Kugava maumbangi gokukwatesa ko

NSENE to tumbura nonkango, vapurakeni woge va kara nokonda zokupura asi: “Morwasinke yina karere asi usili? Umbangi musinke una kulikida asi eyi ana kuuyunga muuyungi usili?” Ngomurongi wa kara nositumbukira sokulimburura mapuro ogo ndi sokuvatera vapurakeni woge va gwane malimbururo. Nsene nontanto odo mulyo mokukwatesa ko eyi ono kuuyunga, divilisa asi o pe vapurakeni woge nokonda donongwa deyi nava yi pulira. Eyi ngayi ninkisa siuyungwa soge si ninkise vantu va pure eyi ono kuuyunga.

Mupositoli Paurusa nga gava maumbangi gokukwatesa ko nokuteda nokulikwambera vapurakeni vendi mokuvaninkisa va pure. Age kwa tu tulira po sihonena sosiwa. (Yirug. 18:4; 19:8) Yosili, vauyungi vamwe kuruganesa nkedi zokulifana mokupukisa vantu. (Mat. 27:20; Yirug. 14:19; Koros. 2:4) Awo kuvhura kutatekera yiuyungwa yawo pegano lyepuko nokuruganesa nontundiliro domapukururo dokudira kuhuguvara nokunyokera po mauzera aga aga dili kukwatesa ko mutaro gwawo ndi kuuyunga tupu eyi nava hafera vantu nye ya hana asi usili. Twa hepa kutakamesa yipo tu nyokere po nonkedi nadinye dangoso.

Demenena koNonkango daKarunga. Eyi tuna kuronga ya ha kara yanyamwetu. Ose kukondja mokuligavera nava wopeke eyi twa lironga moBibeli. Mokuyirugana, ose kutuvatera unene yimbapiratjangwa eyi azi gava mbunga zomukareli gokulimburukwa gonondunge. Yimbapiratjangwa eyi kutukorangeda tu konakone nawa Matjangwa. Ano morwa ngoso, ose kuvyukisa wopeke moBibeli, kapisi nositambo sokulikida asi ose mouhunga tuna kara, nye neharo lyokuvaninka va limonene ko vene eyi azi uyunga Bibeli. Ose kukwatesa ko Jesus Kristusa ogu ga uyungire mekanderero noGuhwe asi: “Nonkango doge yido usili.” (Joh. 17:17) Jehova Karunga, musiti geguru nevhu, yige ga diva yoyinzi kupitakana nkenye ogu. Umbangi wetu mokupama kwa korera kokudemenena moNonkango dendi.

Poyiruwo yimwe kuvhura o uyunge novantu ava va dira kudiva Bibeli ndi va dira kuzitambura asi Nonkango daKarunga. Wa hepa kuruganesa nondunge mokudiva asi siruwoke nangapi omu no vhura kutumbura matjangwa gomoBibeli. Nye wa hepa kukondja mokuvyukisa usimbu magano gawo kontundiliro ozo zomapukururo.

Nsene o temwinina tupu etjangwa kuvhura kugava umbangi ou nava dira kupatanesa ndi? Hawe. Kuvhura o hepe kuvavyukisa kosireswa mokuvalikida asi etjangwa kuna kukwatesa ko eyi ono kuuyunga. Nsene no tumbura tupu egano metjangwa ano sireswa kapi sa zogera kuhamena siparatjangwa oso, to hepa kugava mauzera gomanzi. Kuvhura o hepe kuruganesa matjangwa gapeke aga ga zogera ko kosirongwa oso yipo vapurakeni woge va yi kwate nawa egano asi eyi ono kuuyunga yosili kuna kutunda moMatjangwa.

Wa ha gweda ko kweyi lya dira kuuyunga etjangwa. Li resa nawa. Etjangwa kuvhura li kare asi kwa uyunga kosirongwa esi ono kuzogera. Nye mokuninka eyi ono kuzogera va yi pure, vapurakeni woge va hepa kumona umbangi weyi ono kuuyunga.

Maumbangi gokonontundiliro dapeke. Poyiruwo yimwe, ayo kuvhura yi vatere nsene no ruganesa umbangi wokontundiliro zapeke zokuhuguvara mokuvatera vantu va kwate egano usili woMatjangwa.

Pasihonena, kuvhura o ruganese nombungururu ngoumbangi mokulikida asi pwa kara Musiti. Nombungururu kugenda mononzira dado, ayo kulikida asi pwa kara Mugendesi gwado. Nzogera zoge ngazi kara zouhunga nsene kuna lizi neyi ya kara moNonkango daKarunga. (Joba 38:31-33; Epis. 19:1; 104:24; Rom. 1:20) Umbangi wangoso kuvatera morwa awo kulikida asi eyi azi uyunga Bibeli ya liza noyininke eyi ayi moneka.

Ove kuna kukondja mokuvatera gumwe a dimburure asi Bibeli sili Nonkango daKarunga ndi? Kuvhura o tumbure valirongi vamwe ava va yi pura, nye oyo kuvhura yi pameke asi usili ndi? Matemwinino gangoso kuvhura kuvatera tupu vantu ava va fumadeka valirongi owo. Kuvhura o ruganese elirongo lyounsitwe mokulikida asi Bibeli usili ndi? Nsene no ruganesa magano govadivi unsitwe wokudira kusilikira mo ngoumbangi, ove kuna kutatekera petateko lyokudira kukora. Ano nye nsene o tumbura pomuhowo mausili gomoNonkango daKarunga ntani konyima nokugava maumbangi gounsitwe ga likida asi usili, umbangi woge ngo u tatekera petateko lya kora.

Nkenye apa mulyo kugava maumbangi gokugwanena po. Unzi womaumbangi aga no gava kwa korera kovapurakeni woge. Pasihonena, nsene asi ove kuna kuzogera kuhamena mazuva gopouhura ngomu va yi singonona mwa 2 Timoteusa 3:1-5, kuvhura o vyukise magano govapurakeni woge kombudi za divikwa momukunda ezi zina kulikida asi vantu kapi vana “paka nkenda.” Sihonena oso simwe kuvhura si gwanene po mokulikida asi ruha oru rosidiviso ngesi kuna kusika mo.

Kuvhura o ruganese efanekeso lyoyininke yivali eli lya kara noyininke yomulyo yokulifana. Mafanekeso pwagene kapi aga gava umbangi, nye umbangi wago wa hepa kuuhetakenesa neyi azi uyunga Bibeli. Nye mafanekeso kuvhura kuvatera muntu a kwate egano yuma. Mafanekeso gangoso kuvhura kugaruganesa, pasihonena, nsene kuna kufaturura asi Uhompa waKarunga epangero. Ngomapangero govantu, Uhompa waKarunga kwa kara novapangeli novapangerwa nonoveta novapanguli ntani nonongendeseso derongo.

Yihorokwa yosili yemeparu kuvhura kuyiruganesa mokulikida unongo wokuruganesa nompango domoBibeli. Kuvhura hena kuruganesa yihorokwa yemeparu lyoge mokupameka nonkango edi ono uyunga. Pasihonena, nsene o tantera muntu mulyo gokuresa nokulironga Bibeli, kuvhura o faturure omu za wapukurura eparu lyoge. Pokukorangeda vanavazina, mupositoli Peturusa kwa tumbwire elisintunuko eli ga mwene nomeho gendi. (2 Pet. 1:16-18) NaPaurusa nage kwa tumbwire yihorokwa yemeparu lyendi. (2 Kol. 1:8-10; 12:7-9) Nye, kapisi o ruganese unene yihorokwa yemeparu lyoge yipo o dire kuliretera nyamoge mfumwa.

Mokumona asi vantu va lisiga monontundiliro nomomagazaro, umbangi ou nau ninkisa gumwe a pure kuvhura u dire kuninkisa gumwe gwapeke a pure. Yipo nye, gazadara ko mutaro govapurakeni woge pokutokora asi umbangi musinke no ruganesa ntani nomu no u gava. Yisewe 16:23 kutanta asi: “Vantu wonondunge kuhova kugazara, ntani vana kuuyunga; makura eyi vana kuuyunga kuyihuguvara.”