Kuruganesa Bibeli mokulimburura mapuro

NSENE kuna kutupura kuhamena epuliro lyetu nomparukiso zetu nomutaro gwetu kuhamena yihorokwa yantaantani, ose kukondjera kuruganesa Bibeli mokulimburura. Morwasinke? Morwa ado Nonkango daKarunga. Mapuliro getu kwa tunda moBibeli. Ose hena kuparuka kuliza noBibeli. Azo kututantera eyi ayi tanta yihorokwa youzuni. Ehuguvaro lyetu lyokomeho kwa korera momatumbwidiro gomoBibeli.—2 Tim. 3:16, 17.

Ose twa diva nawa-nawa situmbukira esi twa kara naso kuliza nedina lyetu. Ose Nombangi daJehova. (Jes. 43:12) Yipo nye, ose kapi atu limburura mapuro kuliza nomagano gosintu, nye kuliza neyi a tanta Jehova kupitira moNonkango dendi. Yosili, nkenye muntu kwa kara nomagano gendi koyuma yongandi, nye ose kupulisira Nonkango daKarunga di kundame mutaro gwetu morwa twa yi diva asi ado usili. Yimo, Bibeli kutupa umanguruki wokuhorowora eyi twa hara moyuma yoyinzi. Mevango lyokusininika vapeke va tambure eyi twa hara, ose kuronga nompango edi da kara moMatjangwa, nokupulisira vapurakeni vetu va kare noumanguruki wokulifana ngawoowu atu hafere. Ngwendi mupositoli Paurusa, nose kukondjera “mokutumangeda ulimburukwi wokutundilira mepuro.”—Rom. 16:26, NW.

Jesus Kristusa kwa mu singonona mEhororo 3:14 asi “ndipo za limburukwa, age munasili.” Ngapi omu nga limburura mapuro ntani nomu nga kohonona po maukaro aga nga ligwanekere nago? Poyiruwo yimwe nga ruganesa yifanekeso eyi ngayi ninkisa vantu va gazare. Ano poyiruwo yimwe nga pura muntu ogo ana pura epuro kuhamena omu ana kukwata egano etjangwa olyo. Yiruwo yoyinzi age nga temwinine nokutumbura eyi ya kara momatjangwa. (Mat. 4:3-10; 12:1-8; Ruk. 10:25-28; 17:32) Mouye wokuhova, nobukegango ngava di pungura monosinagoge. Kapi pwa kara maumbangi aga likida asi Jesus kwa kere nobukegango zamwene, nye ga divire nawa Matjangwa ntani nga ga tumbura pokuronga vapeke. (Ruk. 24:27, 44-47) Yipo nye ga vhulire kutanta asi eyi nga rongo kapisi yamwene. Age nga uyunga eyi ga zuvha koGuhwe.—Joh. 8:26.

Ose kuna hara kukwama sihonena saJesus. Ose kapi twa zuvha Karunga kuna kuuyunga kuvyukilira ngamoomu ga yi zuvhire Jesus. Nye Bibeli kuna kara Nonkango daKarunga. Apa atu zi ruganesa mokulimburura, ose kunyokera po kuliretera nyamwetu mfumwa. Ose kuyilikida asi mevango lyokupwagesa magano govantu wokudira kusikilira mo, ose kwa tokomena mokupulisira Karunga a tu tantere usili.—Joh. 7:18; Rom. 3:4.

Yimo, ose kapi tupu atu kondjere kuruganesa Bibeli nye tuna hara kuziruganesa monkedi omu vapurakeni vetu nava gwanena mo uwa. Ose tuna hara vantu va purakene noumanguruki. Kuliza nonkareso zomuntu, kuvhura o rete mo egano lyomoBibeli pokutanta asi: “Kapi ono kuyikwatesa ko asi yininke yomulyo po kuna kara eyi a uyunga Karunga ndi?” Ndi kuvhura o tante asi: “Wa yi diva asi Bibeli za zogera kuhamena epuro olyo ndi?” Nsene kuna kuuyunga nomuntu ogu ga dira kufumadeka Bibeli, kuvhura o ruganese etwaromo nalyopeke. Kuvhura o tante asi: “Nina hara kukulikida uporofete ou wanare.” Ndi kuvhura o tante asi: “Buke ezi va hanesa unene mouzuni mudima kwa tanta asi . . . ”

Poyiruwo yimwe, kuvhura o tokore mokutemwinina tupu etjangwa. Nampili ngoso, nsene kuvhura, ya wapa mokupenuna Bibeli nokuresa eyi azi tanta. Likida etjangwa komuntu moBibeli zamwene nsene kuvhura. Eruganeso lyoBibeli monkedi zangesi kukundama vantu unene.—Heb. 4:12.

Vakuronambunga kwa kara nositumbukira sokulikarera mokuruganesa Bibeli nsene kuna kulimburura mapuro. Sihepwa simwe mokukara mukuronambunga kuna kara asi munazinyetugara ga hepa ‘kuudisa nonkango dokuvhura kuhuguvara, edi da liza nerongo eli va mu ronga.’ (Tit. 1:9) Gumwe mombungakriste kuvhura a ture po matokoro gomanene meparu konyima zapa mukuronambunga na mu pa mapukururo. Ee, omu tupu ya kara nomulyo asi mapukururo aga ga hepa kutundilira moBibeli! Sihonena somukuronambunga mokuyirugana eyi kuvhura kukundama vapeke monkedi zawo omu ava rongo.