Kuresa mouhunga

MATJANGWA kwa tanta asi alyo eharo lyaKarunga asi vantu navenye “va ka sike kediwo lyousili.” (1 Tim. 2:4) Kuliza negano olyo, apa atu resa kuziguruka kutundilira moBibeli, eharo lyetu lyokugava ediwo lyousili lya hepa kukundama omu atu resa.

Evhuliko lyokuresa kuziguruka kutundilira moBibeli nomoyimbapiratjangwa eyi ayi faturura Bibeli kwa kara nomulyo kovadinkantu nokovakurona. NgoNombangi daJehova, ose kwa kara nositumbukira sokuligavera novakwetu ediwo lyokuhamena Jehova nononzira dendi. Eyi kwa kwatera mo kuresera muntu gumwe ndi kambungagona. Nose hena kurugana ereso lyangoso momapata getu. MoSikora zoUkareli, kwa kara mo nompito kovanavazinyetu wovagara nava wovakadi, yi kare asi vanona ndi vakurona, mokugwana mapukururo yipo va wapukurure evhuliko lyawo lyokuresa kuziguruka.

Kuresa Bibeli kuziguruka, yi kare asi kovantu ndi mombungakriste, kuna kara sininke somulyo. Bibeli kwa zi retesa po Karunga. Mokugwederera ko, ‘nonkango daKarunga kwa kara nomwenyo nononkondo. Ado hena kupangura matedo noyigazo yokomutjima.’ (Heb. 4:12) Nonkango daKarunga kwa kara nediwo lyomulyo unene eli natu dira kugwana nkenye oku. Ado kuvhura kuvatera muntu mokudiva Karunga gosili gelike nokutunga po elikwatakano lyewa kumwe nendi yimo tupu hena yi mu tompoke mokulididimikira maudigu gemeparu. Ado kufaturura nzira zokutwara komwenyo gwanarunye mouzuni woupe waKarunga. Yipo nye, sitambo setu sa hepa kukara sokuresa Bibeli paapa twa vhulira.—Epis. 119:140; Jer. 26:2.

Omu no vhura kuresa mouhunga. Kwa kara mo maruha gomanzi mokuresa nawa, nye kuresa mouhunga kuna kara ntambo zokuhova. Eyi kutanta asi kukondjera kuresa moomu yina kara posipepa. Takamesa wa ha vatuka nonkango ndi nondanda dokuhulisa nkango ndi o rese nonkango epuko morwa yeeyi da lifana nononkango dapeke.

Mokuninka asi o rese nonkango mouhunga, wa hepa kukwata egano eyi yina kara mosireswa. Ayo ya hepa eliwapaikiro lyewa. Komeho, ngomu ono kutunga po evhuliko lyokutara nonkango dokomeho nomu gana kuza magano, ereso lyoge ngali wapa.

Yidivisoreseso kuna kara mulyo meraka lyokutjanga. Yidivisoreseso kuvhura kulikida oku no pwizumuka, nosiruwo esi no pwizumuka, ntani nampo hepero zokutjindja ezwi. Momaraka gamwe, nsene o dira kutjindja ezwi apa pana kara sidivisoreseso, kuvhura kutjindja epuro li kare morupe rontanto, ndi kuvhura kuzonagura ntanto nazinye. Diva omu ava ruganesa yidivisoreseso meraka lyeni. Ezi kuna kara nsapi zokutwaredera kereso lyewa. Diworoka asi sitambo soge sa hepa kukara sokupwagesa magano nye kapisi sokutumbagura tupu nonkango.

Apo pwa hepa eliyombereso nsene ono hara kutunga po evhuliko lyokuresa mouhunga. Resa paragarafu zimwe tupu, makura zi ruguruka hena dogoro o zi rese wa hana kulipuka. Makura rundurukira koparagarafu zokukwama ko. Moruhura, kondjera kuresa mapenuno gongandi wa hana kuvatuka po ndi kuruguruka ndi kuresa nkenye nonkango mepuko. Konyima zokurugana nontambo odo, pura gumwe a purakene kereso lyoge ntani a ku likide nkenye epuko no rugana.

Moyirongo yimwe, kudira kumona nawa ntani kudira noramba kuvhura kudigopekesa mokuresa. Rugana ko yuma mokurundurura ndi kukohonona po maukaro aga nsene kuvhura, ano ayo ngayi ku vatera mokuresa mouhunga.

Ngomu sina kupita siruwo, vanavazinyetu wovagara ava ava resa nawa kuvhura kuvahundira mokuresa mElirongo lyoBibeli lyoMbunga ntani mElirongo lyoRuhungu. Nye mokusikisa mo nawa situmbukira sangoso, yinzi ya hepa po kupitakana tupu kutumbura nonkango mouhunga. Mokukara muresi gomuwa mombungakriste, wa hepa kutunga po nkareso zongwa mereso lyopwanyamoge. Eyi kwa kwatera mo kudiva asi nkenye nkango montanto kwa kara nomulyo. Kapi to vhuru kuncenuna po dimwe nokugazara asi kuvhura o kwate egano eyi vana uyunga. Nsene o resa nonkango mepuko, nampili apa no resa pwanyovelike, kuvhura o zumbanese eyi zina kutanta ozo ntanto. Litura mo mokukwata egano eyi azi tanta nkenye nkango moukaro omu zina kumoneka. Tarurura hena omu yidivisoreseso ayi kundama eyi azi tanta ntanto. Diworoka asi magano kugapwagesa nonkango dononzi kapisi zimwe tupu. Yi didilika eyi yipo asi nsene to resa kuziguruka, to di resa nadinye pamwe tupu, kapisi kudamagura nonkango. Kukwata nawa egano eyi ono kuresa kuna kara ntambo zomulyo mokugava ediwo lyene-lyene kwava wopeke pokuresera mbunga.

Paurusa kwa tjangerere komukuronambunga goMukriste ogu ga kere noudivi asi: “Kovekeda ngorooro kuresera vantu.” (1 Tim. 4:13, NW) Oru sili kuna kara ruha omu twa hepa kuwapukurura natuvenye.