Egaununo lyoronantazimwe

“Kareni neharo lyenene lya hara mukweni a ku hare”

1. Yisinke ayi tetura wovape rorunzi pokuwiza kwawo komapongo goNombangi daJehova?

VANTU apa ava wiza romuhowo komapongo goNombangi daJehova, rorunzi awo kutetuka keharo eli ava likida momwina. Awo kulimona metamburo eli ava va pe ntani nomouumwe wounene. Vadinguli wokoyigongi yetu nawo kudimburura eharo eli. Mugavi-mbudi gumwe kwa tjenge ko kuhamena sigongi asi: ‘Kwato ogu ga kere ana korwa ndi a kare meruganeso lyoyikwepangwe. Kwato yizigagana nonomutangu. Kwato kulizundagura. Kwato kulikandagura. Kwato nomugano nomatuka. Kwato nomuteu donondona ndi maraka gomadona. Kwato gokukoka makanya. Kwato widi. Kwato ogu ana kunyateka ngwena noyindorohwa. Ayo nawa-nawa kwa likererere.’ Eyi nayinye kuna kara elikido lyeharo eli ‘ali pili kureta yoyidona, kapi ali papara yeeyi lya hara lyene.’—1 Vakolinte 13:4-8.

2. (a) Ngomu sina kupita siruwo, yisinke ya hepa kumoneka melikido lyetu lyeharo? (b) Eharo musinke twa hepa kutunga mokutemwinina Kristusa?

² Eharo lyosiumbya kwa kara sidimbwiliso soVakriste wosili. (Johanesa 13:35) Ngomu tuna kukura pampepo, tatu lirongo tu likide eharo momunene. Mupositoli Paurusa kwa kanderere asi eharo lyoVakriste vakwawo ‘ngano li vhuke unene.’ (Vafilipi 1:9) Mupositoli Johanesa kwa likidire asi eharo lyetu li kare lyokulizambera. Age kwa tjenge asi: “Apa twa li divira eharo lyaKristusa, paapa ga tu pa mwenyo gwendi. Nose twa fira kugavera vakwetetu nomwenyo detu.” (1 Johanesa 3:16; Johanesa 15:12, 13) Ose kuvhura nawa-nawa tu gave eparu lyetu morwa vakwetetu ndi? Nampili ngomu nomukaro dononzi adi pili kuhepa eyi, dogoro pokusika papi po apa atu hetekere ko kuvavatera ngesi, nampili poyiruwo yokupira kuwapera?

3. (a) Monkedi musinke omu natu vhura kulikida eharo lyetu unene? (b) Morwasinke yina karere nomulyo kukara neharo lyenene lya hara mukweni a ku hare ngesi?

³ Kumwe noyirugana yetu eyi ayi likida mpepo zokulizambera, ose twa hepa kukara nelizuvho lyewa lyosili kovanavazinyetu. Nonkango daKarunga tadi tu korangeda asi: “Omu lihare-hare neharo lyosiumbya.” (Varoma 12:10) Natuvenye kulizuvha ngoso kovantu vamwe. Nye kuvhura tu lironge kuzuvhira eharo lyangoso kwa vamwe hena ndi? Ngomu nye zina kuhedera nkareso zoyininke eyi pepi nouhura, ayo kwa kara nomulyo kwetu tu hedere unene pepi koVakriste vakwetetu. Bibeli kwa tanta asi: “Uhura woyininke nayinye pepi una kara. . . . Nye unene po kareni neharo lyenene lya hara mukweni a ku hare, yeeyi eharo kudongwenesa po nonzo dononzi.”—1 Peturusa 4:7, 8.

Nsene pana katuka maudigu

4. (a) Morwasinke maudigu aga vhulire kukatuka pokatji kowo womombungakriste? (b) Mauwa musinke aga tundu mokuruganesa mapukururo gomoBibeli nampili ngomu atu pili kuhara nkenye apa kugarugana?

⁴ Yimo, posiruwo nasinye esi tuna kara asi kapi twa sikilira mo, ngapa kara yiruwo apa ngatu rugana yininke eyi ngayi guvisa wopeke. Vanavazinyetu nawo kuvhura kutuzona mononkedi dokulisiga-siga. (1 Johanesa 1:8) Nsene o kara momukaro gwangoso, yisinke no rugana? Matjangwa kwa gava mavyukiso gohepero. Nye eyi aga tanta kuvhura yi pire kuliza neyi twa hara kurugana ose vantu wokupira kusikilira mo. (Varoma 7:21-23) Nye nampili ngoso, elituromo lyokusikisa mo mapukururo gomoBibeli tali likida eharo lyetu lyenene lyokuhafesa Jehova. Mokuyirugana eyi tayi nenepeke hena sikara seharo lyetu kwava wopeke.

5. Morwasinke natu pilira kurugwida kuwoko nsene gumwe ana tu zuvhisa kukora?

⁵ Nsene vantu vana va zuvhisa kukora, poyiruwo yimwe awo kuhetekera ko kurugwida kuwoko kogo ana va handukisa. Nye oyo kuyipika tupu hena mukaro unene. Nsene pana hepa efutiso, twa kona kuyisigira nayinye Karunga. (Yisewe 24:29; Varoma 12:17-21) Vamwe kuvhura va hetekere ko kupira kugwanekera nowo vana va handukisa. Nye ose nokuvhura si kuyirugana eyi kovakereli vakwetu, morwa mokuninka ukereli wetu va u tambure kwa korera peharo lyetu eli twa hara vanavazinyetu. (1 Johanesa 4:20) Paurusa yipo ga tjenge asi: “Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa.” (Vakorosi 3:13) Ove kuvhura o yi rugane eyi ndi?

6. (a) Poyikando yokusika kupi natu dongwenena po munazinyetu? (b) Yisinke natu dimburura mokutuvatera tu guse po nonzo edi vana tu zono?

⁶ Ngapi nye nsene gumwe ta tu zono nkenye apa nye kapi ana kuzona nzo zonene zokuvhura kumugusisa mo mombungakriste? Kononzo dononunu dangoso, mupositoli Peturusa kwa geve egano lyokudongwenena po “dogoro nokorutano-naruvali.” Nye Jesus kwa tente asi: “Kapisi dogoro pwarutano-naruvali tupu, dogoro rokonomurongo ntano-nambali rutano-naruvali.” Age kwa zeresere unene womakongo getu kwaKarunga mokugayereka naga na vhura kutura nkenye muntu. (Mateusa 18:21-35) Mononkedi dononzi ose kuzona kwaKarunga nkenye ezuva—pamwe pokuligazara tupu pwanyamwetu ntani kweyi atu uyunga neyi atu gazara, ndi kweyi atu pili kusikisa mo—twa hana kudimburura asi kuna kuzona tuna kuzona. (Varoma 3:23) Nampili ngoso, Karunga kutwikira kutufira nkenda. (Episarome 103:10-14; 130:3, 4) Age kwa hepa ko kwetu asi nose tu kare ngorooro novakwetetu. (Mateusa 6:14, 15; Vaefeso 4:1-3) Ntani natu rugana eharo eli lya pira ‘kupaka nkoko.’—1 Vakolinte 13:4, 5; 1 Peturusa 3:8, 9.

7. Yisinke natu rugana nsene munazinyetu ana tu handukire?

⁷ Kuvhura pa kare yiruwo yimwe apa natu dimburura asi nampili ngomu tuna pili unkore namunazinyetu, age ana tu handukire. Ose kuvhura tu horowore ‘kuyidongonona po neharo’ ngomu va yi tjanga mwa-1 Peturusa 4:8. Ndi kuvhura tu guse situmbukirwa sokuuyunga nage nokuhetekera ko kutengwidira po elikwatakano lyombili.—Mateusa 5:23, 24.

8. Nsene mupuli mukwetu ana rugana sininke simwe esi sina tu handukisa, yisinke natu vhura kurugana ko?

⁸ Kuvhura yi kare asi mupuli mukwetu kuna kurugana yininke yokukuhandukisa ove nava wopeke. Kapi nayi wapa nani mokuuyunga nage? Kuvhura. Nsene o mu singonwena nyamoge udigu owo monkedi zombili, kuvhura yi rete yitundwamo yoyiwa. Nye pomuhowo wa hepa kulipura nyamoge asi: ‘Nye age nawa-nawa kuna kurugana yokulilimba nomatjangwa ndi? Ndi udigu wounene kuna kara asi ntundiliro zange nedeuro lyange kwa lisiga neli lyendi?’ Vangarara asi o dire kutura po nompango danyamoge makura o tokore kuliza nado. (Jakopo 4:11, 12) Jehova kutambura vantu wokonontundiliro nadinye ga hana mpongo ntani age kuvalididimikira ngomu vana kukura pampepo.

9. (a) Wolye ava pakere mbili nonzo dononene mombungakriste? (b) Posiruwoke asi kara situmbukirwa sogu vana zono a katuke pomuhowo, nositambo musinke?

⁹ Nsene gumwe gomombungakriste ana lihameke monzo zonene, ngwendi ruhonda, epakero mbili lyomongenderera lya kona kukara po. Wolye nava yi pakera mbili? Vakuronambunga. (Jakopo 5:14, 15) Nampili ngoso, nsene nzo kuna zi zono muntu gongandi, nampo moukaro wongesefa ndi mokupira kuruganesa nawa eraka, ogu vana zono ga kona tanko kuhedera muzoni pwagelike. (Mateusa 18:15) Nsene eyi kapi yina kuyikohonona po, nontambo dokukwama ko da kona kukadirugana ngomu ya singonokwa mwaMateusa 18:16, 17. Eharo lyetu kwamunazinyetu ogu ana tu zono ntani nokuhara ‘kumukongwa’ tayi tu vatere tu yi rugane eyi monkedi zokuguma mutjima gwendi.—Yisewe 16:23.

10. Yisinke nayi tu vatera tu tare yininke monkedi zokuvyuka nsene pana wiza udigu?

¹⁰ Nsene pana wiza udigu, u kare asi wounene ndi woununu, tayi tu vatere nsene tu kondjera tu zuvhe asi ngapi omu a u tara Jehova. Age kapi a kwatesa ko nonzo mwankenye rupe, ntani posiruwo sendi, vazoni wononzo dononene ava ava pili kulitezurura kuvagusa mo melipakerero lyendi. Nampili ngoso, twa ha divareni asi natuvenye kuzona mononkedi dononsesu ntani kwa hepa ezaverero lyendi nonkenda zendi. Jehova yipo ga tura po sihonena esi natu kwama nsene tuna gwanekere nononzo dava wopeke. Nsene tu kara nonkenda, ose kuna kulikida eharo lyendi.—Vaefeso 5:1, 2.

Papara nonkedi ‘dokutamununa’

11. Morwasinke Paurusa ga korangederere Vakolinte va ‘tamunuke’?

¹¹ Paurusa kwa kere makwedi gomanzi mokutunga mbungakriste moKolinte zomoGereka. Age kwa rugene unene a vatere vanavazina vena ntani age kwa va here. Nye vamwe vawo kapi va mu here unene. Awo kwa kere vakuyauki wovanene. Age kwa va korangedere va ‘tamunune’ mokulikida kwawo malizuvho gawo. (2 Vakolinte 6:11-13, NW; 12:15) Natuvenye tayi tu vatere mokutarurura nawa omu natu likida eharo lyetu kwava wopeke nokupapara nonkedi dokulitamununa.—1 Johanesa 3:14.

12. Ngapi omu natu kulika eharo lyetu kwava navenye womombungakriste?

¹² Koveli vamwe womombungakriste ava atu mono udigu mokuvhura kuvahedera ndi? Nsene tu paka po mukumo tu divare elisigo lyountu wetu—ngomu tuna va harere awo va tu ruganene—eyi kuvhura kutuvatera mokuwapeka elikwatakano lyetu. Malizuvho getu kwawo kuvhura hena kugawapukurura nsene tu papara yikara yawo yoyiwa nokudemenena pwayo. Eyi tayi ninkisa eharo lyetu lyokuvahara li kure.—Rukasa 6:32, 33, 36.

13. Ngapi omu natu tamununa mokulikida eharo kwava va kara mombungakriste zetu?

¹³ Nye pwa kara eyi natu hetekera ko kuruganena wopeke. Kuvhura yi pire kutuvhulika mokumorora navenye kwankenye epongo. Ndi tu zigide vakaume navenye koyikulya. Nye kuvhura tu tamunune mokuruganesa nominute tupu dongandi tu dive nawa gumwe mombungakriste ndi? Kuvhura poyiruwo yimwe tu zigide gumwe ogu twa dira kudiva nawa a rugane kumwe nose mokuzuvhisa ndi?

14. Ngapi omu natu likida eharo lyenene lya hara mukweni a ku hare mokatji koVakriste ava twa pira kugwanekera nawo rumwe?

¹⁴ Yigongi yoUkriste kutupa nompito donongwa tu tamunune eharo lyetu. Ayo kuvhura kuyiponga mayovi. Ose kapi tatu vhuru kugwanekera nawo navenye, nye ose kuvhura tu kare nomukaro ogu guna kulikida asi ose kutura ukalinawa wawo komeho zouwa wanyamwetu. Pokatji komaruha, ose kuvhura tu likide elituromo lyanyamwetu mokulitura mo tu gwanekere navamwe ava vana tu kundurukida. Ezuva limwe navenye ava va kara pevhu ngava ka kara vantu-namumbyendi, nokukarera mouumwe Karunga gosili ntani Guhya gwanavenye. Ee, ruhafo musinke ngaru ka kara mokukalidiva-diva! Eharo lyenene yilyo ngali tu ninkisa tu hare kuyirugana eyi. Morwasinke no dilira kutameka ngesi?

Erugururo nzogera

• Nsene pana katuka maudigu pokatji koVakriste, ngapi omu nava ga gusa po, ntani morwasinke?

• Mononkedi musinke omu nali kura eharo lyetu ngomu tuna kukura pampepo?

• Ngapi omu nayi vhulika mokulikida eharo lyenene kupitakana povakaume vetu wopopepi tupu?

[Efano pepenuno 148]

Eharo lyoSikriste kulilikida mononkedi dononzi, ngwendi komapongo gombungakriste