Egaununo lyoronantantatu
“Awo kapisi wouzuni”
1. (a) Yisinke ga kandererere Jesus varongwa vendi komeho zonomfa dendi? (b) Morwasinke ‘kupira kukara gouzuni’ kwa karera nomulyo?
MOMASIKU komeho zokumudipaga, Jesus kwa kandererere mo varongwa vendi. Mokudiva asi Satana nga va tura momaudigu gomanene, Jesus kwa tanterere Oguhwe asi: “Kapi na kukanderera asi o va guse mo mouzuni, nye asi o va kunge koMudona. Awo kapisi wouzuni, moomu na dira kukara ame gouzuni.” (Johanesa 17:15, 16) Morwasinke eliguso kouzuni lya karera nomulyo? Morwa Satana yige mupangeli gouzuni ou. Vakriste kapi tava hara kukara ruha rouzuni ou wa kara mepangero lyendi.—Rukasa 4:5-8; Johanesa 14:30; 1 Johanesa 5:19.
2. Mononkedi musinke omu ga dilire Jesus kukara gouzuni?
2 Kupira kukara gouzuni kapi ya tente asi Jesus kapi ga here wopeke. Age kwa verwire vaveli nokupindura vafe ntani nokuronga vantu kuhamena Uhompa waKarunga. Age kwa geve hena eparu lyendi morwa vantu. Nye age kapi ga here nonkedi noyirugana youdinikarunga yava ngava likida mpepo zouzuni waSatana. Yipo nye ga rondwerere yininke eyi ngwendi eharo lyokuhara yokunyata nomparukiso zokudowokera emona ntani nokuhara unekuto. (Mateusa 5:27, 28; 6:19-21; Rukasa 20:46, 47) Pwa hana sitetu, Jesus kwa nyokere hena maupolitika gouzuni. Nampili ngomu ga kere Mujuda, age kapi ga gusire mbinga konompata doupolitika pokatji koVaroma noVajuda.
“Uhompa wange kapisi wouzuni ou”
3. (a) Erundiro musinke va tulire po vampitisili womaukerelikarunga goVajuda kwaPiratusa kuhamena Jesus, ntani morwasinke? (b) Yisinke yina kulikida asi Jesus kapi ga here kukara hompa gepevhu?
3 Tarurura ko kweyi ya horokere apa vampitisili womaukerelikarunga goVajuda va kwete Jesus nokumutwara kwaPontiusi Piratusa, mupangeli gwaRoma. Mousili, vampitisili vena kwa va korere morwa Jesus kwa dukwire uyilipaki wawo. Mokuninka mupangeli a rugane ko yuma kwaJesus, awo kwa mu rundilire asi: “Mugara ogu tuna yi mu nongonona asi ta pukisa muhoko gwetu, age kusilika yokufutira hompa gwaRoma mutero, age hena kutanta mwene asi yige Kristusa, Hompa.” (Rukasa 23:2) Eyi kwa kere nawa-nawa yimpempa morwa mvhura zimwe za pitire po, apa vantu va here kutumba Jesus hompa, age kwa nyokere. (Johanesa 6:15) Age ga divire asi nga ka kara Hompa gemeguru komeho. (Rukasa 19:11, 12) Ntani hena, age kapi ngava ka mu tumba vantu, nye Jehova.
4. Nkedi musinke ga kere nazo Jesus kuhamena kufuta mutero?
4 Mazuva gatatu tupu komeho zokukwata Jesus, Vafalisayi kwa hetekere Jesus asi ngano a tante ko yuma yokulimbika kufuta mutero. Nye age kwa tente asi: “Likideni nge si simaliva. Efano eli nedina eli va tjanga po lyalye?” Apa va tente asi “Lyahompa gwaRoma,” age kwa limbwilire asi: “Nhi, omu futire hompa gwaRoma eyi ya mu hamena, ano Karunga nage yeeyi ya mu hamena.”—Rukasa 20:20-25.
5. (a) Sirongwa musinke ga rongere Jesus varongwa vendi posiruwo esi va mu kwete? (b) Ngapi Jesus omu ga singonwene konda kweyi ga rugene? (c) Yisinke ya tundire mo mompanguro zina?
5 Hawe, Jesus kapi ga rongere erwaneso mapangero gouzuni. Apa vakwayita novagara peke va wizire va ya kwate Jesus, Peturusa kwa gusire rufuro rwendi nokukamuna mugara gumwe gwawo, ta tete ko etwi. Nye Jesus kwa tente asi: “Zweka mo rufuro roge mosiraro saro, yeeyi nkenye ogu a kwata rufuro, yiro ngaru mu lya rooro.” (Mateusa 26:51, 52) Ezuva lyokukwama ko Jesus kwa singonwene yirugana yendi kwaPiratusa, ta tanta asi: “Uhompa wange kapisi wouzuni ou. Nganosi uhompa wange wouzuni ou, vakareli vange ngano [vana] ru, asi na ha za momawoko goVajuda.” (Johanesa 18:36) Piratusa kwa yi tambwire asi kapi ga ‘gwene mo nzo zoyininke eyi va rundaikire’ Jesus. Nye mokulimburukwa kesininiko lyombunga, Piratusa kwa pulisilire Jesus va ka mu pampare kositji.—Rukasa 23:13-15; Johanesa 19:12-16.
Varongwa tava kwama epitisiro lyaJesus
6. Ngapi Vakriste wopomuhowo va likidire asi awo kwa nyokere mpepo zouzuni nye kwa here vantu?
6 Varongwa vaJesus kwa zuvhire asi yisinke ya hepa po mokukara kapisi wouzuni. Ayo kwa tente asi kunyokera mpepo zouzuni woudinikarunga noyirugana yamo, eyi ya kwaterere mo nyanya noyilihafesa yokunyata yomomavango goyidanauka yoVaroma. Mokonda zeyi, varongwa kwa va tumbwire asi vanyengi wovantu. Awo kapi va nyengere vakwawo, nye ngava rugana unene va vatere wopeke va gwane mo uwa mosigava saKarunga sezoworo.
7. (a) Yisinke va gwanekerere nayo varongwa womuhowo, morwa kukara asi kapisi wouzuni? (b) Ngapi omu ngava tara awo vapangeli womaupolitika nokufuta mutero, ntani morwasinke?
7 Vasikuli vaJesus ngava va hepeke ngamoomu tupu va mu hepekere age, unene po vapangeli ava va gwene mapukururo goyimpempa. Nampili ngoso, poyiha yo-56 S.N., mupositoli Paurusa kwa tjangerere Vakriste womoRoma, ta va korangeda asi va “limburukwe kepangero [vapangeli woupolitika] eli ali [va] pangere. Yeeyi epangero nalinye kwa [tunda] kwaKarunga.” Kapisi asi Jehova kutura po mapangero gouzuni, nye age kugapulisira ga kare po dogoro paapa ngau ka pangera Uhompa wendi welike evhu nalinye. Ya lizire, Paurusa kwa geve magano koVakriste asi va fumadeke vapangeli wouzuni nokufuta mutero.—Varoma 13:1-7; Titusa 3:1, 2.
8. (a) Dogoro pokusika papi nava limburukwa Vakriste komapangero? (b) Ngapi omu va kweme Vakriste womuhowo sihonena saJesus?
8 Nampili ngoso, ulimburukwi kovapangeli womaupolitika wa kona kukara neyereko, kapisi u pire uhura. Nsene pana kara elirwaneso pokatji konoveta daJehova nonoveta dovantu, vakereli vaJehova va kona kulimburukwa noveta dendi. Tarurura ko asi buke On the Road to Civilization—A World History za tanta ko kuhamena Vakriste wopomuhowo: “Vakriste kwa nyokere kulihameka moyirugana yimwe yoVaroma. Vakriste . . . kwa lizuvhire asi kwa kere erwaneso lyepuro lyawo mokuza moyirugana youkwayita. Awo kapi va kere noyirugana youpolitika. Awo kapi ngava tongamene mupangeli.” Apa mpangwiliro zoVajuda zonene za ‘nyokererere’ varongwa va hageke kuzuvhisa, awo kwa limbwilire asi: “Ose twa hepa po kulimburukwa unene Karunga, kupitakana vantu.”—Yirugana 5:27-29.
9. (a) Morwasinke Vakriste womoJerusarema va ruganenene eyi va rugene mo-66 S.N.? (b) Monkedi musinke sa kara esi sihonena somulyo?
9 Kuhamena konompata doupolitika noukwayita, varongwa kapi va gusire mbinga. Mo-66 S.N., Vajuda womoJudeya kwa rwanesere hompa gwaRoma. Vakwayita woVaroma yipo va kundurukidire usimbu Jerusarema. Yisinke va rugene Vakriste womositata? Awo kwa diworokere epukururo lyaJesus lyokutunda mositata. Varoma apa va tengwire mo siruwogona, Vakriste kwa tjwayukire tava rutu mukuro gwaJorodana nokuza momukunda gonondundu daPela. (Rukasa 21:20-24) Epirombinga lyawo konyima lya ya kara sihonena koVakriste wokulimburukwa.
Epirombinga lyoVakriste momazuva aga gouhura
10. (a) Moyirugana musinke omu adi litura unene Nombangi daJehova, ntani morwasinke? (b) Kuhamena kosinke va kara nepirombinga?
10 Etjango lyohistoli lya likida asi kozili mbunga ezi azi kwama epirombinga lyoVakriste wopomuhowo momazuva aga gouhura ndi? Yimo, Nombangi daJehova kwa yi rugana eyi. Siruwo nasinye esi, awo kwa twikira kuzuvhisa asi Uhompa waKarunga yizo zelike ntambo zokureta mbili zokukarerera nezokomeho ntani nehafo kovahali wouhungami. (Mateusa 24:14) Nye kuhamena nompata domonomuhoko, awo kwa kara nepirombinga lyene-lyene.
11. (a) Ngapi epirombinga lyoNombangi lya lisiga noyirugana yovampitisili womaukerelikarunga? (b) Etaro musinke da kara nalyo Nombangi daJehova kweyi ava rugana wopeke kuhamena upolitika?
11 Melilimbo lyenene, vampitisili womaukerelikarunga gouzuni ou kwa lihameka mo unene moyihorauka youpolitika. Moyirongo yimwe, awo kwa litura mo unene mosigendo sokutangauka ndi sokuswaura vakandidate. Vampitisili womaukerelikarunga vamwe kwa kara noyirugana youpolitika. Vamwe kwa sininika vanapolitika va hare malikwamo aga aga zi vampitisili womaukerelikarunga komutjima. Nampili ngoso, Nombangi daJehova kapi adi lihameke mo momaupolitika. Awo kapi hena ava heteke kusilika wopeke mokulipakerera kombungapolitika ndi melitangaukiro sirugana soupolitika ndi va lihameke momahoroworo. Jesus kwa tente asi varongwa vendi kapisi wouzuni, yipo nye asi Nombangi daJehova kapi adi lihameke mo momaupolitika.
12. Yisinke ya tunda mo morwa kugusa mbinga komaukerelikarunga gouzuni ou?
12 Ngomu ga yi pumbire Jesus, nomuhoko kwa za rorunzi koyita. Nampili maruha gomomuhoko gumwe kwa lirwanesa-rwanesa. (Mateusa 24:3, 6, 7) Vampitisili womaukerelikarunga konyara nkenye apa kwa kwatesa ko muhoko gumwe ndi ruha rumwe merwaneso rukwawo nokutumangeda vasikuli vawo nawo va rugane ngosikwawo. Yitundwamo? Vahameni woukerelikarunga umwe tupu kulidipaga vene navene moyita morwa yeeyi tupu asi womuhoko ndi worudi peke. Eyi kwa lilimba nompango zaKarunga.—1 Johanesa 3:10-12; 4:8, 20.
13. Yisinke aga likida mausili kuhamena epirombinga lyoNombangi daJehova?
13 Nampili ngoso, Nombangi daJehova kwa kara va hana mbinga moyikotjangana nayinye. The Watchtower za-1 Mangundu 1939 kwa tente asi: “Navenye ava vana kara koruha rwaHompa ngava kara va hana mbinga konomuhoko dina kurwa yita.” Nombangi daJehova monomuhoko nadinye nomonomukaro nadinye kutwikira kukwaterera komukaro ogu. Awo kapi ava pulisire eligaunuko lyomaupolitika noyita yi teze po umumbya wawo wouzuni naunye. “Nomfuro dawo [tava] di hambura matemo, nomagonga gawo mamumbere gokukaswisa.” Mokupira mbinga, awo kapi hena ava liwapaikire yita.—Jesaya 2:3, 4; 2 Vakolinte 10:3, 4.
14. Yisinke da gwanekera nayo Nombangi daJehova morwa kukara vana ligusa ko kouzuni?
14 Sininke musinke simwe esi asi tundu mepirombinga lyawo? Jesus kwa tente asi: “Yiyo mwa dira kuhamena kouzuni, yipo nye wa mu nyengera uzuni opo.” (Johanesa 15:19) Nombangi daJehova wovanzi kwa va tura monodorongo morwa kukara vakereli vaKarunga. Vamwe kwa va hepeka nokuvadipaga ngomu ya horokerere Vakriste wouye womuhowo. Eyi kuhorokera ngoso morwa Satana, “mupangeli gomudona gouzuni ou” kurwanesa vakereli vaJehova ava va pira kukara asi wouzuni ou.—2 Vakolinte 4:4; Ehororo 12:12.
15. (a) Kosinke dina kuza nomuhoko nadinye, ntani kosinke da hepa kuvangarara Nombangi daJehova di henduke? (b) Morwasinke kuligusa kouzuni sina karere sininke somulyo unene?
15 Vakereli vaJehova vana hafa mokukara asi awo kapisi wouzuni, morwa nomuhoko damo nadinye kuna kuza kouhura wado poHarumagedoni. (Ndaniyera 2:44; Ehororo 16:14, 16; 19:11-21) Ose ngatu henduka yitundwamo yina morwa ose kwa ligusa kouzuni. Ngovantu wouumwe mouzuni mudima, ose kulimburukwa koUhompa waKarunga wemeguru. Yimo, mokukara asi kapisi wouzuni, ose tatu gwanekere nomahepeko ntani nomakwama-kwamo. Nye eyi ntaantani tupu yi ka hage, morwa uzuni woudona ou wemepangero lyaSatana tava ka u zonagwilira po narunye. Ano kwava ava kerere Jehova ngava ka paruka narunye mouzuni wendi woupe wouhungami konhi zoUhompa waKarunga.—2 Peturusa 3:10-13; 1 Johanesa 2:15-17.
Erugururo nzogera
• Ngapi omu Jesus ga likidire asi yisinke ya kwatera mo mokukara “kapisi wouzuni”?
• Nonkedi musinke va kere nado Vakriste wopomuhowo kuhamena (a) mpepo zouzuni, (b) vapangeli wouzuni, ntani (c) nokufuta mutero?
• Mononkedi musinke omu da likida Nombangi daJehova mosiruwo sanaina epirombinga lyawo lyoUkriste?
[Efano pepenuno 165]
Jesus kwa singonwene asi age novasikuli vendi “kapisi wouzuni”