mukeke, ndi ava va zumbanesa vahali vawo monomfa.

Kugavera umbangi kupitira mombilive

Nsene kuna kugavera umbangi komuntu ogu wa dira kugwanekera nendi rumwe kupitira mombilive, pomuhowo lisingonona nyamoge. Kuvhura o mu fatwilire asi ove kuna kulihameka mosirugana sokulizambera souzuni mudima. Nsene kuvhura, litumbura asi ove gumwe goNombangi daJehova. Mu tantera konda zeyi ono kumutjangerera mevango lyokuyamudingura nyamoge. Tjanga ngwendi asi kuna kuuyunga nage kana nokana. Nampili ngoso, kuliza nevyukiso ‘lyokurungamena ngwendi mazoka, nokukuruka ngwendi nonkutji,’ gazadara ko nawa asi nombudi dokusika kupi no vhura kuhorora kuhamena nyamoge.—Mat. 10:16.

Mombilive mu hamene eyi ngano ono ka uyunga nendi ngano kuna ka mu dingura. Kuvhura o ruganese etwaromo lyomobuke Reasoning from the Scriptures ndi ruganesa magano gopatjangwa aga va gava mosimbapira soYirugana yetu yoUhompa. Kuvhura o mu pure epuro nokumukorangeda a gazadare ko. Vazuvhisi vamwe kufaturura asi ose kwa kara nelikwamo lyomawoko-woko lyokulimburura mapuro gokuhamena koBibeli ntani nokutura mo yiparatjangwa yimwe yomoyimbapiratjangwa atu ruganesa melirongo. Sihonena sombilive omu no gavera umbangi kuna kara pepenuno 73. Azo kuvhura zi ku pe ko magano gamwe, nye ya wapa mokutura mo yikaramo yokulisiga. Nsene kapisi ngoso, ngano vantu ngava gwana nombilive dokulifana nkenye apa.

Vantu vamwe kapi va hara kuresa mbilive zonde zokutunda komuntu ogu va dira kudiva. Yipo nye, tayi ka wapa nsene o supipika mbilive zoge. Supipika mbilive zoge komeho zi sete muresi nokuhageka kuziresa. Nayi ka wapa pokutura mo simbapira sezigido komapongo gokoSinyanga soUhompa. Kuvhura o ture mo sitratate ndi sifo ndi nampili yifo yoRuhungu ndi Awake! ntani faturura asi eyi kuvhura kuyimutumina nkenye kwedi nsene ana yi hepa. Ndi kuvhura o mu pure nsene kuvhura kuyamudingura pembo lyendi nokuyazogera ko momunene kosirongwa esi mwa zogerere.

Omu no tjanga mbilive

Tara ngesi kombilive zosihonena. Koneka eyi yina kukwama ko: (1) Kuna kumoneka nawa, nonkango kapi dina likwata. (2) Aderesi zomutumi kuna kara pombilive. (3) Sitambo sombilive kuna si tumbura nawa ntani kuvyukilira moparagarafu zokuhova. (4) Nkenye egano lyomulyo kuna li zogere moparagarafu zokulikerera. (5) Mokutara kositambo sazo, mbilive ezi kapi zina kara zopasiundambo ndi zopaveta unene.

Mombilive zopasikwamo, ngwendi zezi a tumu hamutjanga gomombungakriste komberewa zomutayi, edina lyombungakriste kulitjanga ko kumwe nedina lyahamutjanga mwene ntani noaderesi zendi ntani nomazuva. Edina noaderesi zomuntu ndi zombunga oku zina tamba mbilive ya hepa kumoneka po. Ntani naku kwama emororo lyokuwapera. Mokuhagesa mbilive, nononkango ngwendi “Gweni” kumoneka keguru lyesaino. Esaino lya hepa kukara morupe rokutjanga.

Mwankenye mbilive, kara nosinka kuhamena esipero nondunganesoraka noyidivisoreseso nouhaya. Kurugana ngoso kugava mfumwa kombilive zoge ntani nokombudi ezi zina gendere mo.

Kontunda zompunda, nkenye apa tura ko aderesi zoge. Nsene kuna kulizuvha asi kapi nayi ka wapa mokuruganesa aderesi zoge pokugavera umbangi kupitira mombilive kovantu ava wa dira kudiva, pura vakuronambunga nsene kuvhura va ku pulisire mokuruganesa zokoSinyanga soUhompa. Aderesi zomberewa zomutayi va ha zi ruganesa kositambo esi, morwa kuvhura yi moneke ngwendi mbilive zoge kazi tundire komberewa zomutayi ntani kuvhura yi rete epiyagano. Ano nsene kapi ono tura ko aderesi ntani kuna tura mo yimbapiratjangwa, eyi nayo kuvhura kugava egano lyepuko asi mberewa zomutayi yizo zina tumu mbilive ozo.

Divilisa asi ono tura po sitamba somukoso gokugwanena po, unene po nsene kuna tura mo yimbapiratjangwa. Nsene kapi ono tura po sitamba somukoso gokugwanena po, ogu ono zi tjangere kuvhura kumufutisa, ano eyi kuvhura kudonganesa mbudi zoge. Diworoka asi moyirongo yoyinzi nsene simbapira ndi sifo kuna si tura monda zompunda, mukoso gositamba munzi kupitakana gombilive zelike.

Muhagaro gokuwapera

Nsene ono mana kutjanga mbilive zoge, zi resa mokuwapukurura yikaramo. Ngapi omu zina kuzuvhika? Azo kuna kuzuvhika pasiundambo ntani nawa ndi? Eharo nonkenda kuna kara yikara eyi atu kondjere kulikida meruganeno lyetu kumwe nava wopeke. (Gar. 5:22, 23) Nsene no nongonona mo nkango zondona ndi zokudira kuwapera, zi wapukurura.

Mbilive kuvhura kuza komavango aga no dira kukasika. Usili ou welike kuzininkisa zi kare siruganeso somulyo moyirugana yokuzuvhisa. Mokumona asi mbilive zoge kuna ku karere po nombudi zoge, gazadara ko nawa kweyi ono tjanga mo nomu zina kumoneka ntani nomu zina kuzuvhika. Azo kuvhura kugava eyi ya hepa po mokutameka ndi kunkondopeka ndi kukorangeda muntu mokugenda monzira zokutwaredera keparu.