Egaununo 17

Omu no gwana ruhafo

NATUVENYE kwa hara kukara noruhafo, ndi kapisi yimo?— Nye kapisi vantu navenye va kara sili noruhafo. Ono diva asi morwasinke?— Morwa kapi va diva eyi ayi retesa po ruhafo. Awo kugazara asi kuweka yininke yoyinzi yiyo ayi reta po ruhafo. Nye apa ava gwana yininke eyi, ruhafo rwawo kapi aru kara siruwo sosire.

Apa kuna kara po sininke somulyo esi asi retesa po ruhafo. Murongi goMunene kwa tente asi: “Kugava kwa kara nerago, kwa pitakana kutambura.” (Yirugana 20:35) Ngapi omu no gwana ruhafo?— Yimo, ayo kuna kara pokugava ntani nokuruganena yininke vapeke. Nove wa yi diva ndi?—

Tu ze tu gazadare ko tanko kuhamena yuma eyi. Jesus kwa tente nye asi muntu ogu ana kugwana uhwi ngano kapi na hafa ndi?— Hawe, kapisi yiyo ga tembe. Nove wa hara kugwana mauhwi, ndi ngapi?— Nkenye gumwe kwa yi hara. Ose kuhafa apa atu gwana yininke yoyiwa.

Nye Jesus kwa tente asi kugava kuturetera ruhafo rorunene po. Yilye ogu ono kugazara ga gava yininke yoyinzi kovantu kupitakana nkenye ogu?— Yimo, Jehova Karunga.

Bibeli kutanta asi Karunga “yige a pe nayinye mwenyo nomunku noyininke nayinye.” Age kuturokesera mvhura ntani kutupumisira ezuva, yipo yimeno yi kure tu gwane nondya dokulya. (Yirugana 14:17; 17:25) Yipo nye, Jehova ga karera Karunga goruhafo! Kugava yininke kwava wopeke yiyo yimwe ayi hafesa Karunga. Ntani apa atu gava, nose kuvhura kutuhafesa.

Yisinke eyi natu vhura kugava kovantu wopeke? Ngapi omu ono kugazara?— Mauhwi gamwe wa hepa kuza kositora o ka ga rande. Yipo nye nsene ono hara kugava uhwi wangoso, ove wa hepa kupungura yimaliwa dogoro ngayi gwaneke po mokuranda uhwi owo.

Nye kapisi mauhwi nagenye ava vhuru kuranda mositora. Pasihonena, nsene upyu unene makura o pe muntu ana kuzuvha enota nkinda zomema gomatenda, ayo kuna kara ngwendi uhwi. Nsene o rugana ngoso, ove ngo gwana ruhafo oru aru tundu mokugava.

Pamwe nove nonane woge tomu kanga yikuki ndi mungome. Yinke eyi no vhura kurugana eyi nayi kuhafesa, to li nyovelike yininke oyo ndi?— Yimo, kuvhura o pe ko yimwe vakaume woge. Ono hara nove ngo yi rugane ezuva limwe ndi?—

Murongi goMunene novapositoli vendi nawo va divire ruhafo oru aru tundu mokugava. Ono diva asi yinke eyi va geve kovantu wopeke?— Aso kuna kara sininke somulyo po mouzuni! Awo va divire usili kuhamena Karunga, ntani awo kwa tanterere ko vapeke usili ou. Awo kwa yi rugene va hana kugwana yimaliwa kweyi va geve.

Ezuva limwe, mupositoli Paurusa nakaume kendi gomuwa murongwa Rukasa kwa gwanekerere nomukadi ogu ga here kukara noruhafo rokugava. Awo kwa mu gwene komukuro. Paurusa naRukasa kwa zire ko morwa va zuvhire asi yiko ngava kanderere. Yosili, apa va ka sikire, awo kwa ka gwene vakadi vamwe kuna kukanderera.

Paurusa kwa tamekere kutantera vakadi ava mbudi zongwa kuhamena Jehova Karunga noUhompa wendi. Gumwe gwawo kwa kere Lidiya ntani age kwa purakenene nawa. Konyima, Lidiya kwa here kuvaruganena yuma mokulikida asi age kwa haferere sili mbudi zongwa ezi ga zuvhire. Makura age ta sininike oPaurusa naRukasa asi: ‘Nsene muna mono nge sili asi na pura mwaJehova, ya tu zeni mu ka kare membo lyange.’ Makura ta va sininike va ze membo lyendi.—Yirugana 16:13-15, NW.

Lidiya ya mu hafesere mokukara novakareli ava vaKarunga membo lyendi. Age kwa va here morwa awo va mu vaterere mokulironga kuhamena Jehova naJesus ntani kuhamena omu vantu nava vhura kuparuka narunye. Ayo ya mu hafesere pokugava nondya nomararo koPaurusa naRukasa. Kugava kwaLidiya kwa mu hafesere morwa age kwa here sili kugava. Aso kuna kara sininke simwe esi twa hepa kudiworoka. Gumwe kuvhura a tu tantere asi twa hepa kugava uhwi. Nye nsene kapi sili tuna hara kugava uhwi, ayo kapi ngayi tu hafesa.

Pasihonena, ngapi nsene ono kara nomautovara aga ono hara kulya? Nsene ni ku tantera asi wa hepa kugava ko gamwe komunona gwapeke, ove no yi hafera mokumupa ko ndi?— Nye ngapi nsene ove ono kara nomautovara, makura to ligwanekere nakaume koge ogu wa hara unene? Ayo kuvhura yi ku hafese nsene nyamoge ono yi gazara mokupa ko gamwe kaume koge, ndi ngapi?—

Poyiruwo yimwe, ose kuhara unene muntu dogoro tu hare kumupa nayinye eyi tuna kara nayo. Ngomu tuna kukura meharo lyetu lyokuhara Karunga, yimo natu hepa kulizuvha kumuhamena.

Murongi goMunene ga divire mukadi goruhepo ogu ga lizuvhire ngoso. Age ga mu mwene pontembeli moJerusarema. Age kwa kere tupu notusenda tuvali, kapi ga kere noyimaliwa yimwe hena. Nye age kwa tu tulire natunye mosikesa ngosigava ndi uhwi kontembeli. Kwato ogu ga mu sininikire mokuyirugana. Sinzi sovantu ava va kere pontembeli kapi va divire eyi ga rugene. Age kwa yi rugene morwa ga here kuyirugana, ntani morwa kwa here sili Jehova. Ayo ya mu hafesere mokugava.—Rukasa 21:1-4.

Apo kwa kara po nonkedi dononzi omu natu vhura kugava. Kuvhura o gazadare ko nonkedi dimwe ndi?— Nsene tu gava morwa tuna hara sili kuyirugana, ose ngatu hafa. Eyi yiyo Murongi goMunene ana kututantera asi: “Omu gave.” (Rukasa 6:38) Nsene tu yi rugana, ose ngatu hafesa vantu vapeke. Ano nose ngatu hafa kupitakanena!

Tu ze tu rese yoyinzi kuhamena omu kugava a kureta ruhafo mwaMateusa 6:1-4; Rukasa 14:12-14; ntani 2 Vakolinte 9:7.

[Efano pepenuno 92]

Morwasinke ga karera Jehova Karunga goruhafo?

[Efano pepenuno 93]

Yinke nayi ku hafesa kupitakana kulya yikuki ndi mungome nyovelike?

[Efano pepenuno 94]

Yinke ga tanterere Lidiya oPaurusa naRukasa?

[Efano pepenuno 94]

Morwasinke Lidiya ga karerere noruhafo mokugava yuma koPaurusa naRukasa?

[Efano pepenuno 96]

Morwasinke mukadi ogu goruhepo ga kere noruhafo mokugava nayinye eyi ga kere nayo?